ဝက်စ်ဟမ်းအသင်းက နယူးကာဆယ်အသင်းကို (၀-၁)ဂိုးနဲ့ အရေးနိမ့်ခဲ့တဲ့ ပရီးမီးယားလိဂ်ပွဲစဉ်မစတင်ခင်မှာ ဆိုးရွားတဲ့ ကားတိုက်မှုကြောင့် ခြေထောက်ကျိူးခဲ့တဲ့ ဝက်စ်ဟမ်းအသင်းတိုက်စစ်မှူး အန်တိုနီယိုဟာ London Stadium ထဲကို ပထမဆုံးအကြိမ်အဖြစ် ပြန်လာနိုင်ခဲ့ပါတယ်။

အန်တိုနီယို ကွင်းထဲကို ဝင်ရောက်လာချိန်မှာ ပရိသတ်တွေဟာ သူ့ရဲ့နာမည်ကို သီဆိုခဲ့ကြသလို သူ့ရဲ့မျက်နှာပါဝင်တဲ့ ကြီးမားတဲ့ပုံကြီးတွေနဲ့ ကြိုဆိုမှုပြုလုပ်ခြင်းခံခဲ့ရတာပါ။

ဝက်စ်ဟမ်းအသင်းရဲ့ပရီးမီးယားလိဂ်စံချိန်တင်ဂိုးသွင်းရှင် အန်တိုနီယိုဟာ ပြီးခဲ့တဲ့ ဒီဇင်ဘာကဖြစ်ပျက်ခဲ့တဲ့ ဆိုးရွားတဲ့ ကားတိုက်မှုထဲမှာ ပါဝင်ခဲ့ပြီး ကံကောင်းစွာနဲ့ အသက်ရှင်ခဲ့တာဖြစ်ပါတယ်။ အန်တိုနီယိုဟာ ပြန်လည်ထူထောင်ရေးလုပ်ငန်းစဉ်တွေကို ပြုလုပ်ပြီးနောက် ပထမဆုံးအကြိမ်အဖြစ် နယူးကာဆယ်အသင်းနဲ့ ပွဲမစတင်ခင်မှာ ဝက်စ်ဟမ်းအသင်းအိမ်ကွင်းထဲ ခြေချနိုင်ခဲ့တာပါ။

အန်တိုနီယိုဟာ ပရိသတ်တွေရဲ့အားပေးသံတွေကြောင့် ပြုံးရွှင်ကာ ကွင်းထဲကို ဝင်ရောက်လာခဲ့ပြီး ပရိသတ်တွေကို လက်ခုပ်တီးမှုတွေပြုလုပ်ခဲ့သလို ဝက်စ်ဟမ်းအသင်းနည်းပြ ဂရေဟမ်ပေါ်တာနဲ့ ပွေ့ဖက်ခဲ့တာဖြစ်ပါတယ်။ အန်တိုနီယိုဟာ လက်ရှိအချိန်မှာ တစ်ဦးတည်းလေ့ကျင့်မှုတွေပြုလုပ်နေပြီး လာမယ့်လထဲမှာ ဝက်စ်ဟမ်းအသင်း‌ဖော်တွေနဲ့ လေ့ကျင့်မှုတွေပြုလုပ်ကာ ရာသီမကုန်ခင် ပြန်ကစားပေးနိုင်ဖို့ မျှော်လင့်နေတာပါ။

ဝက်စ်ဟမ်းအသင်းနည်းပြ ဂရေဟမ်ပေါ်တာက အန်တိုနီယို ပြန်ကစားနိုင်ဖို့ဟာ အလျင်စလိုပြုလုပ်ရမယ့်ကိစ္စမဟုတ်ပေမယ့် အပြုသဘောဆောင်တဲ့ အရာတွေရှိတယ်လို့ ဆိုထားပါတယ်။ ဝက်စ်ဟမ်းအသင်းဟာ ဒီရာသီမှာ ရလဒ်ပိုင်းဆိုးရွားနေပြီး ပရီးမီးယားလိဂ်ပွဲစဉ် (၂၈)ပွဲကစားအပြီးမှာ ရမှတ်(၃၃)မှတ်နဲ့ အမှတ်ပေးဇယားအဆင့်(၁၆)နေရာမှာ ရပ်တည်နေတာဖြစ်ပါတယ်။