မနေ့က မန်ယူနိုက်တက်(၁-၁)အာဆင်နယ် ပရီးမီးယားလိဂ်ပွဲစဉ်မတိုင်ခင်မှာ ထောင်နဲ့ချီတဲ့ မန်ယူနိုက်တက်ပရိသတ်တွေဟာ အသင်းပိုင်ရှင်ဖြစ်တဲ့ ဂလေဇာမိသားစုကိုဆန့်ကျင်တဲ့ ဆန္ဒပြမှုတွေပြုလုပ်ခဲ့ပါတယ်။

The 1958 ပရိသတ်အစုအဖွဲ့ဟာ အာဆင်နယ်အသင်းနဲ့ပွဲမတိုင်ခင် မန်ယူနိုက်တက်အသင်းပိုင်ရှင်တွေကို ဆန့်ကျင်ကန့်ကွက်မယ့် သူတို့ရဲ့အစီအစဉ်ကို ပြီးခဲ့တဲ့ အင်္ဂါနေ့ကတည်းက ကြေညာခဲ့တာပါ။

ဒီပရိသတ်အစုအဖွဲ့ဟာ ကလပ်အသင်း"တဖြေးဖြေးသေဆုံး"သွားပြီဆိုတဲ့ သင်္ကေတနဲ့အနက်ရောင် ဝတ်ဆင်လာဖို့ ပရိသတ်တွေကို အသိ​ပေးခဲ့ပါတယ်။ ဒီဆန္ဒပြမှုကို The Tollgate pub ကနေ စတင်ခဲ့ပြီး ပရိသတ်တွေဟာ အိုးထရက်ဖိုဒ့်ကွင်းရှေ့ကို ချီတက်ခဲ့ကြတာပါ။ ဆန္ဒပြနေတဲ့ ပရိသတ်တွေက "ဒါက မင်းတို့ရဲ့အကြွေး၊ငါတို့ရဲ့အကြွေးမဟုတ်ဘူး"ဆိုပြီး သီကြွေးခဲ့ကြသလို မကြာသေးခင်က လက်မှတ်ဈေးနှုန်းတွေကို တိုးခဲ့တဲ့အပေါ် ပိုင်ရှင်တွေဖြစ်တဲ့ ဂလေဇာမိသားစုနဲ့ ဆာဂျင်ရက်ကလစ်ဖ်တို့ကို ရည်ရွယ်တဲ့ သီကြွေးမှုတွေကိုလည်း ပြုလုပ်ခဲ့ကြတာပါ။

ပရိသတ်အချို့ဟာ "ဂလေဇာထွက်ခွာတာကို လိုချင်တယ်"၊"ငါတို့ရဲ့ကလပ်ကို ငါတို့ပြန်လိုချင်တယ်"၊"ယူနိုက်တက်အတွက် တိုက်ပွဲဝင်ပါ၊ဂလေဇာကို တိုက်ခိုက်ပါ"ဆိုပြီး ရေးသားထားတဲ့ စာသားပါ စာတန်းတွေကို ကိုင်ဆောင်ကာ ဆန္ဒပြခဲ့ကြပါတယ်။ မန်ယူနိုက်တက်အသင်းပရိသတ်တွေဟာ ပြီးခဲ့တဲ့နှစ်တွေကလည်း ပိုင်ရှင်ဂလေဇာမိသားစုကို ဆန့်ကျင်တဲ့ ဆန္ဒပြမှုတွေပြုလုပ်ခဲ့ကြတာပါ။

မန်ယူနိုက်တက်အသင်းဟာ ဒီရာသီမှာ ရလဒ်တွေဆိုးရွားနေပြီး ပရီးမီးယားလိဂ်(၂၈)ပွဲကစားထားရာမှာ ရမှတ်(၃၄)မှတ်နဲ့ အမှတ်ပေးဇယားအဆင့်(၁၄)နေရာမှာ ရပ်တည်နေပါတယ်။ မန်ယူနိုက်တက်အသင်းဟာ ဒီရာသီမှာ ရယူနိုင်စရာဆုဖလားအဖြစ် ယူရိုပါလိဂ်ဖလားသာ ကျန်ရှိပါတယ်။