ဂွါဒီယိုလာရဲ့ အိမ်ထောင်ရေးပြန်လည်ပေါင်းစည်းမှုက မန်စီးတီးအနာဂတ်ကို ထိခိုက်လာနိုင်မလား
မန်စီးတီးအသင်းနည်းပြဂွါဒီယိုလာ ပြိုကွဲနေတဲ့ သူ့ရဲ့အိမ်ထောင်ရေးကို တဖန်ပြန်လည်ပေါင်းစည်းဖို့ ကြိုးစားနေပြီး ဒီအကြောင်းအရာက မန်စီးတီးအသင်းရဲ့အနာဂတ်ကို ဘယ်လောက်အထိ သက်ရောက်လာနိုင်မလဲဆိုတာ စောင့်ကြည့်စရာဖြစ်နေပါတယ်။
ဂွါဒီယိုလာနဲ့ ဇနီးဖြစ်သူဆာရာတိုရဲ့ သက်တမ်းနှစ်(၃၀)ကြာအိမ်ထောင်ရေးဟာ အဆုံးသတ်ပြိုကွဲခဲ့ပြီဖြစ်ကြောင်း အခုနှစ်အစောပိုင်းက သတင်းတွေထွက်ပေါ်လာခဲ့ပါတယ်။
အဝတ်အစားဖက်ရှင်လုပ်ငန်းရှင်တစ်ဦးဖြစ်သူ ဆာရာဟာ ဂွါဒီယိုလာနဲ့ ၁၉၉၄ ခုနှစ်မှာ စတင်တွေ့ဆုံအကြောင်းပါခဲ့ပြီး နောက်(၁၀)နှစ်အကြာ ၂၀၁၄ ခုနှစ်မှာတော့ သူတို့နှစ်ဦးရဲ့လက်ထပ်ပွဲကို တခမ်းတနားကျင်းပခဲ့ပါတယ်။
ဒါပေမယ့် မန်စီးတီးအသင်းကို ဂွါဒီယိုလာ ရောက်ရှိလာခဲ့ပြီးနောက် သူတို့ အိမ်ထောင်ရေးဟာ အက်ကြောင်းထင်လာခဲ့ပြီး အင်္ဂလန်မှာ မနေထိုင်လိုတဲ့ဆာရာဟာ ၂၀၁၉ ခုနှစ်မှာ အငယ်ဆုံးသမီး ဗယ်လန်တီနာ(၁၇ နှစ်)ကို ခေါ်ဆောင်ကာ ဘာစီလိုနာမြို့ကို ပြန်သွားခဲ့ပါတယ်။
အခုနှစ် ဇန်နဝါရီလထဲမှာ ထွက်ပေါ်ခဲ့တဲ့သတင်းတွေမှာတော့ ဆာရာနဲ့ ဂွါဒီယိုလာအကြား အိမ်ထောင်ရေးအဆုံးသတ်သွားပြီဖြစ်ကြောင်း၊ မန်စီးတီးအသင်းမှာ ဆက်ရှိနေဖို့ ဂွါဒီယိုလာက ဆုံးဖြတ်ခဲ့ပြီး အသင်းနဲ့(၂)နှစ်သက်တမ်းရှိစာချုပ်သစ်တစ်ရပ်ချုပ်ဆိုခဲ့တာက သူတို့ရဲ့အိမ်ထောင်ရေးပြိုကွဲဖို့ အဓိကအကြောင်းအရာတစ်ခုဖြစ်ကြောင်း မီဒီယာတွေက ဖော်ပြကြပါတယ်။
အခု ဂွါဒီယိုလာဟာ ပြီးခဲ့တဲ့ အီစတာပွဲတော်ကာလအလွန်မှာ စပိန်နိုင်ငံဘာစီလိုနာမြို့ကို ပြန်ခဲ့ပြီး သူတို့မိသားစုနေအိမ်မှာ နေထိုင်ခဲ့ကြောင်း၊ သူနဲ့ဆာရာတို့ ပြန်လည်လက်တွဲပြီး မိသားစုအတူ ပေါင်းစည်းဖို့ ကြိုးစားနေကြောင်း ကတ်တလန်အခြေစိုက်သတင်းစာ El Nacional က ဖော်ပြခဲ့ပါတယ်။
ဒါကြောင့် ဂွါဒီယိုလာအနေနဲ့ မိသားစုကို ပြန်အာရုံထားလာပြီး ဆာရာအလိုကျ ဘာစီလိုနာကို ပြန်တော့မလားဆိုတာလည်း တွေးစရာဖြစ်လာပါတယ်။ ဒီရာသီမှာ ထင်တိုင်းမပေါက်ဘဲ ကျဆင်းတဲ့ရာသီတစ်ခုကို ရင်ဆိုင်ရပြီးနောက်မှာ မန်စီးတီးနည်းပြဘ၀ကို ဂွါဒီယိုလာစွန့်လွှတ်တော့မလား ... စာချုပ်သစ်အတိုင်း ၂၀၂၇ ခုနှစ်အထိ အသင်းမှာ မနေတော့ဘဲ မိသားစုအတူပေါင်းစည်းရေးအတွက် ဘာစီလိုနာကို ပြန်မလားဆိုတာ မန်စီးတီးပရိသတ်တွေအတွက် စိုးရိမ်စရာပါပဲ။
အခုအချိန်အထိတော့ ဂွါဒီယိုလာရော၊ ဆာရာပါ သူတို့ရဲ့ချစ်သက်သေဖြစ်တဲ့လက်ထပ်လက်စွပ်ကို မချွတ်တမ်းဝတ်ဆင်ထားတာကလည်း သူတို့နှစ်ဦးကြားမှာ သံယောဇဉ်ကြိုးမပြတ်တောက်သေးဘဲရှိနေတယ်ဆိုတာ ပြသရာရောက်ခဲ့ပါတယ်။
