ကွန်းဖရန့်လိဂ်ဖလားရယူပြီး ဥရောပဖလား(၃)ခုစလုံးကို ပိုင်ဆိုင်တဲ့ပထမဆုံးအသင်းဖြစ်လာတဲ့ ချယ်လ်ဆီး
ကွန်းဖရန့်လိဂ်ဗိုလ်လုပွဲ
ရီးရဲလ်ဘက်တစ်(၁-၄)ချယ်လ်ဆီး
ဥရောပဖလား(၃)လုံးအနကိ တတိယတန်းစားဖလားဖြစ်တဲ့ ကွန်းဖရန့်လိဂ်ဖလားကို ဒီရာသီမှာ ဥရောပအသင်းကြီးဖြစ်တဲ့ ချယ်လ်ဆီးက ရယူဆွတ်ခူးခဲ့ပါတယ်။ စပိန်ကလပ် ရီးရဲလ်ဘက်တစ်အသင်းကို (၄-၁)ဂိုးနဲ့ အနိုင်ယူခဲ့တာဖြစ်ပြီး ဒီရာသီမှာ လန်ဒန်မြို့ခံကလပ် စပါးနဲ့ ချယ်လ်ဆီးအသင်းတို့က ဥရောပဖလား(၂)လုံးကို ရယူပိုင်ဆိုင်ခဲ့ကြတာပါ။
ချယ်လ်ဆီးအသင်းအနေနဲ့ ဒီဲပြိုင်ပွဲမှာ ဗိုလ်စွဲဖို့ ရေပန်းအစားဆုံးဖြစ်သလို (၁၂)ပွဲကစားရာမှာ (၁၁)ပွဲအထိ အနိုင်ရခဲ့တာမှန်ပေမယ့် ဗိုလ်လုပွဲမှာတော့ ပွဲကို ခက်ခက်ခဲခဲစတင်ခဲ့ရပါတယ်။
ပထမပိုင်းမှာ ဘက်တစ်အသင်းက ပိုမိုသာလွန်တဲ့ ဂိုးဖန်တီးမှုတွေ၊ ဂိုးကန်ချက်တွေနဲ့ ချယ်လ်ဆီးအသင်းကို အကြိမ်ကြိမ်ခြိမ်းခြောက်ခဲ့ပြီး ပွဲချိန်(၉)မိနစ်မှာကတည်းက ချယ်လ်ဆီးနောက်ခံလူ ဂတ်စတိုရဲ့အမှားကနေ ဘောလုံးရယူခဲ့တဲ့ အစ္စကို ဖန်တီးပေးခဲ့တာကို ဘယ်တောင်ပံကစားသမားအက်ဇယ်ဇူလီက ထောင့်ဖြတ်ကန်သွင်းယူခဲ့ပါတယ်။
ဒီဂိုးနဲ့ ဘက်တစ်က ဒုတိယပိုင်း မိနစ်(၆၀)ကျော်အထိ ဦးဆောင်ခဲ့ပြီး ချယ်လ်ဆီးအသင်းအတွက် ပွဲချိန်(၆၅)မိနစ်မှာ အန်ဇိုဖာနန်ဒက်ဇ်၊ (၇၀)မိနစ်မှာ ဂျက်ဆန်တို့ကဂိုးတွေပြန်သွင်းကာ ချယ်လ်ဆီးက တစ်ကျော့ပြန် ဦးဆောင်ခဲ့ပါတယ်။
ပွဲချိန်(၈၃)မိနစ်မှာ ဆန်ချိုက ချယ်လ်ဆီးအသင်းအတွက် အနိုင်သေချာစေမယ့်ဂိုးကို သွင်းခဲ့သလို ပွဲချိန်(၉၀)မိနစ်မှာ ကိုင်စီဒိုက ပွဲသိမ်းဂိုးသွင်းပြီး စပိန်ကလပ်အသင်း ပြန်မလာနိုင်အောင် ပွဲကို အဆုံးသတ်ပေးခဲ့ပါတယ်။
ချယ်လ်ဆီးအသင်းဟာ ကွန်းဖရန့်လိဂ်ဖလားကို ဆွတ်ခူးတဲ့ (၄)သင်းမြောက်အသင်းဖြစ်လာပြီး ရှေ့မှာ ရိုးမား၊ ဝက်စ်ဟမ်း၊ အိုလံပီယာကော့စ်အသင်းတို့က ချန်ပီယံဖြစ်ထားကြပါတယ်။
ဥရောပဘောလုံးလောကမှာတော့ ချယ်လ်ဆီးအသင်းဟာ ချန်ပီယံလိဂ်၊ ယူရိုပါလိဂ်၊ ကွန်းဖရန့်လိဂ်အစရှိတဲ့ ပြိုင်ပွဲ(၃)ရပ်လုံးမှာ ချန်ပီယံဆုရယူနိုင်တဲ့ ပထမဆုံးအသင်းအဖြစ် မှတ်တမ်းရေးထိုးနိုင်ခဲ့ပါတယ်။
