ချန်ပီယံလိဂ် Round of 16 (ဒုတိယအကျော့)ပွဲစဉ်တွေမတိုင်မီ ပြိုင်ပွဲဝင်အသင်းတွေအနေနဲ့ ကွာတားဖိုင်နယ်တက်ဖို့ ဘယ်လောက်အထိ အခွင့်အလမ်းရှိတယ်ဆိုတာကို ဘောလုံးအချက်အလက်ဝက်ဘ်ဆိုက်ဖြစ်တဲ့ Opta က အစဉ်အလာမပျက် တွက်ချက်ဖော်ပြခဲ့ပါတယ်။

Opta ရဲ့တွက်ချက်မှုမှာ အင်္ဂလန်ကလပ်အသင်းတွေဖြစ်တဲ့ အာဆင်နယ်၊ အက်စတွန်ဗီလာ၊ လီဗာပူးလ်အသင်းတွေနဲ့ ဥရောပအသင်းကြီးတွေဖြစ်တဲ့ အင်တာမီလန်၊ ဘိုင်ယန်မြူးနစ်၊ ဘာစီလိုနာအသင်းတွေက ကွာတားဖိုင်နယ်တက်ဖို့ ဖြစ်နိုင်ခြေ (၇၅%)နဲ့အထက် ရှိနေတာကို တွေ့ရပါတယ်။

ပထမအကျော့မှာတုန်းက နယ်သာလန်ကလပ် PSV အသင်းကို အဝေးကွင်းမှာ (၇-၁)ဂိုးနဲ့ အနိုင်ယူခဲ့တဲ့ အာဆင်နယ်အသင်းက ကွာတားဖိုင်နယ်တက်ဖို့ အသေချာဆုံးအသင်းအဖြစ် (၁၀၀%)သတ်မှတ်ခံထားရပါတယ်။

ဘယ်လ်ဂျီယံကလပ် ကလပ်ဘရုဂျက်အသင်းကို အဝေးကွင်းမှာ (၃-၁)ဂိုးနဲ့အနိုင်ယူခဲ့တဲ့ ဗီလာအသင်းက (၉၄%)၊ ပြင်သစ်ကလပ် PSG အသင်းကို အဝေးကွင်းမှာ (၁-၀)ဂိုးနဲ့အနိုင်ယူခဲ့တဲ့ လီဗာပူးလ်အသင်းက (၇၅%)သတ်မှတ်ခံထားရပါတယ်။

ဖီယင်နုအသင်းကို အဝေးကွင်းမှာ (၂-၀)ဂိုးရလဒ်နဲ့ အနိုင်ယူခဲ့တဲ့ အင်တာမီလန်အသင်းက (၉၇%)၊ လေဗာကူဆင်အသင်းကို အိမ်ကွင်းမှာ (၃-၀)ဂိုးရလဒ်နဲ့ အနိုင်ယူခဲ့တဲ့ ဘိုင်ယန်မြူးနစ်အသင်းက (၉၆%)၊ ဘင်ဖီကာအသင်းကို အဝေးကွင်းမှာ (၁-၀)ဂိုးရလဒ်နဲ့ အနိုင်ယူခဲ့တဲ့ ဘာစီလိုနာအသင်းက (၈၉%) အသီးသီး သတ်မှတ်ခံထားရပါတယ်။

Round of 16 ပွဲစဉ်တွေထဲမှာ အနိုင်အရှုံးမပေါ်ခဲ့တဲ့ တစ်ခုတည်းသော အတွဲအဖက်ဖြစ်တဲ့ လိုင်လီ-ဒေါ့မွန်ပွဲမှာတော့ Opta က လိုင်လီကို (၄၉%)၊ ဒေါ့မွန်ကို (၅၁%) သတ်မှတ်ခဲ့ပါတယ်။ ဒီနှစ်သင်းက ပထမအကျော့ တုန်းက ဂျာမန်မြေမှာ (၁-၁)ဂိုးနဲ့ သရေကျခဲ့ကြတာပါ။

မက်ဒရစ်ဒါဘီနှစ်သင်းရဲ့ဖြစ်နိုင်ခြေမှာတော့ ပထမအကျော့ အိမ်ကွင်းမှာ (၂-၁)ဂိုးနဲ့ အနိုင်ရခဲ့တဲ့ ရီးရဲလ်မက်ဒရစ်အသင်းက ဖြစ်နိုင်ခြေ (၇၂%)၊ အက်သလလက်တီကိုအသင်းက ဖြစ်နိုင်ခြေ (၂၈%) သတ်မှတ်ခံခဲ့ရပါတယ်။

ပထမအကျော့ရလဒ်တွေနဲ့ Opta ရဲ့ခန့်မှန်းချက်တွေအရ ကွာတားဖိုင်နယ်ကို အသင်းကြီးအတော်များများတက်ရောက်လာမယ့် အလားအလာတွေတွေ့နေရပြီး ပိုမိုခက်ခဲကြမ်းတမ်းပြီး အကြိတ်အနယ်ရှိမယ့်ပွဲတွေကို ပရိသတ်တွေ ဆက်ပြီးရှုစားရဖို့ သေချာနေပါတယ်။