လာလီဂါချန်ပီယံဖြစ်ခဲ့တဲ့ ဘာစီလိုနာအသင်းကို အသင်းခေါင်းဆောင်ဟောင်း မက်ဆီဂုဏ်ပြု
အင်တာမိုင်ယာမီအသင်းခေါင်းဆောင်မက်ဆီဟာ ၂၀၂၄-၂၅ ရာသီ လာလီဂါပြိုင်ပွဲမှာ ချန်ပီယံဖြစ်ခဲ့တဲ့ အသင်းဟောင်း ဘာစီလိုနာအသင်းကို သူ့ရဲ့ဆိုရှယ်မီဒီယာကနေ ဂုဏ်ပြုခဲ့ပါတယ်။ ဘာစီလိုနာအသင်းဟာ အက်စ်ပန်ညိုအသင်းကို (၂-၀)ဂိုးနဲ့ အနိုင်ရခဲ့ပြီးနောက် လာလီဂါဖလားကို(၂၈)ကြိမ်မြောက်ရယူနိုင်ခဲ့တာပါ။
ဘာစီလိုနာအသင်းဟာ အသင်းခေါင်းဆောင် မက်ဆီထွက်ခွာခဲ့တဲ့ ၂၀၂၁ ခုနှစ်နောက်ပိုင်း ဒီရာသီဟာ သူတို့ရဲ့အကောင်းဆုံးရာသီတစ်ခုလို ဖြစ်နေခဲ့ပါတယ်။ ဘာစီလိုနာအသင်းဟာ ဒီရာသီမှာ လာလီဂါဖလားအပြင် စပိန်စူပါဖလားနဲ့ စပိန်ဘုရင့်ဖလားချန်ပီယံဆုတွေကို ရယူနိုင်ခဲ့ပြီး ချန်ပီယံလိဂ်ပြိုင်ပွဲမှာ ဆီမီးဖိုင်နယ်အဆင့်ထိ တက်နိုင်ခဲ့တာပါ။
မက်ဆီဟာ ဘာစီလိုနာအသင်းရဲ့ဘဏ္ဍာရေးအခက်အခဲကြောင့် မထွက်ခွာချင်ဘဲ ထွက်ခွာခဲ့ရပေမယ့် သူနှစ်ပေါင်းများစွာကစားခဲ့တဲ့ အသင်းနဲ့ ဆက်ဆံရေးကောင်းတွေရှိနေတာဖြစ်ပါတယ်။ အခုလည်း မက်ဆီဟာ ဘာစီလိုနာအသင်းလာလီဂါချန်ပီယံအဖြစ် အောင်ပွဲခံခွင့်ရခဲ့ပြီးနောက် အသင်းရဲ့ပေ့ခ်ျမှာတင်ထားတဲ့ ဆုဖလားပုံကို သူ့ရဲ့Instagram Story မှာတင်ကာ ဂုဏ်ပြုကြောင်း ရေးသားခဲ့တာပါ။
မက်ဆီဟာ PSG အသင်းနဲ့ စာချုပ်ကုန်ဆုံးခဲ့တဲ့ ၂၀၂၃ ခုနှစ်နွေရာသီမှာ အသင်းဟောင်း ဘာစီလိုနာအသင်းထံ ပြန်လာဖို့ ချိတ်ဆက်မှုခံခဲ့ရပါတယ်။ ဒါပေမယ့် မက်ဆီဟာ မေဂျာလိဂ်ကလပ် အင်တာမိုင်ယာမီအသင်းထံ ပြောင်းရွှေ့ခဲ့တာပါ။ မက်ဆီဟာ ပြီးခဲ့တဲ့ရာသီတွေမှာ အင်တာမိုင်ယာမီအသင်းနဲ့ အောင်မြင်မှုရခဲ့ပေမယ့် ဒီရာသီမှာတော့ ရုန်းကန်နေရတာဖြစ်ပါတယ်။
