၂၀၁၀ ဆီမီးဖိုင်နယ်လို ဘာစီလိုနာကို ဆီမီးဖိုင်နယ်မှာ ကျော်ဖြတ်ခဲ့တဲ့ အင်တာမီလန် ချန်ပီယံဆုတစ်ကျော့ပြန်ဆွတ်ခူးနိုင်မလား
ချန်ပီယံလိဂ်ဆီမီးဖိုင်နယ်(ဒုတိယအကျော့)
အင်တာမီလန်(၄-၃)ဘာစီလိုနာ AET
အင်တာမီလန်အသင်းက ချန်ပီယံလိဂ်ပြိုင်ပွဲမှာ ချန်ပီယံဆုနဲ့ဝေးကွာနေတာ (၁၅)နှစ်ရှိခဲ့ပါပြီ။ နည်းပြမော်ရင်ဟိုလက်ထက် ၂၀၁၀ ခုနှစ်မှာ ဗိုလ်စွဲပြီးနောက်ပိုင်း ချန်ပီယံလိဂ်ချန်ပီယံဆုကို ပြန်မကိုင်မြှောက်နိုင်တော့တဲ့ အင်တာမီလန်အသင်းဟာ ဒီနှစ်မှာတော့ ၂၀၁၀ ဆီမီးဖိုင်နယ်အတိုင်း ထပ်တူထပ်မျှပြုလုပ်နိုင်ခဲ့ပါတယ်။
၂၀၁၀ ခုနှစ်တုန်းကလိုပဲ ဆီမီးဖိုင်နယ်အဆင့်မှာ စပိန်အသင်းကြီးဖြစ်တဲ့ ဘာစီလိုနာကို ကျော်ဖြတ်နိုင်ခဲ့ပြီး ဗိုလ်လုပွဲကို တက်ရောက်ခွင့်ရခဲ့တာပါ။
ပထမအကျော့အဝေးကွင်းမှာ (၃-၃)ဂိုးနဲ့သရေကစားနိုင်ခဲ့တဲ့ အင်တာမီလန်အသင်းဟာ အိမ်ကွင်းဆန်စီရိုမှာ ကြိုးစားအားထုတ်မှုနဲ့ ကံတရားပေါင်းစပ်ပြီး ဘာစီလိုနာကို (၄-၃)ဂိုးနဲ့ အနိုင်ရခဲ့တာပါ။ ဒါကြောင့် နှစ်ကျော့ပေါင်း(၇-၆)ဂိုးနဲ့ ဗိုလ်လုပွဲကို တက်ရောက်နိုင်ခဲ့ပါတယ်။
ပွဲချိန်(၉၀+၂)မိနစ်မှာ အဆာဘီသွင်းယူခဲ့တဲ့ဂိုးသာမရခဲ့ရင် ဘာစီလိုနာက (၃-၂)ဂိုးရလဒ်နဲ့ ဗိုလ်လုပွဲကို တက်သွားနိုင်မှာဖြစ်ပေမယ့် ဒီဂိုးနဲ့ အချိန်ပို(၉၉)မိနစ်မှာ ဖရက်တီစီသွင်းယူခဲ့တဲ့ အနိုင်ဂိုးက အရာရာကို ပြောင်းလဲစေခဲ့ပြီး ဘာစီလိုနာအသင်းကိုလည်း ဖလား(၄)လုံးအိပ်မက်နဲ့ဝေးကွာသွားစေခဲ့ပါတယ်။
ဒီပွဲမှာ ဘာစီလိုနာက ဂိုးသွင်းခွင့်တွေပိုရခဲ့ပေမယ့် ပထမပိုင်းမှာ အင်တာမီလန်က လော်တာရိုမာတီနက်ဇ်(၂၁)မိနစ်မှာ သွင်းယူခဲ့တဲ့ဂိုးနဲ့ ဦးဆောင်ခဲ့ပြီး ပွဲချိန်(၄၆)မိနစ်မှာ သူ့ကြောင့်ရတဲ့ပယ်နယ်တီကို ကွင်းလယ်လူချာဟာနိုဂလူးက သွင်းယူခဲ့လို့ အင်တာမီလန်က ပွဲချိန်မိနစ်(၅၀)ကျော်အထိ (၂-၀)ဂိုးနဲ့ ဦးဆောင်ခဲ့တာပါ။
(၅၄)မိနစ်မှာ ဘာစီလိုနာအတွက် အဲရစ်ဂါစီယာ၊ (၆၀)မိနစ်မှာ အော်လ်မိုက ခေါင်းတိုက်ဂိုးနဲ့ ချေပဂိုးတွေသွင်းခဲ့ကြပြီး ပွဲချိန်(၈၇)မိနစ်မှာ ရာဖင်ညာသွင်းတဲ့ဂိုးက ဒီပွဲရဲ့အဆုံးအဖြတ်လို့ ထင်စရာဖြစ်ခဲ့ပါတယ်။
ဒါပေမယ့် အထက်မှာဆိုခဲ့သလိုပဲ အဆာဘီရဲ့ ပွဲချိန်(၉၀+၂)မိနစ်ဂိုးက ဘာစီလိုနာရဲ့(၃-၂)အနိုင်အိပ်မက်ကို ဖျက်ဆီးခဲ့ပြီး ဖရက်တီစီရဲ့အချိန်ပိုအနိုင်ဂိုးက အင်တာမီလန်(၄-၃)ဘာစီလိုနာဆိုတဲ့ ရလဒ်ကို ထွက်ပေါ်စေကာ ၂၀၁၀ ချန်ပီယံလိဂ် ဆီမီးဖိုင်နယ် သံသရာတစ်ပတ်လည်သလို ဖြစ်စေခဲ့ပါတယ်။
၂၀၁၀ ဆီမီးဖိုင်နယ်လို ဘာစီလိုနာကို ဒီရာသီဆီမီးဖိုင်နယ်မှာ ကျော်ဖြတ်ခဲ့တဲ့ အင်တာမီလန်အသင်းအနေနဲ့ ၂၀၁၀ ချန်ပီယံလိဂ်ပြိုင်ပွဲမှာ ဗိုလ်စွဲခဲ့သလို ဒီပြိုင်ပွဲမှာလည်း တစ်ကျော့ပြန်ချန်ပီယံဖြစ်ဦးမလားဆိုတာ စောင့်ကြည့်ရမှာဖြစ်ပါတယ်။
