ထိုင်းရဲ့ အသည်းကျော် ရေမြင်းလေး မူဒေါင် တစ်နှစ်ပြည့်ပြီ

အင်တာနက်ပေါ်တွင် ချစ်စဖွယ်အမူအရာများကြောင့် နာမည်ကျော်ကြားနေသည့် ရေမြင်းပုလေး မူဒေါင် (Moo Deng) သည် လာမည့် ဇူလိုင်လ ၁၀ ရက်နေ့တွင် တစ်နှစ်ပြည့်မြောက်မည် ဖြစ်သည်။ ထိုင်းနိုင်ငံ၊ ခေါင်ခဲ (Khao Kheow) တိရစ္ဆာန်ဥယျာဉ်မှ မူဒေါင်၏ မွေးနေ့အထိမ်းအမှတ်အဖြစ် အထူးအစီအစဉ်များစွာ ပြုလုပ်ကျင်းပသွားမည်ဖြစ်ကြောင်း သိရသည်။

မွေးနေ့ပွဲ၏ အထူးအစီအစဉ်များထဲတွင် မူဒေါင်၏ ချစ်စဖွယ်အမှတ်သင်္ကေတတစ်ခုဖြစ်သော ပလတ်စတစ်ဇလုံငယ်ကို လေလံတင်ရောင်းချခြင်း ပါဝင်မည်ဖြစ်ပြီး ဇူလိုင်လ ၁၀ ရက်မှ ၁၃ ရက်နေ့အထိ ကလေးများအတွက် တိရစ္ဆာန်ဥယျာဉ်သို့ ဝင်ကြေးအခမဲ့ အဖြစ် သတ်မှတ်ပေးထားသည်။

အင်တာနက်ပေါ်မှ ကျော်ကြားမှု

မူဒေါင်သည် ၂၀၂၄ ခုနှစ် ဇူလိုင်လတွင် တိရစ္ဆာန်ဥယျာဉ်မှ ပြုလုပ်ခဲ့သော နာမည်ပေးပြိုင်ပွဲမှတစ်ဆင့် လူသိများလာခဲ့ခြင်း ဖြစ်သည်။ ထိုစဉ်က ပရိသတ်များက "Moo Deng" (မြန်မာလို: ခုန်ဆွခုန်ဆွဝက်ကလေး)၊ "Moo Daeng" (ဝက်နီလေး) နှင့် "Moo Sab" (ဝက်သားစဉ်းကော) ဟူသော နာမည်များကို အဆိုပြုခဲ့ကြသည်။ တိရစ္ဆာန်ဥယျာဉ်၏ Facebook စာမျက်နှာမှတစ်ဆင့် လူပေါင်း ၂၀,၀၀၀ ကျော် မဲပေးခဲ့ကြရာတွင် "မူဒေါင်" ဟူသော အမည်က မဲအများဆုံးဖြင့် ရွေးချယ်ခံခဲ့ရသည်။ ဤအမည်သည် မူဒေါင်၏ တက်ကြွလန်းဆန်းပြီး ကစားလိုသည့် ပင်ကိုယ်စရိုက်ကို ထင်ဟပ်စေသောကြောင့် ရွေးချယ်ခဲ့ခြင်း ဖြစ်သည်။

တိရစ္ဆာန်ဥယျာဉ်အတွက် ဝင်ငွေတိုးစေသူ

မူဒေါင်၏ ကျော်ကြားမှုသည် တိရစ္ဆာန်ဥယျာဉ်အတွက် ဝင်ငွေများစွာ ရှာဖွေပေးနိုင်ခဲ့သည်။ အသက်နှစ်လအရွယ်သာရှိသေးသော မူဒေါင်လေးကြောင့် ၂၀၂၄ ခုနှစ် စက်တင်ဘာလ၏ ပထမ ၁၉ ရက်အတွင်း တိရစ္ဆာန်ဥယျာဉ်သည် လက်မှတ်ရောင်းချရငွေ ဘတ် ၁၂.၉၇ သန်း (ဒေါ်လာ ၄၀၀,၄၈၁) အထိ ရရှိခဲ့သည်။ ထိုကာလအတွင်း လူဦးရေ ၈၁,၇၈၆ ဦး တိရစ္ဆာန်ဥယျာဉ်သို့ လာရောက်လည်ပတ်ခဲ့ကြသည်။

ကိုယ်ပိုင်ကုန်ပစ္စည်းများ

၂၀၂၄ ခုနှစ် စက်တင်ဘာလ ၈ ရက်နေ့တွင် ခေါင်ခဲ (Khao Kheow) တိရစ္ဆာန်ဥယျာဉ်သည် မူဒေါင်၏ ပုံရိပ်ကို အခြေခံထားသော အဝတ်အစား Collection များကို စတင်ထုတ်လုပ်ရောင်းချခဲ့သည်။ ထို Collection များတွင် မူဒေါင်၏ ချစ်စဖွယ်အမူအရာများ၊ လှုပ်ရှားမှုပုံရိပ်များဖြင့် အလှဆင်ထားသော ရှပ်အင်္ကျီနှင့် ဘောင်းဘီများ ပါဝင်သည်။ လာမည့်မွေးနေ့အတွက်လည်း အထူးထုတ်ကုန်ပစ္စည်းများ ထပ်မံထွက်ရှိလာဖွယ်ရှိသည်။

သမ္မတရွေးကောက်ပွဲ ဟောကိန်း

မူဒေါင်သည် ၂၀၂၄ ခုနှစ် နိုဝင်ဘာလ ၅ ရက်နေ့တွင် ကျင်းပခဲ့သော အမေရိကန်သမ္မတရွေးကောက်ပွဲတွင် ဒေါ်နယ်ထရန့် (Donald Trump) အနိုင်ရရှိမည်ဟု ဟောကိန်းထုတ်ခဲ့ခြင်းကြောင့်လည်း လူပိုမိုရရှိခဲ့သည်။ တိရစ္ဆာန်ဥယျာဉ်မှ တင်ခဲ့သော ဗီဒီယိုဖိုင်တွင် တိရစ္ဆာန်ထိန်းက သမ္မတလောင်းနှစ်ဦးဖြစ်သော ဒေါ်နယ်ထရန့်နှင့် ကာမလာဟဲရစ် (Kamala Harris) တို့၏ အမည်များရေးထိုးထားသော သစ်သီးပန်းကန်နှစ်ခုကို မူဒေါင်၏ ရှေ့တွင် ထားပေးခဲ့သည်။ မူဒေါင်က ဒေါ်နယ်ထရန့်၏ အမည်ပါသော သစ်သီးပန်းကန်ကို ရွေးချယ်စားသုံးခဲ့ခြင်းဖြင့် သူ၏ဟောကိန်းကို ပြသခဲ့သည်။