ဒီနေ့ကစားမယ့် ချန်ပီယံလိဂ် Round of 16 (ဒုတိယအကျော့)ပွဲစဉ် လီဗာပူးလ်-PSG ပွဲမတိုင်မီမှာ လီဗာပူးလ်ပရိသတ်တွေအတွက် စိုးရိမ်စရာ သတင်းတစ်ပုဒ် ထွက်ပေါ်လာခဲ့ပါတယ်။

အဲဒါကတော့ ဒီပွဲအတွက်လေ့ကျင့်နေတဲ့ လီဗာပူးလ်အသင်းလေ့ကျင့်ရေးကွင်းမှာ အီဂျစ်တိုက်စစ်မှူးဆာလာနဲ့ အင်္ဂလန်နောက်ခံလူအာနိုးလ်တို့ တစ်ဦးနဲ့တစ်ဦး ဆွဲလားရမ်းလားတွန်းထိုး အချင်းများနေလို့ အသင်းဖော်တွေက ဝင်ရောက်ဖျန်​ဖြေခဲ့ရတဲ့သတင်းပါ။

ဒါက ချန်ပီယံလိဂ်ဖလား၊ ပရီးမီးယားလိဂ်ဖလား၊ လိဂ်ဖလားပြိုင်ပွဲတွေမှာ ချန်ပီယံအဖြစ်အောင်ပွဲခံနိုင်ဖို့ ပစ်မှတ်ထားကြိုးပမ်းနေတဲ့ လီဗာပူးလ်အသင်းအတွက် ပန်းတိုင်မရောက်ခင် ကြီးမားတဲ့အတားအဆီး ဖြစ်လာမယ့် အသင်းစည်းလုံးမှုပြိုကွဲတဲ့ပြဿနာဖြစ်လာနိုင်ပါတယ်။

အားကစားသတင်းအေဂျင်စီတစ်ခုဖြစ်တဲ့ Hayters TV မှာ ဖော်ပြခဲ့တဲ့ ဗီဒီယိုအရ ဆာလာနဲ့ အာနိုးလ်ကြားကို အီလီယော့၊ ကိုနာတေးအစရှိတဲ့ အသင်းဖော်ကစားသမားတွေက ဝင်ရောက်ပြီး အခြေအနေကို ပိုမိုဆိုးရွားမလာအောင် ကာကွယ်တားဆီးခဲ့ရတာကို တွေ့ရပါတယ်။

ဆာလာနဲ့ အာနိုးလ်က လီဗာပူးလ်အသင်းမှာ ပုံရိပ်ကြီးမားတဲ့ကစားသမားတွေဖြစ်ကြပြီး နှစ်ဦးစလုံးက အနာဂတ်လှုပ်ခတ်နေကြသူတွေလည်း ဖြစ်ကြပါတယ်။ ဆာလာက စာချုပ်သစ်အတွက် သဘောတူညီမှုမရသေးသလို၊ အာနိုးလ်ကလည်း စပိန်ကလပ် ရီးရဲလ်မက်ဒရစ်အသင်းက နွေရာသီမှာ အရခေါ်ယူဖို့ ပစ်မှတ်ထားခံနေရသူပါ။

ဒါကြောင့် သူတို့အကြား တင်းမာမှုက သူတို့ရဲ့အနာဂတ်တွေကိုပါ အပြောင်းအလဲဖြစ်လာစေနိုင်မလား .. လာမယ့်ရာသီမှာ သူတို့နှစ်ဦးစလုံးကို လီဗာပူးလ်မှာ အတူဆက်တွေ့ရပါ့မလားဆိုတာလည်း တွေးစရာဖြစ်စေပါတယ်။

ချန်ပီယံလိဂ် Round of 16 (ပထမအကျော့)မှာ လီဗာပူးလ်အသင်းက PSG အသင်းကို ပြင်သစ်မြေမှာ (၁-၀)ဂိုးနဲ့ အနိုင်ရထားပါတယ်။ လီဗာပူးလ်အသင်းနိုင်ခဲ့ပေမယ့် အဲဒီပွဲက လီဗာပူးလ်အသင်းရဲ့ခြေစွမ်းနဲ့ ဂိုးမရခဲ့တဲ့ PSG အသင်းရဲ့ကြောက်မက်ဖွယ်တိုက်စစ်ဆင်မှုတွေက ဒုတိယအကျော့ပွဲအတွက် လီဗာပူးလ်အသင်းကို စိုးရိမ်ပူပန်မှုတွေ ဖြစ်ပေါ်စေပါတယ်။

ဒါကြောင့် လီဗာပူးလ်လေ့ကျင့်ရေးကွင်းက ဆာလာနဲ့ အာနိုးလ် အချင်းများတဲ့ပြဿနာက ဒီပွဲကို ဘယ်လောက်ထိ သက်ရောက်ဦးမလဲဆိုတာ လီဗာပူးလ်ပရိသတ်တွေအတွက် စိုးရိမ်စရာပါပဲ။