ချယ်လ်ဆီးနဲ့ပွဲအပေါ်မူတည်ပြီး ယူရိုပါလိဂ်ဗိုလ်လုပွဲအသင်းရွေးချယ်မယ်လို့ မန်ယူနိုက်တက်ကစားသမားတွေကို နည်းပြအာမိုရင်သတိပေး
ဒီနေ့ကစားမယ့် ချယ်လ်ဆီး-မန်ယူနိုက်တက် ပရီးမီးယားလိဂ်ပွဲမတိုင်မီပြုလုပ်ခဲ့တဲ့ ပွဲကြိုမီဒီယာတွေ့ဆုံမှုမှာ မန်ယူနိုက်တက်အသင်းနည်းပြအာမိုရင်က ဒီပွဲက ခြေစွမ်းတွေအပေါ်မူတည်ပြီး လာမယ့်ယူရိုပါလိဂ်ဗိုလ်လုပွဲအတွက် အသင်းရွေးချယ်သွားမယ်လို့ အသင်းကစားသမားတွေကို သတိပေးမှုပြုလုပ်ခဲ့ပါတယ်။
မန်ယူနိုက်တက်အသင်းဟာ နောက်ဆုံးကစားခဲ့တဲ့ ပရီးမီးယားလိဂ်(၇)ပွဲမှာ ရမှတ်(၂)မှတ်သာရယူနိုင်ခဲ့ပြီး အဆိုးရွားဆုံးအဆင့်ရပ်တည်မှုအဖြစ် အဆင့်(၁၆)နေရာမှာ ရပ်တည်နေတာဖြစ်ပါတယ်။ မန်ယူနိုက်တက်အသင်းဟာ ပရီးမီးယားလိဂ်မှာ ဘာမျှော်လင့်ချက်မှမရှိတော့တဲ့အတွက် ချယ်လ်ဆီးအသင်းနဲ့ပွဲစဉ်မှာ ကစားသမားအပြောင်းအလဲတွေပြုလုပ်လာဖို့ ရှိနေတာပါ။ ဒါပေမယ့် မန်ယူနိုက်တက်အသင်းနည်းပြအာမိုရင်က ယူရိုပါလိဂ်ဗိုလ်လုပွဲအတွက် အသင်းကိုမရွေးချယ်ရသေးဘူးလို့ ဆိုထားပါတယ်။
အာမိုရင်က"ချယ်လ်ဆီးအသင်းနဲ့ပွဲအတွက် ပွဲထွက်လူစာရင်းကို စဉ်းစားထားပြီးသားပါ။ ချယ်လ်ဆီးအသင်းနဲ့ပွဲက ကစားပုံကိုမြင်တွေ့ရမှာဖြစ်ပြီး ဒါက နောက်လာမယ့်ပွဲအတွက် အရေးကြီးပါတယ်။ ဗိုလ်လုပွဲအတွက် ပြင်ဆင်ဖို့ အကောင်းဆုံးအရာက ပွဲကစားတာဖြစ်ပြီး ဒီပွဲမှာ ပါဝင်ကစားခွင့်ရ/မရက ဗိုလ်လုပွဲနဲ့မဆိုင်ဘူးဆိုတာ ကစားသမားတွေနားလည်ရမှာပါ။ ချယ်လ်ဆီးအသင်းနဲ့ပွဲကိုပဲ အာရုံစိုက်ထားတယ်"လို့ ဆိုခဲ့တာဖြစ်ပါတယ်။
မန်ယူနိုက်တက်အသင်းဟာ အဓိကနောက်ခံလူတွေဖြစ်တဲ့ ယိုရိုနဲ့ ဒီလစ်တို့ ဒဏ်ရာကြောင့် ယူရိုပါလိဂ်ဗိုလ်လုပွဲလွဲချော်မှာကို စိုးရိမ်မှုတွေရှိနေသလို ချယ်လ်ဆီးအသင်းနဲ့ပွဲစဉ်မှာ နောက်ထပ်အဓိက ကစားသမားတွေ ဒဏ်ရာရရှိမှာကို အသင်းပရိသတ်တွေက စိုးရိမ်မှုတွေရှိနေကြတာပါ။ မန်ယူနိုက်တက်အသင်းဟာ ချယ်လ်ဆီးအသင်းနဲ့ပွဲအတွက် ထွက်ခွာခဲ့တဲ့ အသင်းလူစာရင်းမှာ ဒဏ်ရာရနေတဲ့ ကစားသမားတွေကလွဲပြီး လူစုံခေါ်သွားခဲ့တာဖြစ်ပါတယ်။
