ဘရာဇီးလ်လက်ရွေးစင်တိုက်စစ်မှူးနေမာမှာ အသက်(၅)နှစ်(၁)လ ငယ်တဲ့ညီမတစ်ယောက်ရှိပါတယ်။ ဒီညီမက အခုအသက်(၂၈)နှစ်အရွယ်ရှိပြီဖြစ်ပြီး နာမည်က ရာဖယ်လာဘက်ကရန်လို့ အမည်ရပါတယ်။

သူတို့ မောင်နှမအနေနဲ့ တစ်အူတုံဆင်း မောင်နှမအရင်းတွေပီပီ ချစ်ကြခင်ကြ မြတ်နိုးကြတာ အဆန်းမဟုတ်ပေမယ့် ဒဏ်ရာပြဿနာနဲ့ ဆက်စပ်နေတယ်ဆိုတာကတော့ နည်းနည်းထူးဆန်းနေပါလိမ့်မယ်။

နေမာဟာ သူ့ရဲ့ညီမလေးကို အလွန်တရာမှ ချစ်မြတ်နိုးသူတစ်ဦးပါ။ သူ့ရဲ့လက်မောင်းမှာ သူ့ညီမမျက်နှာပုံကို တက်တူးရေးထိုးထားသလို၊ ရာဖယ်လာကလည်း အစ်ကိုဖြစ်သူကို အရမ်းချစ်တာကြောင့် အစ်ကိုနေမာရဲ့မျက်လုံးကို သူမလက်မောင်းမှာ တက်တူးရေးထိုးထားတာပါ။

အခုဘရာဇီးလ်ကလပ်ဆန်းတို့စ်အသင်းမှာ ကစားနေတဲ့နေမာဟာ ဆန်းတို့စ်အသင်းရဲ့နောက်ဆုံးပွဲဖြစ်တဲ့ Campeonato Paulista ဆီမီးဖိုင်နယ်ပွဲစဉ် ကိုရင်သီယန်(၂-၁)ဆန်းတို့စ်ပွဲမှာ မပါနိုင်ခဲ့ပါဘူး။

အခုမတ်လအတွင်း ဘရာဇီးလ်အသင်းရဲ့နိုင်ငံတကာပွဲတွေဖြစ်တဲ့ ကိုလံဘီယာ၊ အာဂျင်တီးနားအသင်းတို့နဲ့ပွဲတွေအတွက် လူစာရင်းမှာ ပြန်လည်ရွေးချယ်ခံရပြီးမှ နေမာ ဒီပွဲလွဲချော်တဲ့အပေါ် ဘရာဇီးလ်ပရိသတ်တချို့က စိုးရိမ်ခဲ့ကြပါတယ်။

ဒါပေမယ့် အကြောင်းသိ ပရိသတ်တချို့နဲ့ မီဒီယာတချို့ကတော့ နေမာ ဒီပွဲကိုလွဲတာမထူးဆန်းကြောင်းနဲ့ ဒါဟာ ဖြစ်ရိုးဖြစ်စဉ် လှည့်ကွက်တစ်ခုသာဖြစ်တယ်လို့ ရေးသားခဲ့ကြပါတယ်။

နေမာဟာ မတ်လ(၁၁)ရက်နေ့မှာ ကျရောက်တဲ့ သူ့ရဲ့ညီမမွေးနေ့ မတိုင်မီတိုင်း ဒီလို ကြံဖန်ဒဏ်ရာရတတ်ပြီး အသင်းရဲ့ပွဲတွေ၊ လေ့ကျင့်ခန်းအစီအစဉ်တွေကို လွဲချော်တတ်လို့ပါ။

သူ့ညီမရဲ့မွေးနေ့ပါတီမှာ လွတ်လွတ်လပ်လပ်ပျော်ပါးလို့ရအောင် ဒီလို လုပ်လေ့ရှိတယ်လို့ နေမာအကြောင်းနောကျေနေတဲ့ ပရိသတ်တွေ၊ မီဒီယာတွေက သဘောပေါက်ထားကြပါတယ်။

တကယ်လည်း နှစ်စဉ်မတ်လ(၁၁)ရက်နေ့​ ရောက်ခါနီးတိုင်း နေမာဟာ သူကစားရာအသင်းတွေမှာ ဒဏ်ရာပြဿနာအမျိုးမျိုးဖြစ်ပေါ်လေ့ရှိပြီး ညီမဖြစ်သူရဲ့မွေးနေ့ပါတီဆီ ရောက်လာနေကျ အစဉ်အလာသမိုင်းကြောင်း ရှိပါတယ်။

အခုလည်း ကိုရင်သီယန်နဲ့ ပွဲမတိုင်မီ ဒဏ်ရာကြီးကြီးမားမားရထားတာမရှိပါဘဲ နေလို့ ထိုင်လို့ မကောင်းဘူးဆိုပြီး ဒီပွဲကို နေမာက လွဲချော်ခဲ့တာပါ။ ဒါပေမယ့် မီဒီယာတချို့ကတော့ နေမာအနေနဲ့ သူ့ ညီမ အသက်(၁၈)နှစ်ပြည့်တဲ့မွေးနေ့ကစပြီး နှစ်တိုင်းနီးပါး မတ်(၁၁)ရက်နေ့နီးရင် ဒဏ်ရာရ/ပွဲပယ်တွေ ဖန်တီးတတ်တဲ့သမိုင်းကြောင်းကို ပြန်ပြီး အောက်ဖဲလှန်ဖော်ပြကြပါတယ်။

ညီမဖြစ်သူကို ချစ်လွန်းတဲ့နေမာအနေနဲ့ ညီမရဲ့မွေးနေ့ပါတီကို မပျက်မကွက်တက်ရောက်ချင်လို့ အကြံဆိုးနဲ့ ဉာဏ်ဆင်တာလား .... ။ တကယ်ကိုပဲ တိုက်ဆိုင်လွန်းစွာ သူ့ညီမမွေးနေ့ရောက်ခါနီးတိုင်း ဒဏ်ရာတွေ အမှန်တကယ်ရနေတာလားဆိုတာတော့ သူကိုယ်တိုင်အသိဆုံးဖြစ်ပါလိမ့်မယ်။