စင်ကာပူ၏ အငြင်းပွားဖွယ် ဥပဒေသစ်

လိမ်လည်မှု တိုက်ဖျက်ရေးအတွက် ဘဏ်အကောင့်များကို ရဲတပ်ဖွဲ့က ထိန်းချုပ်မည်

စံချိန်တင်မြင့်တက်နေသည့် ငွေကြေးလိမ်လည်မှုများကို တားဆီးရန် ရည်ရွယ်သည့် အငြင်းပွားဖွယ်ရာ ဥပဒေသစ်တစ်ရပ်ကို စင်ကာပူအစိုးရက ဇူလိုင်လ ၁ ရက်နေ့တွင် စတင်အာဏာတည်စေခဲ့သည်။ ထိုဥပဒေအရ လိမ်လည်မှုခံနေရသည်ဟု သံသယရှိပါက ရဲတပ်ဖွဲ့အနေဖြင့် သက်ဆိုင်သူ၏ ဘဏ်အကောင့်များကို တိုက်ရိုက်ထိန်းချုပ်ခွင့် ရရှိမည်ဖြစ်သည်။

ဤ "လိမ်လည်မှုများမှ ကာကွယ်ရေးအက်ဥပဒေ" (Protection from Scams Act) သည် မိမိတို့ လိမ်လည်ခံနေရကြောင်း သတိပေးမှုများကို လက်မခံဘဲ ငွေဆက်လက်လွှဲပြောင်းနေသူများကို အဓိကထား ကာကွယ်ရန်ဖြစ်ကြောင်း အာဏာပိုင်များက ပြောကြားသည်။ ဤဥပဒေအရ ရဲတပ်ဖွဲ့သည် ငွေလွှဲခြင်း၊ ငွေထုတ်ခြင်းနှင့် အခြားဘဏ်ဝန်ဆောင်မှုများကို ပိတ်ပင်ရန် ဘဏ်များသို့ "ကန့်သတ်ချုပ်ချယ်ရေးအမိန့်" (Restriction Order) ထုတ်ပြန်နိုင်မည်ဖြစ်သည်။

ပြည်ထဲရေးဝန်ကြီးဌာန (MHA) က ဤအမိန့်သည် အခြားသော နည်းလမ်းများ မအောင်မြင်သည့်အခါမှသာ အသုံးပြုမည့် "နောက်ဆုံး လက်နက်" ဖြစ်သည်ဟု အလေးပေးပြောဆိုခဲ့သည်။ အမိန့်တစ်ခုသည် ရက် ၃၀ အထိ အကျိုးသက်ရောက်မည်ဖြစ်ပြီး လိုအပ်ပါက စုစုပေါင်း ၆ လအထိ သက်တမ်းတိုးနိုင်သည်။

ဤ ဆောင်ရွက်ချက်မှာ စင်ကာပူနိုင်ငံတွင် လိမ်လည်မှုပြဿနာ အရှိန်အဟုန်ဖြင့် ကြီးထွားလာနေချိန်၌ ပေါ်ပေါက်လာခြင်းဖြစ်သည်။ ၂၀၂၄ ခုနှစ်အတွင်း လိမ်လည်မှုများကြောင့် ဆုံးရှုံးခဲ့သည့် ငွေပမာဏမှာ စင်ကာပူဒေါ်လာ ၁.၁ ဘီလီယံ (အမေရိကန်ဒေါ်လာ ၈၆၀ သန်း) အထိ စံချိန်တင်မြင့်တက်ခဲ့ပြီး အမှုပေါင်း ၅၁,၅၀၁ ခုအထိ ရှိခဲ့သည်။ ထူးခြားသည်မှာ အမှုအများစုတွင် လိမ်လည်သူများက ဘဏ်အကောင့်ကို တိုက်ရိုက်ခိုးယူခြင်းမဟုတ်ဘဲ အလိမ်မိခံရသူများက မိသဘောဆန္ဒအလျောက် ငွေလွှဲပေးခဲ့ခြင်းဖြစ်ကြောင်း ရဲတပ်ဖွဲ့၏ စာရင်းများအရ သိရသည်။

သို့သော်လည်း ဤဥပဒေသည် နိုင်ငံသားများ၏ ကိုယ်ပိုင်လွတ်လပ်ခွင့်နှင့် ပိုင်ဆိုင်မှုကို အစိုးရက အလွန်အကျွံ စွက်ဖက်ရာရောက်နိုင်သည်ဟု အချို့သော လွှတ်တော်အမတ်များနှင့် လူ့အခွင့်အရေး လှုပ်ရှားသူများက ထောက်ပြကြသည်။ အစိုးရကမူ ဤသည်မှာ ဒစ်ဂျစ်တယ်ရာဇဝတ်မှုများကို ကာကွယ်ရန်အတွက် မဖြစ်မနေလိုအပ်သော ခြေလှမ်းတစ်ရပ်ဖြစ်ကြောင်း ခုခံပြောဆိုထားသည်။