အီတလီလူမျိုးနည်းပြအန်ဆယ်လော့တီက နည်းပြဘ၀မှာ ချန်ပီယံလိဂ်ချန်ပီယံဆုဖလား(၅)လုံး၊ ဖီဖာကလပ်ကမ္ဘာ့ဖလားချန်ပီယံဆု(၃)လုံးအပါအဝင် အီတလီအမှတ်ပေးဖလား၊ အင်္ဂလန်အမှတ်ပေးဖလား၊ ဂျာမန်အမှတ်ပေးဖလား၊ စပိန်အမှတ်ပေးဖလား၊ ပြင်သစ်အမှတ်ပေးဖလားအစရှိတဲ့ ဆုဖလားပေါင်းစုံကို ရယူနိုင်ခဲ့တဲ့နည်းပြတစ်ဦးပါ။

ဒါကြောင့် အောင်မြင်မှုမျိုးစုံရယူထားတဲ့ အန်ဆယ်လော့တီကို ဘောလုံးလောကမှာ အအောင်မြင်ဆုံးနည်းပြလို့ ပြောရင်မမှားနိုင်ပါဘူး။

နောက်တစ်ချိန် ဘောလုံးရာဇဝင်မှာ စာတင်ပြီး ဂန္ထဝင်နည်းပြတစ်ဦးအဖြစ် သတ်မှတ်ခံရဖို့ သေချာနေတဲ့ အန်ဆယ်လော့တီအနေနဲ့ လက်ရှိအချိန်မှာတော​့ ဖိအားတွေအောက်ကို ကျရောက်နေပြီး ရာသီကုန်ရင် ရီးရဲလ်မက်ဒရစ်အသင်းနဲ့ မလှမပ ဇာတ်သိမ်းရဖွယ်ရှိနေတဲ့အခြေအနေကို စိုက်ရောက်နေပါတယ်။

ရီးရဲလ်မက်ဒရစ်အသင်းဟာ ဒီရာသီ လာလီဂါပြိုင်ပွဲမှာ အဓိကပြိုင်ဘက် ဘာစီလိုနာအသင်းကို (၀-၄)ဂိုးနဲ့ ဂိုးပြတ်ရှုံးနိမ့်ခဲ့သလို စပိန်စူပါဖလားဗိုလ်လုပွဲမှာလည်း ဘာစီလိုနာအသင်းကို (၂-၅)ဂိုးနဲ့ ဂိုးပြတ် အရေးနိမ့်ခဲ့ပါတယ်။

လာလီဂါချန်ပီယံဆုကို ပြန်ထိန်းသိမ်းဖို့ မသေချာဘဲ လက်ရှိမှာ ဘာစီလိုနာအသင်းရဲ့ ရမှတ်(၄)မှတ်ဖြတ်ဦးဆောင်မှုကို ခံနေရပါတယ်။

အခုလည်းချန်ပီယံလိဂ်ကွာတားဖိုင်နယ်(ပထမအကျော့)မှာ အာဆင်နယ်အသင်းကို (၀-၃)ဂိုးနဲ့ အရေးနိမ့်ခဲ့တာကြောင့် လာလီဂါချန်ပီယံဆုအပြင် ချန်ပီယံလိဂ်ချန်ပီယံဆုကိုလည်း ဆုံးရှုံးရဖွယ်ရှိနေပါတယ်။

ဒါကြောင့် လက်ရှိအချိန်က နည်းပြအန်ဆယ်လော့တီအပေါ်ဖိအားတွေ တိုးနေချိန်ဖြစ်ပြီး ရာသီကုန်ရင် အသင်းကထွက်ခွာရဖို့ ပိုမိုနီးစပ်လာပြီလို့လည်း သတင်းတွေက ဖော်ပြကြပါတယ်။

အစကတည်းက အန်ဆယ်လော့တီကို လာမယ့်နွေရာသီမှာ ဘရာဇီးလ်ဘောလုံးအဖွဲ့ချုပ်က ဘရာဇီးလ်အသင်းနည်းပြအဖြစ် ခန့်အပ်ဖို့ ချဉ်းကပ်နေတာကြောင့် ရီးရဲလ်မက်ဒရစ်အသင်းနဲ့ သူ့ရဲ့လမ်းခွဲက မထူးဆန်းပေမယ့် ကျရှုံးတဲ့ရာသီတစ်ခုရဲ့အဆုံးသတ်မှာ မလှမပလမ်းခွဲခြင်း ဖြစ်လာမလားဆိုတာ စိုးရိမ်စရာဖြစ်ပါတယ်။

ဒါ့အပြင် အာဆင်နယ်(၃-၀)ရီးရဲလ်မက်ဒရစ်ပွဲမှာ ကွင်းဘေးစည်း Technical Area ထဲကနေ ညွှန်ကြားချက်ပေးနေတဲ့အန်ဆယ်လော့တီရဲ့စကားကို ကွင်းလယ်လူ ဘယ်လင်ဂမ်က လက်မခံလိုတဲ့ အပြုအမူပြခဲ့တာကလည်း ကစားသမားတွေအပေါ် သူ့ရဲ့ဩဇာညောင်းမှုက မေးခွန်းထုတ်စရာဖြစ်လာပါတယ်။

ဂိုးပြတ်ရလဒ်တွေ ကြုံတွေ့ရတာများလာတော့ နည်းပြရဲ့နည်းစနစ်တွေအပေါ် ကစားသမားတွေက အယုံအကြည်နည်းလာတာလား ... ကြောင်အိုတော့ ကြွက်မလေး ဖြစ်လာတာလားဆိုတာ တွေးစရာပါပဲ။

ဘောလုံးလောကရဲ့အအောင်မြင်ဆုံးနည်းပြတစ်ဦးအတွက် အဆုံးသတ်မလှတဲ့ လမ်းခွဲချိန်တစ်ခုရောက်လာမလား ... ရှောင်လွှဲနိုင်မလားဆိုတာကတော့ ဆက်ကြည့်ရမှာပါပဲ။