ဘိုင်ယန်မြူးနစ်အသင်း ဘွန်ဒစ်လီဂါဖလားရယူနိုင်မယ့်ပွဲကို ဟာရီကိန်းပွဲပယ်ကြောင့် လွဲချော်
ဘိုင်ယန်မြူးနစ်အသင်းက မိန့်ဇ်အသင်းကို (၃-ဝ)ဂိုးနဲ့အနိုင်ရခဲ့တဲ့ ဘွန်ဒစ်လီဂါပွဲစဉ်မှာ အဝါကတ်ပြခံခဲ့ရတဲ့ အင်္ဂလန်တိုက်စစ်မှူးဟာရီကိန်းဟာ ဘိုင်ယန်မြူးနစ်အသင်းအမှတ်ပေးဖလားရယူနိုင်မယ့် လာမယ့်ပွဲကို ပွဲပယ်ပြစ်ဒဏ်ကြောင့် လွဲချော်ခဲ့ပါတယ်။
ဟာရီကိန်းဟာ ဒီရာသီဘွန်ဒစ်လီဂါပြိုင်ပွဲမှာ အဝါကတ်ပြသခံရတာ(၅)ကြိမ်ပြည့်သွားခဲ့တဲ့အတွက် လာမယ့် လိုက်ပ်ဇစ်အသင်းနဲ့ပွဲစဉ်မှာ ဘိုင်ယန်မြူးနစ်အသင်းအတွက် ပါဝင်နိုင်တော့မှာမဟုတ်ပါဘူး။
ဘိုင်ယန်မြူးနစ်အသင်းဟာ လိုက်ပ်ဇစ်အသင်းနဲ့ပွဲမှာ အနိုင်ရလဒ်ရယူနိုင်တာနဲ့ ဒီရာသီ ဘွန်ဒစ်လီဂါဖလားကို ရယူဖို့ သေချာမှာဖြစ်ပါတယ်။ ဒီဆုဖလားဟာ ဟာရီကိန်းအတွက် သူ့ရဲ့ကစားသမားဘဝမှာ ပထမဆုံးဆုဖလားဖြစ်ပြီး ဆုဖလားမရရှိသေးတဲ့ ကျိန်စာဆိုးကို အဆုံးသတ်နိုင်တော့မှာပါ။ ဟာရီကိန်းဟာ ဒီရာသီဘွန်ဒစ်လီဂါပြိုင်ပွဲမှာ (၂၄)ဂိုးသွင်းယူထားပြီး ထိပ်တန်းဂိုးသွင်းရှင်အဖြစ်လည်း ရပ်တည်နေပါတယ်။
ဟာရီကိန်းဟာ ဒီရာသီဘွန်ဒစ်လီဂါပြိုင်ပွဲမှာ ဂိုးသွင်းအများဆုံးကစားသမားဆုကို ရယူနိုင်ခဲ့ရင် ဘွန်ဒစ်လီဂါပွဲဦးထွက်(၂)ရာသီမှာ ဂိုးသွင်းအများဆုံးကစားသမားဆုကို ရယူနိုင်တဲ့ ပထမဆုံးကစားသမားအဖြစ် မှတ်တမ်းရေးထိုးနိုင်မှာပါ။ ဟာရီကိန်းက လိုက်ပ်ဇစ်အသင်းနဲ့ပွဲကို လွဲချော်ရမယ့်အပေါ် စိုးရိမ်မှုမရှိဘဲ သူဟာ အခြားသူတွေထက် ပိုပြီးအောင်ပွဲခံသွားမှာလို့ ပွဲအပြီးအင်တာဗျူးမှာ ဆိုခဲ့ပါတယ်။
၂၀၂၃ ခုနှစ်နွေရာသီက စပါးအသင်းကနေ ရောက်ရှိလာခဲ့တဲ့ ဟာရီကိန်းဟာ ဘိုင်ယန်မြူးနစ်အသင်းအတွက် ပြိုင်ပွဲစုံ(၈၉)ပွဲပါဝင်ကစားထားပြီး သွင်းဂိုး(၈၀)သွင်းယူထားပါတယ်။
