ချန်ပီယံလိဂ် Round of 16 (ဒုတိယအကျော့)

ဘာစီလိုနာ - ဘင်ဖီကာ
(12 March 2025/ 00:15 am)

လီဗာပူးလ် - PSG
(12 March 2025/ 2:30 am)

ဘာစီလိုနာ - ဘင်ဖီကာ
(ချန်ပီယံလိဂ်)

ဒီနှစ်သင်း ပထမအကျော့ ပေါ်တူဂီမြေမှာတုန်းက ဘင်ဖီကာအသင်းကို ဘာစီလိုနာအသင်းက (၁-၀)ဂိုးနဲ့အနိုင်ယူခဲ့​ပြီး ဘရာဇီးလ်တောင်ပံကစားသမားရာဖင်ညာက အနိုင်ဂိုးသွင်းခဲ့တာဖြစ်တယ်။

ဒီပွဲမှာဘာစီလိုနာက အဝေးကွင်းမှာနိုင်ခဲ့တယ်ဆိုပေမယ့် အိမ်ရှင်အသင်းက ဂိုးသွင်းခွင့်တွေ အမြောက်အမ​ြားရခဲ့တယ်။ အက်တာကိုဂလူး၊ အာနက်စ်၊ ကော့ကူးအစရှိတဲ့ ကစားသမားတွေရဲ့ ကန်သွင်းမှုတွေကို လီဗာပူးလ်ဂိုးသမားရှက်ဇနီ ကာကွယ်နိုင်ခဲ့တာကြောင့်လည်း ဒီပွဲက ဘာစီလိုနာအတွက် နိုင်ပွဲဖြစ်ခဲ့ရတာဖြစ်တယ်။

ဘာစီလိုနာက ချန်ပီယံလိဂ်အပါအဝင် ဥရောပမှာ ဘင်ဖီကာနဲ့တွေ့ဆုံမှုတွေမှာ ရလဒ်ကောင်းရလေ့ရှိတယ်။ ဥရောပထိပ်တန်းပြိုင်ပွဲတွေမှာ ဘင်ဖီကာနဲ့ နောက်ဆုံးတွေ့ဆုံမှု(၁၀)ကြိမ်မှာ (၁)ပွဲပဲ ရှုံးခဲ့ဖူးတယ်။

ဒီရာသီချန်ပီယံလိဂ် Round of 16 ပထမအကျော့မှာသာမက အုပ်စုအဆင့်မှာတုန်းကလည်း ဘင်ဖီကာနဲ့ ဆုံခဲ့ပြီး အဝေးကွင်းမှာ (၅-၄)ဂိုးနဲ့ အနိုင်ရခဲ့တယ်။

လက်ရှိဘာစီလိုနာအသင်းမှာ ခရစ္စတန်ဆန်၊ ဘာနယ်လ်၊ ဂိုးသမားစတီဂန်တို့ ဒဏ်ရာကြောင့် ဒီပွဲလွဲမှာဖြစ်သလို ကူဘာဆီကလည်း ပထမအကျော့က အနီကတ်ကြောင့် ဒီပွဲ ပွဲပယ်ခံရမယ်။ ဘင်ဖီကာမှာလည်း ဂါဘီယာ၊ အလက်ဇန်ဒါးဘား၊ မန်နူဆီးလ်ဗား အစရှိသူတွေလွဲမှာဖြစ်ပြီး ဘယ်တောင်ပံကစားသမား ကာရီရက်စ်က ပွဲပယ်ပြစ်ဒဏ်ကြောင့် ဒီပွဲလွဲမယ်။ ဒီမာရီယာကတော့ ကြံ့ခိုင်မှု စစ်ဆေးပြီး ဒီပွဲမှာ ပါလာနိုင်တယ်။

ပထမအကျော့ အိမ်ကွင်းမှာ ဘင်ဖီကာခြေစွာခဲ့ပေမယ့် စပိန်မြေမှာတော့ ဘာစီလိုနာအသင်းကို ယှဉ်နိုင်ဖို့မလွယ်ပါဘူး။ ဘာစီလိုနာအသင်းရဲ့ကွင်းမှာလည်း ဘင်ဖီကာ အရှုံးပေးပြီး ပြန်ရတာများပါတယ်။ ဘာစီလိုနာကွင်းမှာ ကစားတဲ့ နောက်ဆုံး ဥရောပ(၄)ပွဲမှာ ဘင်ဖီကာတစ်ပွဲမှ မနိုင်တဲ့အပြင် (၃)ပွဲမှာ ဂိုးမသွင်းနိုင်ဘဲ ဂိုးပေါက်ပျောက်ခဲ့ရတယ်။

ဘာစီလိုနာက ကြားမှာ လာလီဂါပွဲမကစားထားရတာကြောင့်လည်း
ဒီပွဲမှာ အားပြည့်နေမှာသေချာတယ်။ အိမ်ရှင်အသင်းကိုပဲ အပြည့်အ၀ ယုံကြည်ရမယ့်ပွဲပါ။ ဘာစီလိုနာအနိုင်(၃-၁)လိုရလဒ်မျိုးကို ကြိုက်မိတယ်။

လီဗာပူးလ် - PSG
(ချန်ပီယံလိဂ်)

လီဗာပူးလ်က ပထမအကျော့မှာ PSG ကို ပြင်သစ်မြေမှာ (၁-၀)ဂိုးနဲ့ အနိုင်ရခဲ့ပြီး အနိုင်ဂိုးကို လူစားဝင်လာတဲ့ အီလီယော့က ကွင်းထဲဝင်လာပြီး (၁)မိနစ်ကျော်အကြာမှာ သွင်းယူပေးခဲ့တာဖြစ်တယ်။ ဒါပေမယ့် ဒီပွဲမှာ လီဗာပူးလ်က ရလဒ်ပိုင်းသာ အသာရခဲ့တာဖြစ်ပြီး တစ်ပွဲလုံး PSG က အသာစီးက ကစားခဲ့တာဖြစ်တယ်။

လီဗာပူးလ်ဘက်ကို PSG က ဂိုးကန်ချက် (၂၇)ကြိမ်၊ ဂိုးပေါက်တည့်ကန်ချက် (၁၀)ကြိမ်အထိရှိခဲ့ပြီး လီဗာပူးလ်ဂိုးသမားအယ်လစ်ဆန် လက်စွမ်း​ပြနိုင်လွန်းတာကြောင့် PSG အသင်းဘက်က ကဗာရာရှက်ခလီယာ၊ ဒမ်ဘီလီ၊ ဒူအီ အစရှိတဲ့ကစားသမားတွေရဲ့ကန်ချက်တွေ ဂိုးမဖြစ်ခဲ့ရတာဖြစ်တယ်။

လီဗာပူးလ်က အဲဒီပွဲမှာ PSG အသင်းဂိုးဘက်ကို (၂)ကြိမ်သာကန်နိုင်ခဲ့ပြီး (၁)ကြိမ်သာဂိုးပေါက်တည့်ခဲ့တာဖြစ်တယ်။

လီဗာပူးလ်အသင်းမှာ ဂိုးမက်ဇ်၊ ဘရက်ဒလေ၊ မော်တန်တို့ ဒဏ်ရာကြောင့် ဒီညပွဲ လွဲမှာဖြစ်ပြီး ပြီးခဲ့တဲ့ပွဲတချို့မှာ ဒဏ်ရာကြောင့် မပါနိုင်တဲ့ တောင်ပံကစားသမားဂတ်ပိုက လေ့ကျင့်ခန်းပြန်လည်ပြုလုပ်နေပြီဖြစ်လို့ ဒီပွဲမှာ ပါလာဖွယ်ရှိတယ်။

PSG အသင်းမှာတော့ ဒဏ်ရာရ/ပွဲပယ်ကစားသမားတစ်ယောက်တောင်မရှိဘဲ တစ်သင်းလုံး လူစုံတက်စုံ အားအပြည့်ရှိနေပါတယ်။

လီဗာပူးလ်က နောက်ဆုံးပြိုင်ပွဲစုံ(၄)ပွဲထဲမှာ မန်စီးတီး၊ နယူးကာဆယ်၊ PSG အစရှိတဲ့ အသင်းကြီးတွေပါဝင်ပေမယ့် (၄)ပွဲစလုံးကို အနိုင်ကစားထားတယ်။ ဒီ(၄)ပွဲမှာ နောက်တန်းက (၁)ဂိုးပဲ ပေးထားရတယ်။ ဗန်ဒိုက်ဦးဆောင်တဲ့ခံစစ်နဲ့ ဂိုးသမားအယ်လစ်ဆန်လက်စွမ်းပြမှုတွေက လီဗာပူးလ်အသင်းကို နိုင်ပွဲတွေဆက်စေတဲ့အကြောင်းရင်းလည်းဖြစ်တယ်။

ဒီရာသီ ချန်ပီယံလိဂ်မှာလည်း လီဗာပူးလ်က အိမ်ကွင်း(၄)ပွဲစလုံးအနိုင်ကစားထားပြီး ဒီ(၄)ပွဲမှာလည်း နောက်တန်းက (၁)ဂိုးပဲ ပေးထားရတယ်။

လီဗာပူးလ်က ချန်ပီယံလိဂ်မှာ ပထမအကျော့နိုင်တဲ့ နောက်ဆုံးရှုံးထွက်ပွဲစဉ်(၁၄)ပွဲစလုံးမှာ နောက်တစ်ဆင့်ကို တက်ရောက်နိုင်ခဲ့တယ်။ အင်္ဂလန်ကလပ်အသင်းတွေအနေနဲ့လည်း ပြင်သစ်ကလပ်တွေကို အိမ်ကွင်းမှာ အသာစီးအမြဲရတတ်တဲ့ အစဉ်အလာရှိတာလည်း သတိပြုရမယ်။ အင်္ဂလန်မြေမှာ ကစားတဲ့ အင်္ဂလန်-ပြင်သစ် ကလပ်အသင်းထိပ်တိုက်တွေ့မှုတွေမှာ အင်္ဂလန်ကလပ်တွေက သိသိသာသာအနိုင်ရထားတာလည်း အစဉ်အလာရှိတယ်။

ပထမအကျော့ကြည့်ခဲ့ရတဲ့ ပရိသတ်တွေကတော့ ဒီပွဲမှာ လီဗာပူးလ်ဘက်မှာ မနေချင်ဘဲ PSG ကို ရွေးချယ်ကြမယ်ထင်တယ်။ ပြင်သစ်မြေမှာ PSG ခြေသာခဲ့တာမှန်ပေမယ့် အင်္ဂလန်မြေမှာတော့ လီဗာပူးလ် ဒီလောက်အခြေအနေမဆိုးနိုင်ပါဘူး။ ကွာတားလက်မှတ်ရဖို့ ပထမအကျော့ရလဒ်ကို လီဗာပူးလ်ထိန်းကစားရင်း ဒီပွဲက သရေကျသွားမယ်လို့ ထင်နေတယ်။ (၁-၁)လို ရလဒ်မျိုးကိုပဲ အကြိုက်တွေ့ပါတယ်။