ဘာစီလိုနာယူ-၁၉ အသင်းလို တန်ဖိုးအမြင့်ဆုံးဖလား(၃)လုံးကို ဘာစီလိုနာအမျိုးသား/အမျိုးသမီးအသင်းတွေရယူနိုင်မလား
ဘာစီလိုနာအသင်းရဲ့ ဘရာဇီးလ်ညာနောက်ခံလူဟောင်း ဘယ်လက်တီကိုင်တွယ်နေတဲ့ ဘာစီလိုနာယူ-၁၉ လူငယ်အသင်းက ဒီရာသီမှာဖလား(၃)လုံးချန်ပီယံအဖြစ် အောင်ပွဲခံနိုင်ခဲ့ပြီး သမိုင်းမှတ်တိုင်သစ်တစ်ခုရေးထိုးနိုင်ခဲ့ပါတယ်။
ဘာစီလိုနာယူ-၁၉ အသင်းဟာ ဒီရာသီ စပိန်လူငယ်အမှတ်ပေးပြိုင်ပွဲ(Division de Honor)၊ စပိန်ဘုရင့်ဖလားလူငယ်ပြိုင်ပွဲ(Copa del Rey Juvenil de Futbol)၊ ဥရောပလူငယ်လိဂ်ပြိုင်ပွဲ(UEFA Youth League) တွေမှာ ချန်ပီယံဆုတွေ ရယူနိုင်ခဲ့တာပါ။
စပိန်ဘုရင့်ဖလားလူငယ်ပြိုင်ပွဲဗိုလ်လုပွဲမှာ ဇာရာဂိုဇာအသင်းကို (၅-၀)ဂိုးနဲ့ ဂိုးပြတ်အနိုင်ယူခဲ့သလို၊ ဥရောပလူငယ်လိဂ်ဗိုလ်လုပွဲမှာ ထရာဇွန်စပေါ်လူငယ်အသင်းကို (၄-၁)ဂိုးနဲ့အနိုင်ယူဗိုလ်စွဲခဲ့တာပါ။
ဘယ်လက်တီရဲ့လူငယ် ယူ-၁၉ အသင်းက ဒီရာသီမှာ တန်ဖိုးအမြင့်ဆုံးဖလား(၃)လုံးကို ရယူနိုင်ခဲ့သလို ဘာစီလိုနာအသင်းကြီး (အမျိုးသားအသင်း)နဲ့ ဘာစီလိုနာအမျိုးသမီးအသင်း(FC Barcelona Femení)တို့ကလည်း တန်ဖိုးအမြင့်ဆုံးဖလား(၃)လုံးချန်ပီယံအဖြစ် အောင်ပွဲခံနိုင်မယ့်လမ်းကြောင်းပေါ်မှာရှိနေပါတယ်။
ဘာစီလိုနာအသင်းက လာလီဂါပြိုင်ပွဲမှာ ရီးရဲလ်မက်ဒရစ်အသင်းကို ရမှတ်(၄)မှတ်ဖြတ်ပြီး ထိပ်ဆုံးကဦးဆောင်နေသလို၊ ချန်ပီယံလိဂ်ပြိုင်ပွဲမှာလည်း ဆီမီးဖိုင်နယ်အဆင့်ကို တက်ရောက်နေပြီး ပထမအကျော့မှာ အင်တာမီလန်နဲ့(၃-၃)ဂိုးစီသရေကျထားပါတယ်။ ဘာစီလိုနာအသင်းဟာ ဒီရာသီမှာ စပိန်ဘုရင့်ဖလားချန်ပီယံဆုကို ရယူထားပြီး ကျန်ဖလား(၂)လုံးရဖို့သာကြိုးစားရမှာပါ။
ဘာစီလိုနာအမျိုးသမီးအသင်းကလည်း အမှတ်ပေးပြိုင်ပွဲ (Liga F) မှာ ဘာစီလိုနာအမျိုးသားအသင်းလိုပဲ ရီးရဲလ်မက်ဒရစ်အသင်းကို ရမှတ်(၄)မှတ်ဖြတ်ဦးဆောင်နေပြီး စပိန်အမျိုးသမီးရှုံးထွက်ဖလားပြိုင်ပွဲ(Copa de la Reina)နဲ့ ဥရောပအမျိုးသမီးချန်ပီယံလိဂ်ပြိုင်ပွဲ(UEFA Women's Champions League)မှာဗိုလ်လုပွဲတွေကို တက်ရောက်နေပါတယ်။
ဘာစီလိုနာအမျိုးသမီးအသင်းဟာ စပိန်အမျိုးသမီးရှုံးထွက်ဖလားဗိုလ်လုပွဲမှာ အက်သလက်တီကိုအမျိုးသမီးအသင်း၊ ဥရောပအမျိုးသမီးချန်ပီယံလိဂ်ဗိုလ်လုပွဲမှာ အာဆင်နယ်အမျိုးသမီးအသင်းတို့နဲ့ ရင်ဆိုင်ရမှာပါ။
ဒါကြောင့် ဘာစီလိုနာအမျိုးသား၊ အမျိုးသမီးအသင်းတွေအနေနဲ့ ဒီရာသီမှာ တန်ဖိုးအမြင့်ဆုံးဖလား(၃)လုံးကို ရယူပြီး ဘာစီလိုနာယူ-၁၉ အသင်းလို ဖလား(၃)လုံးချန်ပီယံအဖြစ်အောင်ပွဲခံနိုင်မလားဆိုတာ လက်ကျန်ပွဲအနည်းငယ်မှာ အဖြေထွက်ပေါ်လာမှာပါ။ တကယ်လို့ (၃)သင်းစလုံး တန်ဖိုးအမြင့်ဆုံးဖလား(၃)လုံးစီနဲ့ အောင်ပွဲခံနိုင်ခဲ့ရင်တော့ ဘာစီလိုနာအသင်းသမိုင်းမှာ တစ်ကြိမ်တစ်ခါမှမရှိဖူးတဲ့ Treble (၃)သင်းအောင်ပွဲအဖြစ် မော်ကွန်းသစ်ရေးထိုးမှာဖြစ်ပါတယ်။
