ဒီနေ့မှာ အားလုံးကို နှုတ်ဆက်သွားပြီဖြစ်တဲ့ Windows 10

Microsoft က Windows 10 အတွက် ပံ့ပိုးမှုကို အောက်တိုဘာ 14 ရက် ဒီနေ့မှာ တရားဝင် အဆုံးသတ်လိုက်ပါပြီ။ စျေးကွက်မှာ ဆယ်စုနှစ်တစ်ခု တည်ရှိခဲ့ပြီးနောက် Windows 10 ဟာ သူ့ရဲ့ ခရီးကို နိဂုံးချုပ်လိုက်ပြီ ဖြစ်ပါတယ်။ Microsoft ကတော့ အသုံးပြုသူအားလုံးကို Windows 11 သို့ ပြောင်းလဲဖို့ တိုက်တွန်းနေပါတယ်။

Windows 10 Home၊ Pro နဲ့ Enterprise edition အားလုံးက support ရရှိတော့မှာမဟုတ်ပါဘူး။ ဒီနေ့ကစပြီး Windows 10 သုံးနေသူတွေက သူတို့ရဲ့ PC လုံခြုံရေးအတွက် ကိုယ်တိုင် ဆောင်ရွက်ရတော့မှာပါ။ ဘာမှ မလုပ်ရင် PC ဟာ အင်တာနက်ပေါ်မှာ လုံခြုံမှုကင်းမဲ့ နေမှာ ဖြစ်ပါတယ်။

Windows 11 သို့ အဆင့်မြှင့်လို့ မရသူတွေအတွက် Microsoft က Extended Security Updates (ESU) အစီအစဉ်ကို ကမ်းလှမ်းထားပါတယ်။ ဒီအစီအစဉ်မှာ စာရင်းသွင်းရင် 2026 ခုနှစ် အောက်တိုဘာလအထိ နောက်ထပ်တစ်နှစ် လုံခြုံရေး update တွေ ရရှိမှာပါ။ ESU အစီအစဉ်က အခမဲ့ဖြစ်ပေမယ့် စာရင်းသွင်းဖို့ လုပ်ငန်းစဉ်အချို့ ဖြတ်သန်းရမှာ ဖြစ်ပါတယ်။

ESU မရှိရင် ယနေ့နောက်ပိုင်း Windows OS မှာ တွေ့ရှိမယ့် လုံခြုံရေးအားနည်းချက်တွေအတွက် PC က အန္တရာယ်ကျရောက်နိုင်ပါတယ်။ ဒါကြောင့် Windows 10 သုံးစွဲသူတွေအနေနဲ့ အမြန်ဆုံး Windows 11 သို့ ပြောင်းလဲဖို့ သို့မဟုတ် ESU အစီအစဉ်မှာ စာရင်းသွင်းဖို့ အရေးတကြီး လိုအပ်နေပါပြီ။

Windows 10 ဟာ သုံးစွဲသူသန်းပေါင်းများစွာရဲ့ အချစ်တော် operating system တစ်ခု ဖြစ်ခဲ့ပေမယ့် ယနေ့မှစပြီး သမိုင်းဝင် ဖြစ်သွားပါပြီ။