ဘိုင်ယန်မြူးနစ်အသင်းနဲ့ ဘွန်ဒစ်လီဂါဖလားရယူနိုင်ခဲ့တဲ့ ဟာရီကိန်းကို မိမိဂုဏ်ပြုခဲ့တယ်လို့ ဆွန်ဟောင်မင်ဖွင့်ဟ
စပါးအသင်းခေါင်းဆောင်ဆွန်ဟောင်မင်က ဘိုင်ယန်မြူးနစ်အသင်းနဲ့ ဘွန်ဒစ်လီဂါဖလားရယူကာ ဆုဖလားမရရှိသေးတဲ့ ကျိန်စာကိုအဆုံးသတ်နိုင်ခဲ့တဲ့ အသင်းဖော်ဟောင်းဟာရီကိန်းကို သူဂုဏ်ပြုခဲ့တယ်လို့ ဖွင့်ဟခဲ့ပါတယ်။ ဟာရီကိန်းဟာ ပြီးခဲ့တဲ့ရက်ပိုင်းကမှ သူ့ရဲ့ပရော်ဖက်ရှင်နယ်ကစားသမားဘ၀ ပထမဆုံးဆုဖလားဖြစ်တဲ့ ဘွန်ဒစ်လီဂါဖလားကို ဘိုင်ယန်မြူးနစ်အသင်းနဲ့အတူ ကိုင်မြှောက်နိုင်ခဲ့တာပါ။
ဆွန်ဟောင်မင်ဟာ အင်္ဂလန်အသင်းခေါင်းဆောင်ဟာရီကိန်းနဲ့ စပါးအသင်းမှာ (၈)နှစ်ကြာအတူတွဲကစားခဲ့ပြီး ဆုဖလားအောင်မြင်မှုမရရှိခဲ့ကြတာဖြစ်ပါတယ်။ စပါးအသင်းဟာ ဒီကာလတွေမှာ ချန်ပီယံလိဂ်ဗိုလ်လုပွဲနဲ့ ကာရာဘောင်းလိဂ်ဖလားဗိုလ်လုပွဲတက်နိုင်ခဲ့ကြပေမယ့် ဒုတိယတွေနဲ့သာ ကျေနပ်ခဲ့ရတာပါ။ အခုအချိန်မှာတော့ ဟာရီကိန်းဟာ ဘိုင်ယန်မြူးနစ်အသင်းထံ ပြောင်းရွှေ့ခဲ့ပြီးနောက် ဆုဖလားရယူနိုင်ခဲ့တဲ့အတွက် ဆွန်ဟောင်မင်က ဆက်သွယ်ပြီး ဂုဏ်ပြုခဲ့တာဖြစ်ပါတယ်။
ဆွန်ဟောင်မင်က "ကျွန်တော်ဟာရီကိန်းကို စာပို့ခဲ့ပြီး သူက Video call ပြန်ခေါ်ပါတယ်။ သူပျော်နေတာကို မြင်ရတဲ့အတွက် ကျွန်တော်အလွန်ပျော်ပါတယ်။ သူဟာ ကျွန်တော့်ရဲ့အကောင်းဆုံးသူငယ်ချင်းတွေထဲက တစ်ဦးဖြစ်သလို အသင်းဖော်ဟောင်းလည်းဖြစ်တဲ့အတွက် သူပျော်နေတာကို မြင်တွေ့ရတာဝမ်းသာပါတယ်။ ဒီလိုအပေါင်းလက္ခဏာဆောင်တဲ့စွမ်းအင်နဲ့ စပါးအသင်းကို ပွဲတွေမှာ ပံ့ပိုးပေးနိုင်ဖို့မျှော်လင့်တယ်"လို့ The Guardian ကိုဆိုခဲ့ပါတယ်။
ဆွန်ဟောင်မင်အနေနဲ့လည်း ဟာရီကိန်းလိုပဲ စပါးအသင်းမှာ ဆုဖလားမရရှိသေးတာကို အဆုံးသတ်ဖို့ အခွင့်အရေးရှိနေတာပါ။ ဒါကတော့ စပါးအသင်းဟာ ယူရိုပါလိဂ်ဗိုလ်လုပွဲအဖြစ် မန်ယူနိုက်တက်အသင်းနဲ့ ယှဉ်ပြိုင်ရမှာဖြစ်ပြီး အနိုင်ရခဲ့ရင် (၁၇)နှစ်ကြာဆုဖလားရဖို့ စောင့်ဆိုင်းနေရတာကို အဆုံးသတ်နိုင်မှာဖြစ်တဲ့အပြင် လာမယ့်ရာသီချန်ပီယံလိဂ်ပြိုင်ပွဲယှဉ်ပြိုင်ခွင့်ရရှိမှာဖြစ်ပါတယ်။
