၀ုလ်ဗ်စ်ကို အနိုင်ရပြီး အဆင့်(၃)နေရာကို ပြန်တက်လာတဲ့ မန်စီးတီး
ပရီးမီးယားလိဂ်ပွဲစဉ်(၃၅)
မန်စီးတီး(၁-၀)၀ုလ်ဗ်စ်
ဒီရာသီ ပရီးမီးယားလိဂ်ပြိုင်ပွဲက ရာသီမပြီးဆုံးမီမှာပဲ ချန်ပီယံအသင်းအဖြေထွက်ပေါ်ခဲ့သလို တန်းဆင်း(၃)သင်းစလုံးလည်း အဖြေထွက်ပေါ်ပြီးဖြစ်တာကြောင့် ချန်ပီယံတိုက်ပွဲ၊ တန်းဆင်းဇုန်တိုက်ပွဲတွေအတွက် ရင်ခုန်စရာမရှိတော့ဘဲ ဥရောပဝင်ခွင့်တိုက်ပွဲတွေကိုသာ ပရိသတ်တွေ ရင်ခုန်ရတော့မှာဖြစ်ပါတယ်။
ဥရောပဝင်ခွင့်တိုက်ပွဲက (၂)ပိုင်းခွဲခြားနိုင်ပြီး ထိပ်ဆုံး(၅)သင်းစာရင်းဝင်ရေးအတွက် ကြိုးစားရမယ့် ချန်ပီယံလိဂ်ဝင်ခွင့်တိုက်ပွဲ၊ အဆင့်(၆)၊(၇)နေရာတွေ ရယူနိုင်ဖို့အတွက် ကြိုးစားရမယ့် ယူရိုပါလိဂ်၊ ကွန်းဖရန့်လိဂ်ပြိုင်ပွဲဝင်ခွင့်တိုက်ပွဲတွေပဲ ဖြစ်ပါတယ်။
လောလောဆယ်မှာ ချန်ပီယံလိဂ်ဝင်ခွင့်ထိပ်ဆုံး(၅)နေရာဝင်ရောက်ရေးအတွက် အဆင့်(၇)က ဗီလာအထိ အခွင့်အရေးရှိနေပြီး ထိပ်ဆုံး(၂)သင်းကလွဲလို့ ကျန်အသင်းတွေဖြစ်တဲ့ မန်စီးတီး၊ နယူးကာဆယ်၊ ချယ်လ်ဆီး၊ နော်တင်ဂမ်ဖောရက်စ်၊ ဗီလာအစရှိတဲ့အသင်းတွေရဲ့ ဇယားရပ်တည်မှုအပြောင်းအလဲတွေကို ရက်သတ္တပတ်တိုင်းလိုလိုတွေ့နေရပါတယ်။
မနေ့က ကစားခဲ့တဲ့ ပရီးမီးယားလိဂ်ပွဲစဉ် မန်စီးတီး(၁-၀)၀ုလ်ဗ်စ်ပွဲအပြီးမှာတော့ မန်စီးတီးအသင်းက အဆင့်(၄)နေရာကနေ အဆင့်(၃)ကို ပြန်တက်လာပြီး နယူးကာဆယ်က အဆင့်(၃)ကနေ အဆင့်(၄)ကို ပြန်ဆင်းပေးလိုက်ရပါတယ်။
မန်စီးတီး(၁-၀)၀ုလ်ဗ်စ်ပွဲမှာ မန်စီးတီးအသင်းက အိမ်ရှင်ပီပီ အသာစီးက ကစားနိုင်ခဲ့တယ်ဆိုပေမယ့် နှစ်သင်းစလုံး ခံစစ်ကိုပိတ်ကစားခဲ့ကြတာကြောင့် ဂိုးအခွင့်အရေးသိပ်မရခဲ့ကြဘဲ ဂိုးပေါက်ကို ထိထိရောက်ရောက်ခြိမ်းခြောက်နိုင်တဲ့အကြိမ်အရေအတွက်လည်း အတော်နည်းခဲ့ပါတယ်။
၀ုလ်ဗ်စ်အတွက် ကံဆိုးခဲ့တာက နောက်ခံလူနော်ရီ၊ တိုက်စစ်မှူးကွန်ညာတို့ ကန်သွင်းခဲ့တဲ့ဘောလုံးတွေ ဂိုးတိုင်ထိထွက်ခဲ့တာဖြစ်ပြီး ဒီအလုံးတွေသာ ဂိုးဖြစ်ခဲ့ရင် တမျိုးတဖုံအပြောင်းအလဲဖြစ်မှာဖြစ်ပါတယ်။
မန်စီးတီးအသင်းအတွက် တစ်လုံးတည်းသောအနိုင်ဂိုးကိုတော့ တောင်ပံကစားသမားဒိုကူပေးခဲ့တဲ့ဘောလုံးကနေ တိုက်စစ်မှူးနေရာမှာ ကစားခဲ့တဲ့ ဒီဘရိုင်းနားက ပွဲချိန်(၃၅)မိနစ်မှာ သွင်းယူခဲ့တာပါ။
မန်စီးတီးအသင်းအနေနဲ့ ပွဲစဉ်(၃၅)ကို အစောဆုံးပွဲအဖြစ်ကစားရတာဖြစ်လို့ ဒီတစ်ပတ်ပွဲစဉ်မှာ နယူးကာဆယ်အသင်း ပြန်အနိုင်ရရင် မန်စီးတီးက အဆင့်(၄)နေရာပြန်ဆင်းပေးရမှာဖြစ်ပါတယ်။
