အစ်ဝစ်ချ်အသင်းတိုက်စစ်မှူးဒီလပ်နဲ့ မန်ယူနိုက်တက်အသင်းမျက်နှာချင်းဆိုင်ဆွေးနွေးမှုပြုလုပ်
လာမယ့်နွေရာသီအပြောင်းအရွှေ့မှာ တိုက်စစ်မှူးသစ်ခေါ်ယူဖို့ ပစ်မှတ်ထားနေတဲ့ မန်ယူနိုက်တက်အသင်းဟာ အစ်ဝစ်ချ်အသင်းတိုက်စစ်မှူးဒီလပ်နဲ့ အပြောင်းအရွှေ့အတွက် မျက်နှာချင်းဆိုင်ဆွေးနွေးမှုပြုလုပ်နေပါတယ်။ မန်ယူနိုက်တက်အသင်းဟာ ဒီရာသီပရီးမီးယားလိဂ်ပွဲစဉ်(၃၇)ပွဲကစားအပြီးမှာ (၄၂)ဂိုးသာသွင်းယူထားနိုင်တာကြောင့် ပေါ်တူဂီလူမျိုးနည်းပြအာမိုရင်ဟာ တိုက်စစ်ပိုင်းကို ပိုပြီးအားကောင်းအောင်ပြုလုပ်ဖို့ ဆန္ဒရှိနေတာပါ။
မန်ယူနိုက်တက်အသင်းဟာ ဝုလ်ဗ်စ်အသင်းကြယ်ပွင့်ကွန်ညာကို ခေါ်ယူနိုင်ဖို့ နီးစပ်နေပြီလို့ သတင်းတွေအများအပြားက ဖော်ပြခဲ့ပြီးနောက် ဒီလပ်ကို ခေါ်ယူနိုင်ဖို့ပါ ကြိုးစားနေတာဖြစ်ပါတယ်။ အစ်ဝစ်ချ်အသင်းဟာ ပရီးမီးယားလိဂ်ပြိုင်ပွဲကတန်းဆင်းခဲ့တာကြောင့် မန်ယူနိုက်တက်အသင်းဟာ ဒီလပ်ကို စာချုပ်ဖျက်သိမ်းကြေး(Release Clause)ပေါင်သန်း(၃၀)နဲ့ ခေါ်ယူလို့ရရှိနိုင်တာပါ။
အစ်ဝစ်ချ်အသင်းဟာ ဒီလပ်ကို မန်ယူနိုက်တက်အသင်းနဲ့ ဆွေးနွေးမှုပြုလုပ်ဖို့ ခွင့်ပြုထားပြီး ဒီလပ်ဟာ သူ့အနာဂတ်ကို မဆုံးဖြတ်မီ အခြားရွေးချယ်မှုတွေကိုလည်း စဉ်းစားနိုင်တာဖြစ်ပါတယ်။ ဒီလပ်ဟာ ဒီရာသီမှာ အစ်ဝှစ်ချ်အသင်းအတွက် လိဂ်(၃၅)ပွဲပါဝင်ကစားထားပြီး (၁၂)ဂိုးသွင်းယူထားကာ သူ့ကိုခေါ်ယူဖို့ ချယ်လ်ဆီးအသင်းကလည်း စိတ်ဝင်စားနေတာပါ။
မန်ယူနိုက်တက်အသင်းဟာ ဘရန်ဖိုဒ့်အသင်းတိုက်စစ်မှူးအမ်ဘူမို၊စပို့တင်းလစ္စဘွန်းအသင်းတိုက်စစ်မှူး ယောကရက်စ်တို့ကိုလည်း သူတို့ရဲ့တိုက်စစ်ပစ်မှတ်စာရင်းထဲမှာ ထည့်သွင်းထားပါတယ်။
မန်ယူနိုက်တက်အသင်းဟာ လက်ရှိအချိန်မှာ စပါးအသင်းနဲ့ ယှဉ်ပြိုင်ရမယ့် ယူရိုပါလိဂ်ဗိုလ်လုပွဲကို အာရုံစိုက်နေပြီး ဒီပွဲပြီးရင် ပရီးမီးယားလိဂ်ရာသီပိတ်နောက်ဆုံးပွဲစဉ်အဖြစ် အက်စတွန်ဗီလာအသင်းကို အိမ်ကွင်းလက်ခံယှဉ်ပြိုင်ရမှာဖြစ်ပါတယ်။
