၂၀၂၅ ဖီဖာကလပ်ကမ္ဘာ့ဖလားပြိုင်ပွဲဝင်မယ့် မန်စီးတီးအသင်းမှာပါဝင်ဖို့ကို ဒီဘရိုင်းနားငြင်းဆန်ဖွယ်ရှိနေ
ဘယ်လ်ဂျီယံဝါရင့်ကွင်းလယ်လူ ဒီဘရိုင်းနားဟာ ကလပ်အသင်းသစ်ကို ရှာဖွေဖို့အချိန်ယူချင်တာကြောင့် နွေရာသီမှာကျင်းပမယ့် ဖီဖာကလပ်ကမ္ဘာ့ဖလားပြိုင်ပွဲမှာ မန်စီးတီးအသင်းနဲ့ ပါဝင်ဖို့ကို ငြင်းဆန်ဖွယ်ရှိနေပါတယ်။ ဒီရာသီကုန်မှာ မန်စီးတီးအသင်းက ထွက်ခွာမယ့် ဒီဘရိုင်းနားနဲ့ အသင်းတို့ရဲ့စာချုပ်ဟာ ဇွန်(၃၀)ရက်အထိသက်တမ်းရှိနေတာပါ။
ဖီဖာကလပ်ကမ္ဘာ့ဖလားပြိုင်ပွဲကို ဇွန်(၁၄)ရက်မှာ စတင်ကျင်းပမှာဖြစ်လို့ ဒီဘရိုင်းနားဟာ ဒီပြိုင်ပွဲကို ပါဝင်ယှဉ်ပြိုင်ခွင့်ရှိနေတာဖြစ်ပါတယ်။ မန်စီးတီးအသင်းဟာ ကွင်းလယ်လူဒီဘရိုင်းနားရဲ့စာချုပ်ကို ဖီဖာကလပ်ကမ္ဘာ့ဖလားပြိုင်ပွဲအပြီးထိ သက်တမ်းတိုးချင်နေတာပါ။
ဒါပေမယ့် ဒီဘရိုင်းနားဟာ ဖီဖာကလပ်ကမ္ဘာ့ဖလားပြိုင်ပွဲမှာ ဒဏ်ရာရခဲ့ရင် သူ့ရဲ့အပြောင်းအရွှေ့ခက်ခဲသွားမှာကို စိုးရိမ်နေတာကြောင့် ဒီပြိုင်ပွဲကို ငြင်းပယ်ချင်နေတယ်လို့ Daily Star က ဖော်ပြထားပါတယ်။
ဒီဘရိုင်းနားဟာ မန်စီးတီးအသင်းက သူ့ကို စာချုပ်သက်တမ်းမတိုးခဲ့တဲ့ ဆုံးဖြတ်ချက်အပေါ်မှာလည်း ဒေါသထွက်နေတဲ့ပုံစံမှာ ရှိနေတာပါ။ ဒီဘရိုင်းနားဟာ ရာသီကုန်တာနဲ့ အပြောင်းအရွှေ့အတွက် ကလပ်အသင်းတွေနဲ့ဆွေးနွေးမှုပြုလုပ်ဖို့ မျှော်လင့်နေတာဖြစ်ပါတယ်။ ဘယ်လ်ဂျီယံလက်ရွေးစင် ဒီဘရိုင်းနားဟာ အသင်းသစ်ထံမပြောင်းရွှေ့မီမှာ အနားယူပြီး နောက်ထပ်ခြေလှမ်းကို ဦးစားပေးဖို့ စီစဉ်နေတာပါ။
အသင်းပေါင်း(၃၂)သင်းနဲ့ ပထမဆုံးအကြိမ်ကျင်းပမယ့် ဖီဖာကလပ်ကမ္ဘာ့ဖလားပြိုင်ပွဲပုံစံသစ်မှာ မန်စီးတီးအသင်းဟာ မော်ရိုကလပ် ဝီဒတ်၊ အာရှချန်ပီယံလိဂ်လက်ရှိချန်ပီယံ အယ်လ်အိန်း၊ စီးရီးအေကလပ် ဂျူဗင်တပ်စ်အသင်းတို့နဲ့ တစ်အုပ်စုတည်းကျရောက်နေပါတယ်။ မန်စီးတီးအသင်းဟာ အခုလာမယ့်ပွဲစဉ်အဖြစ် နော်တင်ဂမ်ဖောရက်စ်အသင်းနဲ့ FA ဖလားပြိုင်ပွဲဆီမီးဖိုင်နယ်ယှဉ်ပြိုင်ရမှာဖြစ်ပါတယ်။
