ပေါ်တူဂီနိုင်ငံ၊ လစ္စဘွန်းမြို့တွင် ခရီးသွားများအကြား ရေပန်းစားသော သမိုင်းဝင် တောင်တက်လျှပ်စစ်ရထား (funicular) တစ်စင်း လမ်းချော်တိမ်းမှောက်ခဲ့ရာ အနည်းဆုံး လူ ၁၅ ဦး သေဆုံးပြီး အခြား ၁၈ ဦး ဒဏ်ရာရရှိခဲ့ကြောင်း အရေးပေါ်ကယ်ဆယ်ရေးဌာနများက အတည်ပြုခဲ့သည်။

အမျိုးသားဆေးဘက်ဆိုင်ရာ အရေးပေါ်အခြေအနေဆိုင်ရာ အင်စတီကျု၏ အဆိုအရ ဒဏ်ရာရရှိသူများထဲတွင် ကလေးတစ်ဦးအပါအဝင် ၅ ဦးမှာ စိုးရိမ်ရသည့် အခြေအနေတွင် ရှိနေသည်။

မျက်မြင်သက်သေတစ်ဦး၏ ပြောကြားချက်အရ လူ ၄၀ ခန့် လိုက်ပါနိုင်သော အဆိုပါရထားသည် မတ်စောက်သော တောင်စောင်းလမ်းအတိုင်း "အရှိန်ပြင်းစွာ" ထိုးဆင်းလာပြီး အဆောက်အအုံတစ်ခုကို ဝင်တိုက်မိခဲ့ခြင်းဖြစ်သည်။ မီးသတ်သမားများ၏ ကနဦးသုံးသပ်ချက်အရ ရထား၏ကေဘယ်ကြိုး ပြတ်တောက်သွားခြင်းကြောင့် ယခုကဲ့သို့ အရှိန်လွန်ကာ တိမ်းမှောက်မှုဖြစ်ပွားခဲ့ခြင်း ဖြစ်နိုင်သည်ဟု ဆိုသည်။

လစ္စဘွန်းမြို့တော်ဝန် ကားလို့စ် မိုဒက်စ် (Carlos Moedas) က ဤဖြစ်ရပ်ဆိုးကြောင့် မြို့တော်တစ်ခုလုံး ဝမ်းနည်းပူဆွေးနေရပြီး ဤကဲ့သို့သော ကြေကွဲဖွယ်ရာဖြစ်ရပ်မျိုး မြို့၏သမိုင်းတွင် တစ်ခါမှမကြုံဖူးကြောင်း ပြောကြားခဲ့သည်။ ပေါ်တူဂီနိုင်ငံသည် နိုင်ငံတော်အဆင့် ဝမ်းနည်းခြင်းအထိမ်းအမှတ်အဖြစ် သုံးရက်ကြာသတ်မှတ်ကြောင်း ကြေညာခဲ့သည်။

ရထားလမ်းချော်ရသည့် အကြောင်းအရင်းကို တိတိကျကျ မသိရှိရသေးဘဲ တရားစီရင်ရေးရဲတပ်ဖွဲ့၏ လူသတ်မှုစုံစမ်းစစ်ဆေးရေးဌာနခွဲက စုံစမ်းစစ်ဆေးမှုများ ပြုလုပ်လျက်ရှိသည်။