အဖေစီရော်နယ်ဒိုခြေရာနင်းတော့မယ့် သားစီရော်နယ်ဒိုဂျူနီယာ
လွန်ခဲ့တဲ့ (၂၄)နှစ်ကျော်ဖြစ်တဲ့ ၂၀၀၁ ခုနှစ် ဖေဖော်ဝါရီ(၂၄)ရက်မှာ ပေါ်တူဂီယူ-၁၅ အသင်းရဲ့ကစားသမားတစ်ဦးအဖြစ် စပို့တင်းလစ္စဘွန်းအသင်းရဲ့လူငယ်ကစားသမားစီရော်နယ်ဒိုကရွေးချယ်ခံခဲ့ရပါတယ်။
တောင်အာဖရိက ယူ-၁၅ အသင်းနဲ့ ပေါ်တူဂီ ယူ-၁၅ အသင်းတို့ ကစားခဲ့တဲ့ပွဲမှာ ပေါ်တူဂီ ယူ-၁၅ အသင်းအတွက် ပွဲဦးထွက်ကစားခွင့်ရတဲ့ စီရော်နယ်ဒိုက အဖွင့်ပွဲမှာပဲ အဖိုးတန် အနိုင်ဂိုးတစ်ဂိုးကို သွင်းယူပေးနိုင်ခဲ့ပါတယ်။
နောင်(၂၄)နှစ်အကြာ အခု ၂၀၂၅ ခုနှစ် မေလမှာတော့ စီရော်နယ်ဒိုရဲ့သားဖြစ်သူ စီရော်နယ်ဒိုဂျူနီယာက ပေါ်တူဂီယူ-၁၅ အသင်းမှာ ပထမဆုံးရွေးချယ်ခံခဲ့ရပါတယ်။
လာမယ့် မေ(၁၃)ရက်နေ့ကနေ (၁၈)ရက်နေ့အထိ ခရိုအေးရှားနိုင်ငံမှာ ကစားမယ့် Vlatko Markovic နိုင်ငံတကာယူ-၁၅ ဖိတ်ခေါ်ပြိုင်ပွဲမှာ ပေါ်တူဂီယူ-၁၅ အသင်းက ပါဝင်ယှဉ်ပြိုင်မှာဖြစ်ပြီး ဒီပြိုင်ပွဲမှာ စီရော်နယ်ဒိုဂျူနီယာက ပေါ်တူဂီနိုင်ငံကို ကိုယ်စားပြုပြီး ပထမဆုံးကစားခွင့်ရရှိတော့မှာဖြစ်ပါတယ်။
စီရော်နယ်ဒိုဂျူနီယာဟာ လက်ရှိမှာ သူ့ဖခင်ကစားနေတဲ့ အယ်လ်နာဆာအသင်းရဲ့ လူငယ်အကယ်ဒမီအသင်းမှာ ကစားသမားတစ်ဦးအဖြစ် ကစားနေပြီး ခြေစွမ်းပြနေသူဖြစ်ပါတယ်။ ဒါကြောင့် အသက်(၁၄)နှစ်အရွယ် သားဖြစ်သူ စီရော်နယ်ဒိုဂျူနီယာနဲ့ အသက်(၄၀)အရွယ် ဖခင်ဖြစ်သူ စီရော်နယ်ဒိုတို့ တစ်နေ့နေ့တစ်ချိန်ချိန် ပရော်ဖက်ရှင်နယ်ဘောလုံးလောကမှာ အသင်းတစ်သင်းတည်း အတူကစားတာတွေ့မြင်ရဖွယ်ရှိတယ်လို့ သုံးသပ်ဝေဖန်မှုတွေရှိနေစဉ်မှာပဲ စီရော်နယ်ဒိုဂျူနီယာဟာ ပေါ်တူဂီယူ-၁၅ အသင်းမှာ ကစားဖို့ ရွေးချယ်ခံခဲ့ရတာပါ။
စီရော်နယ်ဒိုဂျူနီယာအနေနဲ့ ပေါ်တူဂီယူ-၁၅ အသင်းအတွက် ပထမဆုံးပွဲဦးထွက်မှာ သူ့အဖေလို ဂိုးသွင်းနိုင်မလားဆိုတာလည်း Vlatko Markovic နိုင်ငံတကာလူငယ်ဖိတ်ခေါ်ပြိုင်ပွဲမှာ စောင့်ကြည့်ရမှာပါ။
