နယ်သာလန်အသင်းနည်းပြ ရော်နယ်လ်ကိုးမန်းက မန်ယူနိုက်တက်အသင်းတိုက်စစ်မှူး ဇက်ခ်ဇီဟာ လက်ရှိအချိန်မှာ သူတို့အတွက် ကစားပေးဖို့ လုံလောက်အောင်ကောင်းမွန်မှုမရှိလို့ လူစာရင်းကနေ ချန်လှပ်ခဲ့တယ်လို့ ဆိုခဲ့ပါတယ်။

တူရကီအသင်းနဲ့ ကစားခဲ့တဲ့ ယူရို-၂၀၂၄ ပြိုင်ပွဲမှာ နယ်သာလန်အသင်းအတွက် ပွဲဦးထွက်ခဲ့တဲ့ ဇက်ခ်ဇီဟာ ဒီနောက်ပိုင်း နယ်သာလန်အသင်းရဲ့လူစာရင်းမှာ ပုံမှန်ပါဝင်ခဲ့ပေမယ့် ဒီလထဲကစားမယ့် စပိန်အသင်းနဲ့ UEFA Nations League ကွာတားဖိုင်နယ်ပွဲစဉ်အတွက် ပဏာမလူစာရင်းမှာတော့ ချန်လှပ်ခံခဲ့ရတာပါ။

ပြီးခဲ့တဲ့နွေရာသီအပြောင်းအရွှေ့ကာလက ဘိုလော့ဂ်နာအသင်းကနေ ပြောင်းရွှေ့လာခဲ့တဲ့ ဇက်ခ်ဇီဟာ မန်ယူနိုက်တက်အသင်းမှာ ပုံမှန်ခြေစွမ်းပြသနိုင်ဖို့ရုန်းကန်ခဲ့ရပြီး ဒီနောက်ပိုင်းမှာမှ ခြေစွမ်းကောင်းတွေပြသနိုင်ခဲ့တာဖြစ်ပါတယ်။ ဇက်ခ်ဇီဟာ ဒီရာသီမှာ မန်ယူနိုက်တက်အသင်းအတွက် ပြိုင်ပွဲစုံ(၄၂)ပွဲပါဝင်ကစားထားပေမယ့် (၆)ဂိုးသာသွင်းယူနိုင်ခဲ့ပြီး ဂိုးဖန်တီးမှု(၂)ကြိမ်ပြုလုပ်နိုင်ခဲ့ပါတယ်။

နယ်သာလန်အသင်းနည်းပြ ရော်နယ်လ်ကိုးမန်းဟာ Studio Voetbal နဲ့ ပြုလုပ်ခဲ့တဲ့ အင်တာဗျူးမှာ ဇက်ခ်ဇီဟာ လုံလောက်အောင်ကောင်းမွန်မှုမရှိတဲ့အတွက် သူ့ကို လူစာရင်းထဲခေါ်ယူဖို့ ထိုက်တန်မှုမရှိဘူးလို့ ဆိုခဲ့ပါတယ်။ ဒါပေမယ့် ဇက်ခ်ဇီအနေနဲ့ မန်ယူနိုက်တက်အသင်းမှာ ခြေစွမ်းကောင်းတွေပြသနိုင်ရင် လာမယ့်နိုင်ငံတကာပွဲတွေအတွက် နယ်သာလန်အသင်းလူစာရင်းမှာ ပြန်လည်ပါဝင်နိုင်မယ်လို့ ရော်နယ်လ်ကိုးမန်းက ဆိုခဲ့ပါတယ်။

ဇက်ခ်ဇီနဲ့အတူ မန်ယူနိုက်တက်နောက်ခံလူ ဒီလစ်လည်း နယ်သာလန်အသင်းလူစာရင်းမှာ မပါဝင်ဘဲချန်လှပ်ခံခဲ့ရပါတယ်။ ပြီးခဲ့တဲ့ နွေရာသီအပြောင်းအရွှေ့ကာလမှာ ဘိုင်ယန်မြူးနစ်အသင်းကနေ ရောက်ရှိလာခဲ့တဲ့ ဒီလစ်ဟာ မန်ယူနိုက်တက်အသင်းမှာ ပုံမှန်ကစားခွင့်ရနေပေမယ့် ပြီးခဲ့တဲ့ နယ်သာလန်အသင်းရဲ့ပွဲတွေမှာ အမှားအယွင်းတွေပြုလုပ်ခဲ့တာဖြစ်ပါတယ်။