အင်္ဂလန်ဘောလုံးအားကစားကလောင်ရှင်များအဖွဲ့ (FWA)ရဲ့ အကောင်းဆုံးဘောလုံးသမားဆု ဆွတ်ခူးခဲ့တဲ့ဆာလာ
အင်္ဂလန်ဘောလုံးအားကစားကလောင်ရှင်များအဖွဲ့ (FWA)ရဲ့ တစ်နှစ်တာအကောင်းဆုံးဘောလုံးသမားဆုကို လီဗာပူးလ်တိုက်စစ်မှူးဆာလာက ဆွတ်ခူးခဲ့ပါတယ်။
ဘောလုံးအားကစားကလောင်ရှင်တွေက မဲပေးရွေးချယ်တဲ့ဒီဆုကို ဆာလာဟာ ဒီဆုကို မဲရာခိုင်နှုန်း(၉၀%)ကျော်ရရှိပြီး ဆွတ်ခူးခဲ့တာဖြစ်ကြောင်းသိရပါတယ်။
မဲရာခိုင်နှုန်းတွေအရ ဒုတိယနေရာမှာ ဆာလာရဲ့လီဗာပူးလ်အသင်းဖော်ဗန်ဒိုက်၊ တတိယနေရာမှာ နယူးကာဆယ်တိုက်စစ်မှူးအစ်ဆက်တို့ ရှိနေကြောင်းသိရပါတယ်။
ဆာလာအနေနဲ့ ဒီဆုကို ၂၀၁၇-၁၈ ရာသီ၊ ၂၀၂၁-၂၂ ရာသီတွေမှာလည်း ဆွတ်ခူးခဲ့ဖူးတာကြောင့် (၃)ကြိမ်မြောက် ဆွတ်ခူးခဲ့တာဖြစ်ပါတယ်။ ၁၉၄၈ ခုနှစ်ကတည်းက နှစ်စဉ် ချီးမြှင့်နေတဲ့ အစဉ်အလာရှိတဲ့ဒီဆုကို အကြိမ်အများဆုံးဆွတ်ခူးသူအဖြစ် စံချိန်တင်ထားတာက အာဆင်နယ်တိုက်စစ်မှူးဟောင်းအွန်နရီဖြစ်ပြီး အခုဆာလာက သူ့ရဲ့စံချိန်ကို လိုက်မီခဲ့ပါတယ်။
ဆာလာဟာ ဒီရာသီမှာ လီဗာပူးလ်အသင်းအတွက် (၂၈)ဂိုးအပါအဝင် ပြိုင်ပွဲစုံမှာ (၃၃)ဂိုးသွင်းယူပြီး (၂၃)ဂိုးဖန်တီးထားတာကြောင့် သူ့ရဲ့ကစားသမားဘ၀မှာ ဒုတိယဂိုးအများဆုံးသွင်းတဲ့ ရာသီအဖြစ်လည်း မှတ်တမ်းဝင်နေပါတယ်။
လီဗာပူးလ်အသင်းဒီရာသီ ပရီးမီးယားလိဂ်ချန်ပီယံအဖြစ် အောင်ပွဲခံခဲ့ရာမှာ ဆာလာရဲ့စွမ်းဆောင်မှုတွေက အဓိကကျခဲ့တာကြောင့် ဒီဆုကို ဆွတ်ခူးခဲ့တာဖြစ်ပါတယ်။
FWA ရဲ့ တစ်နှစ်တာအကောင်းဆုံးဘောလုံးသမားဆုကို နောက်ဆုံး(၈)နှစ်အတွင်း ဆွတ်ခူးခဲ့သူတွေက လီဗာပူးလ်နဲ့ မန်စီးတီးအသင်းက ကစားသမားတွေသာဖြစ်ကြပြီး လီဗာပူးလ်အသင်းက ကစားသမားတွေက (၁၆)ကြိမ်နဲ့ အကြိမ်အများဆုံးဆွတ်ခူးထားကြပါတယ်။ ဒုတိယနေရာမှာတော့ မန်ယူနိုက်တက်နဲ့ စပါးတို့က (၉)ကြိမ်စီနဲ့ ရပ်တည်နေပါတယ်။