အက်စတွန်ဗီလာ-စပါးပွဲအပြီးမှာ အက်စတွန်ဗီလာအသင်းပရိသတ်တွေကို ဂိုးသမားမာတီနက်ဇ် ငိုကြွေးပြီးနှုတ်ဆက်
အက်စတွန်ဗီလာအသင်းက စပါးအသင်းကို (၂-ဝ)ဂိုးနဲ့ အနိုင်ရခဲ့တဲ့ ဒီရာသီပရီးမီးယားလိဂ်အိမ်ကွင်းနောက်ဆုံးပွဲအပြီးမှာ အာဂျင်တီးနားဂိုးသမား အီမီလီယာနိုမာတီနက်ဇ်ဟာ အက်စတွန်ဗီလာအသင်းပရိသတ်တွေကို ငိုကြွေးပြီး လက်ကိုဝှေ့ယမ်းကာ နှုတ်ဆက်မှုတွေပြုလုပ်သွားခဲ့ပါတယ်။ အက်စတွန်ဗီလာအသင်းဟာ အီမီလီယာနိုမာတီနက်ဇ်ggကို လာမယ့်နွေရာသီအပြောင်းအရွှေ့ကာလမှာ ရောင်းချသွားဖွယ်ရှိနေတယ်လို့ သတင်းတွေထွက်ပေါ်နေတာပါ။
အက်စတွန်ဗီလာအသင်းဟာ ပရီးမီးယားလိဂ်ရဲ့အသုံးစရိတ်စည်းမျဉ်းနဲ့ ကိုက်ညီစေဖို့ ကြိုးပမ်းတဲ့အနေနဲ့ ဇွန်(၃၀)ရက်မတိုင်မီမှာ ကြီးကြီးမားမားရောင်းချရဖွယ်ရှိနေတာဖြစ်ပါတယ်။ အဲ့ဒါကြောင့် အက်စတွန်ဗီလာအသင်းဟာ အီမီလီယာနိုမာတီနက်ဇ်အတွက် ကမ်းလှမ်းမှုတွေကို စဉ်းစားသွားဖို့ရှိနေတာပါ။ အီမီလီယာနိုမာတီနက်ဇ်ကို ခေါ်ယူဖို့ ဆော်ဒီပရိုလိဂ်ကလပ်အသင်းတွေက ချိတ်ဆက်မှုတွေပြုလုပ်နေတာဖြစ်ပါတယ်။
အီမီလီယာနိုမာတီနက်ဇ်ရဲ့အနာဂတ်နဲ့ပတ်သက်ပြီး မေးမြန်းချိန်မှာ အက်စတွန်ဗီလာအသင်းနည်းပြအူနှိုင်းအမ်မရီက "ဒါက ဒီရာသီရဲ့နောက်ဆုံးပွဲဖြစ်ပြီး ကျွန်တော်လည်းမသိပါဘူး။ အသင်း၊ကစားသမားတွေနဲ့ ပတ်သက်ပြီး ကျွန်တော်တို့မြင်တွေ့ရမှာဖြစ်ပေမယ့် သူတို့ဟာ ကွင်းထဲမှာပဲ တုံ့ပြန်နေကြတာပါ"လို့ ဆိုခဲ့ပါတယ်။
အာဂျင်တီးနားအသင်းနဲ့ ၂၀၂၂ ကမ္ဘာ့ဖလားချန်ပီယံဆုရယူနိုင်ခဲ့ပြီး ဖီဖာရဲ့အကောင်းဆုံးဂိုးသမားဆုကို(၂)ကြိမ်ရယူထားတဲ့ အီမီလီယာနိုမာတီနက်ဇ်ဟာ အက်စတွန်ဗီလာအသင်းအတွက် ပွဲပေါင်း(၂၀၀)ကျော်ပါဝင်ကစားထားတာပါ။ အက်စတွန်ဗီလာအသင်းရဲ့တောင်ပံကစားသမား ဘိုင်လေလည်း ပွဲအပြီးမှာ အီမီလီယာနိုမာတီနက်ဇ်လို ပရိသတ်တွေကို နှုတ်ဆက်မှုပြုလုပ်သွားခဲ့တာဖြစ်ပါတယ်။
