ဂူဟီနဲ့ အီဇီကို နွေရာသီအပြောင်းအရွှေ့ကာလမှာ ရောင်းချဖို့ ခရစ္စတယ်ပဲလေ့စ်အသင်းဆန္ဒရှိနေ
ခရစ္စတယ်ပဲလေ့စ်အသင်းဟာ အသင်းခေါင်းဆောင်နောက်ခံလူ ဂူဟီနဲ့ တိုက်စစ်ကစားသမားအီဇီတို့ကို လာမယ့်နွေရာသီအပြောင်းအရွှေ့ကာလမှာ ရောင်းချဖို့ဆန္ဒရှိနေတယ်လို့ ဗြိတိန်မီဒီယာတွေက ဖော်ပြထားပါတယ်။ ဂူဟီနဲ့ အီဇီတို့ဟာ ခရစ္စတယ်ပဲလေ့စ်အသင်းကို ရောက်ရှိလာပြီးကတည်းက အဓိက ကစားသမားတွေအဖြစ် ခြေစွမ်းပြသနေတာပါ။
အီဇီဟာ ဒီရာသီမှာ ခရစ္စတယ်ပဲလေ့စ်အသင်းအတွက် ပြိုင်ပွဲစုံ(၉)ဂိုးသွင်းယူပြီး ဂိုးဖန်တီးမှု(၁၁)ကြိမ်ပြုလုပ်ထားကာ ဂူဟီက ပရီးမီးယားလိဂ်ပြိုင်ပွဲမှာ အသင်း(၁၀)ပွဲပေးဂိုးမပေးရအောင် ခံစစ်ကို ဦးဆောင်ထားပါတယ်။ ခရစ္စတယ်ပဲလေ့စ်အသင်းဟာ ရာသီအစအထနှေးခဲ့ပေမယ့် အခုအချိန်မှာ အကောင်းဆုံးပုံစံရရှိနေပြီး ပရီးမီးယားလိဂ်ပြိုင်ပွဲမှာ အမှတ်ပေးဇယားအဆင့်(၁၂)နဲ့ FA ဖလားပြိုင်ပွဲမှာ ဗိုလ်လုပွဲရောက်ရှိနေတာပါ။
ခရစ္စတယ်ပဲလေ့စ်အသင်းဟာ ခြေစွမ်းပြသနေတဲ့ ဂူဟီနဲ့ အီဇီအတွက် ကမ်းလှမ်းမှုအများအပြားကို ရရှိထားပါတယ်။ ပြီးခဲ့တဲ့နွေရာသီက နယူးကာဆယ်အသင်းဟာ အီဇီကိုခေါ်ယူဖို့ ပေါင်(၆၅)သန်းကျော်နဲ့ (၄)ကြိမ်အထိ ကမ်းလှမ်းမှုပြုလုပ်တာကို ခရစ္စတယ်ပဲလေ့စ်အသင်းက ပယ်ချခဲ့တာပါ။
ဒါ့အပြင် ဂူဟီကို ခေါ်ယူဖို့ ဇန်နဝါရီက စပါးအသင်းရဲ့နောက်ကျကမ်းလှမ်းမှုကိုလည်း ပယ်ချခဲ့ပါတယ်။ အခုအချိန်မှာတော့ ခရစ္စတယ်ပဲလေ့စ်အသင်းနည်းပြ ဂလက်စ်နာက ဂူဟီနဲ့ အီဇီကို ထွက်ခွာခွင့်ပေးဖို့ ဆုံးဖြတ်ခဲ့တယ်လို The Sun က ဖော်ပြခဲ့တာပါ။
ဂလက်စ်နာဟာ သူတို့နှစ်ဦးကိုရောင်းချလို့ရတဲ့ ပြောင်းရွှေ့ကြေးတွေနဲ့ ခရစ္စတယ်ပဲလေ့စ်အသင်းလူစာရင်းကို အားဖြည့်မှုတွေပြုလုပ်ချင်နေတာဖြစ်ပါတယ်။ ခရစ္စတယ်ပဲလေ့စ်အသင်းနဲ့ စာချုပ်သက်တမ်း(၁၂)လသာကျန်ရှိတော့တဲ့ ဂူဟီကို ခေါ်ယူဖို့ ချယ်လ်ဆီး၊ နယူးကာဆယ်နဲ့ စပါးအသင်းတို့က စောင့်ကြည့်မှုတွေပြုလုပ်နေကြတာပါ။ အီဇီရဲ့စာချုပ်ဟာ ၂၀၂၇ ခုနှစ်၊ဇွန်အထိရှိပြီး စာချုပ်ဖျက်သိမ်းကြေးပေါင်သန်း(၆၀)ရှိတယ်လို့ သိရပါတယ်။
စပါးနဲ့ မန်ယူနိုက်တက်အသင်းတို့ဟာ အီဇီကိုခေါ်ယူဖို့ စိတ်ဝင်စားနေကြတာပါ။ ဂူဟီနဲ့ အီဇီတို့ဟာ ချန်ပီယံလိဂ်ပြိုင်ပွဲကိုပါဝင်ကစားချင်နေတာကြောင့် ရာသီကုန်မှာ သူတို့ရဲ့အနာဂတ်ကို ဆုံးဖြတ်ချက်ချဖွယ်ရှိနေတာဖြစ်ပါတယ်။
