"ဘုရားပြီး ငြမ်းဖျက်"ဆိုသလို ဒန်နီယယ်ဖာ့ခ်နေရာ မော်ရင်ဟိုနဲ့ အစားထိုးဖို့ စဉ်းစားနေတဲ့လိဒ်စ်ယူနိုက်တက်

ဂျာမန်လူမျိုးနည်းပြဒန်နီယယ်ဖာ့ခ်ဟာ လိဒ်စ်ယူနိုက်တက်အသင်းကို ရာသီမကုန်ဆုံးမီမှာ ချန်ပီယံရှစ်ပြိုင်ပွဲကနေ ပရီးမီးယားလိဂ်ကို တန်းတက်အောင်ပြုလုပ်ပေးနိုင်ခဲ့ပေမယ့် အသင်းနဲ့ လမ်းခွဲရဖွယ်ရှိနေကြောင်း သိရပါတယ်။

ဒန်နီယယ်ဖာ့ခ်ဟာ ၂၀၂၃ ခုနှစ်က လိဒ်စ်အသင်း ပရီးမီးယားလိဂ်ကနေ ချန်ပီယံရှစ်ပြိုင်ပွဲကို တန်းဆင်းခဲ့ပြီးနောက် အသင်းနည်းပြအဖြစ် (၄)နှစ်စာချုပ်နဲ့ ခန့်အပ်ခံခဲ့ရသူပါ။

သူ့အနေနဲ့ (၂)ရာသီအကြာမှာပဲ လိဒ်စ်ယူနိုက်တက်အသင်းကို ပရီးမီးယားလိဂ်ပြိုင်ပွဲဆီ တန်းပြန်တက်အောင် စွမ်းဆောင်ပေးနိုင်ခဲ့သလို လက်ကျန်(၂)ပွဲမှာ အနိုင်ကစားနိုင်ခဲ့ရင် သူ့အသင်းက ဒီရာသီ ချန်ပီယံရှစ်ချန်ပီယံအဖြစ် အောင်ပွဲခံနိုင်မှာပါ။

ဒါပေမယ့် လိဒ်စ်ယူနိုက်တက်အသင်း ထိပ်တန်းတာဝန်ရှိသူတွေက ဒန်နီယယ်ဖာ့ခ်နဲ့ ပရီးမီးယားလိဂ်မှာ ဖြတ်သန်းဖို့ကို ယုံကြည်မှုကင်းမဲ့နေကြကြောင်း သိရပါတယ်။

ဒန်နီယယ်ဖာ့ခ်ဟာ နော်ဝစ်ချ်အသင်းကို ကိုင်တွယ်စဉ်အချိန်က ချန်ပီယံရှစ်ကနေ ပရီးမီးယားလိဂ်ကို တန်းတက်အောင် (၂)ကြိမ်တိုင်ပြုလုပ်ပေးနိုင်ခဲ့ပေမယ့် ပရီးမီးယားလိဂ်ပြိုင်ပွဲမှာ ရလဒ်ကောင်းရအောင် မစွမ်းဆောင်နိုင်ဘဲ သူ့ရဲ့အသင်းဟာ နောက်ရာသီတွေမှာ ပရီးမီးယားလိဂ်ကနေ ချန်ပီယံရှစ်ပြိုင်ပွဲကို တန်းပြန်ဆင်းခဲ့ရပါတယ်။

၂၀၂၁-၂၂ ရာသီပရီးမီးယားလိဂ်ပြိုင်ပွဲမှာ ဒန်နီယယ်ဖာ့ခ်ရဲ့ နော်ဝစ်ချ်အသင်းဟာ (၁၅)ပွဲဆက်တိုက်ရှုံးခဲ့ဖူးပြီး ဒါက ပရီးမီးယားလိဂ်မှာ အဆိုးရွားဆုံး ပွဲဆက်ရှုံးနိမ့်မှုစံချိန်လည်းဖြစ်ပါတယ်။

ဒါကြောင့် လိဒ်စ်ယူနိုက်တက်အသင်းတာဝန်ရှိသူတွေက ပရီးမီးယားလိဂ်မှာ ဒန်နီယယ်ဖာ့ခ်နဲ့ ဖြတ်သန်းဖို့ စိုးရိမ်မှုတွေရှိနေပြီး သူ့နေရာမှာ အစားထိုးဖို့ နည်းပြသစ်ရှာဖွေနေကြပါတယ်။ သတင်းတွေအရတော့ လက်ရှိတူရကီကလပ်ဖီနာဘာချီအသင်းကို ကိုင်တွယ်နေတဲ့ ချယ်လ်ဆီး၊ အင်တာမီလန်နဲ့ ရီးရဲလ်မက်ဒရစ်အသင်းနည်းပြဟောင်း မော်ရင်ဟိုကို လိဒ်စ်ယူနိုက်တက်အသင်းတာဝန်ရှိသူတွေက ဦးစားပေးပစ်မှတ်ထားနေကြောင်း သိရပါတယ်။

တူရကီလိဂ်မှာ ပွဲပယ်ပြစ်ဒဏ်(၂)ကြိမ်တိုင် ရင်ဆိုင်ခဲ့ရပြီး လိဂ်တာဝန်ရှိသူတွေနဲ့အစာမကြေဖြစ်နေတဲ့ မော်ရင်ဟိုကို လိဒ်စ်ယူနိုက်တက်အသင်းနဲ့အတူ ပရီးမီးယားလိဂ်မှာ ပြန်တွေ့ရမလား ...

ဒါမှမဟုတ် လိဒ်စ်အသင်းနည်းပြသစ်အဖြစ် ဘယ်နည်းပြကို တွေ့မြင်ရမလဲဆိုတာ စိတ်ဝင်စားစရာပါပဲ ...

ဘယ်လိုပဲဖြစ်ဖြစ် လိဒ်ယူနိုက်တက်အသင်းကို ပရီးမီးယားလိဂ်တန်းတက်ခွင့်ရအောင် ပြုလုပ်ပေးခဲ့တဲ့နည်းပြဒန်နီယယ်ဖာ့ခ်ကတော့ "ဘုရားပြီး ငြမ်းဖျက်"ဆိုတဲ့ စကားပုံအတိုင်း ဒီအသင်းနဲ့ လာမယ့်နွေရာသီမှာ လမ်းခွဲရဖို့ သေချာနေပါတယ်။