ACL ဒဏ်ရာရရှိခဲ့ပြီးနောက် (၇)လအကြာမှာ မန်စီးတီးအသင်းနဲ့ ရိုဒရီ လေ့ကျင့်ခန်းပြန်ဆင်း
မန်စီးတီးအသင်းကြယ်ပွင့်နဲ့ Ballon d'Or ဆုရှင် ရိုဒရီဟာ ဒူး(ACL)ဒဏ်ရာရရှိခဲ့ပြီးနောက် (၇)လအကြာမှာ ဒဏ်ရာကနေ ပြန်လည်သက်သာလာပြီဖြစ်လို့ အသင်းနဲ့ လေ့ကျင့်ခန်းပြန်ဆင်းခဲ့ပါတယ်။
စပိန်ကွင်းလယ်လူ ရိုဒရီဟာ ဒီရာသီမကုန်မီမှာ မန်စီးတီးအသင်းအတွက် ပြန်ပါဝင်ကစားနိုင်ဖို့ ပစ်မှတ်ထားနေတာပါ။
ရိုဒရီဟာ ပြီးခဲ့တဲ့နှစ်၊စက်တင်ဘာက မန်စီးတီးအသင်းနဲ့ အာဆင်နယ်အသင်းတို့(၂-၂)ဂိုးစီသရေကျခဲ့တဲ့ ပရီးမီးယားလိဂ်ပွဲစဉ်မှာ ဒူး(ACL)ဒဏ်ရာရရှိခဲ့တာကြောင့် ရာသီကုန်အထိ အနားယူရမယ်လို့ အားလုံးက ခန့်မှန်းထားကြတာဖြစ်ပါတယ်။ ဒါပေမယ့် မန်စီးတီးအသင်းဟာ ချန်ပီယံလိဂ် play-offs ပွဲတွေမတိုင်မီ အသင်းရဲ့လူစာရင်းထဲမှာ ရိုဒရီကို ထည့်သွင်းခဲ့ပြီး ရာသီမကုန်ခင်မှာ သူ့ကိုအသုံးပြုလို့ရနိုင်ဖို့ မျှော်လင့်ခဲ့တာပါ။
အခုအချိန်မှာတော့ ရိုဒရီဟာ မန်စီးတီးအသင်းရဲ့လေ့ကျင့်ရေးကွင်းကို ပြန်လည်ရောက်ရှိပြီး လေ့ကျင့်မှုတွေပြုလုပ်နေတာကို Sky Sports က မျှဝေထားတဲ့ ရုပ်သံမှာ မြင်တွေ့ခဲ့ရတာဖြစ်ပါတယ်။ ရိုဒရီဟာ ပွဲတွေပြန်ကစားနိုင်ဖို့အတွက် နောက်ထပ်ခြေလှမ်းကို လှမ်းနိုင်ခဲ့ပြီး အသင်းဖော်တွေနဲ့အတူ မြက်ခင်းပြင်ပေါ်မှာ ဘောလုံးကန်နေတဲ့ လေ့ကျင့်ခန်းကို ပြုလုပ်နေခဲ့တာပါ။
မန်စီးတီးအသင်းဟာ ရိုဒရီကို ကာလရှည်ကြာလက်လွှတ်ခဲ့ရပြီးနောက် ဒီရာသီမှာ ရလဒ်တွေအလွန်ဆိုးရွားခဲ့တာဖြစ်ပါတယ်။ မန်စီးတီးအသင်းဟာ ဒီရာသီပရီးမီးယားလိဂ်ပွဲတွေကစားဖို့ (၄)ပွဲသာကျန်ရှိတော့ပြီး FA ဖလားဗိုလ်လုပွဲအဖြစ် မေ(၁၇)ရက်မှာ ခရစ္စတယ်ပဲလေ့စ်အသင်းနဲ့ယှဉ်ပြိုင်ရမှာပါ။ ရိုဒရီအနေနဲ့ ဒီရာသီပရီးမီးယားလိဂ်လက်ကျန်ပွဲတွေအပြင် FA ဖလားဗိုလ်လုပွဲမှာ မန်စီးတီးအသင်းအတွက် ပြန်လည်ပါဝင်လာနိုင်တာဖြစ်ပါတယ်။
