အာမိုရင်ရဲ့အနာဂတ်နဲ့ပတ်သက်ပြီး သတင်းထောက်ရဲ့မေးမြန်းမှုကို ဘရူနိုဖာနန်ဒက်စ် ကြားဖြတ်ကာဖြေဆိုခဲ့
စပါး-မန်ယူနိုက်တက် ယူရိုပါလိဂ်ဗိုလ်လုပွဲမတိုင်မီပြုလုပ်ခဲ့တဲ့ ပွဲကြိုမီဒီယာတွေ့ဆုံမှုမှာ မန်ယူနိုက်တက်အသင်းခေါင်းဆောင် ဘရူနိုဖာနန်ဒက်စ်ဟာ နည်းပြအာမိုရင်ရဲ့အနာဂတ်နဲ့ပတ်သက်ပြီး သတင်းထောက်တစ်ဦးရဲ့မေးမြန်းမှုကို ကြားဖြတ်ကာ ဝင်ရောက်ဖြေဆိုသွားခဲ့ပါတယ်။
မန်ယူနိုက်တက်အသင်းဟာ နည်းပြအာမိုရင်လက်ထက် ပရီးမီးယားလိဂ်ပြိုင်ပွဲမှာ ရလဒ်တွေဆိုးရွားနေပြီး အမှတ်ပေးဇယားအဆင့်(၁၆)နေရာမှာ ရပ်တည်နေတာပါ။
ဒါပေမယ့် မန်ယူနိုက်တက်အသင်းဟာ ယူရိုပါလိဂ်ပြိုင်ပွဲမှာ ပရီးမီးယားလိဂ်ပြိုင်ပွဲနဲ့မတူတဲ့ ရှုံးပွဲမရှိရလဒ်နဲ့ ဗိုလ်လုပွဲကို ရောက်ရှိနေပြီး ချန်ပီယံဆုကိုရရှိရင် လာမယ့်ရာသီချန်ပီယံလိဂ်ပြိုင်ပွဲ ယှဉ်ပြိုင်ခွင့်ရရှိမှာဖြစ်ပါတယ်။ မန်ယူနိုက်တက်အသင်းနဲ့အတူ ယူရိုပါလိဂ်ဗိုလ်လုပွဲယှဉ်ပြိုင်ရမယ့် စပါးအသင်းကလည်း ပရီးမီးယားလိဂ်ပြိုင်ပွဲမှာ အမှတ်ပေးဇယားအဆင့်(၁၇)နေရာရပ်တည်နေတာပါ။
ယူရိုပါလိဂ်ဗိုလ်လုပွဲအတွက် ပွဲကြိုမီဒီယာတွေ့ဆုံမှုကို မန်ယူနိုက်တက်အသင်းနည်းပြအာမိုရင်နဲ့အတူ အသင်းခေါင်းဆောင်ဘရူနိုဖာနန်ဒက်စ်၊ နောက်ခံလူမက်ဂွဲယားတို့ တက်ရောက်ခဲ့ကြပါတယ်။ ဒီအချိန်မှာ သတင်းထောက်တစ်ဦးက မန်ယူနိုက်တက်အသင်းနည်းပြအာမိုရင်ဟာ စပါးအသင်းနည်းပြပိုစတီကိုဂလူးလို တူညီတဲ့ဖိအားမျိုးရှိနေတဲပုံမပေါ်ဘူးလို့ မေးမြန်းခဲ့တာပါ။
ဒီအချိန်မှာ ဘရူနိုဖာနန်ဒက်စ်က ကြားဖြတ်ပြီး "သူ့မှာဖိအားတွေမရှိဘူးဆိုပြီး ခင်ဗျားကို ဘယ်သူပြောလဲ"လို့ ဖြေသွားခဲ့ပါတယ်။ မန်ယူနိုက်တက်အသင်းနည်းပြအာမိုရင်က ဘရူနိုဖာနန်ဒက်စ်ဟာ သူ့ရဲ့ရာထူးကိုရယူချင်နေတယ်လို့ နောက်ပြောင်ခဲ့ပါတယ်။ ပေါ်တူဂီလူမျိုးနည်းပြအာမိုရင်ဟာ မန်ယူနိုက်တက်အသင်းနည်းပြရာထူးကနေ ထုတ်ပယ်ခံရနိုင်တဲ့ ဖိအားအချို့ရှိပေမယ့် အသင်းအကြီးအကဲတွေက သူ့ဘက်ကနေ အပြည့်အဝရပ်တည်ပေးထားပါတယ်။
