လီဗာပူးလ်အသင်းက ထွက်ခွာမယ့် အသင်းဖော်အာနိုးလ်ကို ဆာလာ မက်ဆေ့ချ်ပေးပို့
အီဂျစ်တိုက်စစ်ကစားသမား ဆာလာဟာ ဒီရာသီကုန်ရင် လီဗာပူးလ်အသင်းက ထွက်ခွာမယ်လို့ အတည်ပြုခဲ့တဲ့ အသင်းဖော်ညာနောက်လူ အာနိုးလ်ကို သူ့ရဲ့ဆိုရှယ်မီဒီယာကနေ မက်ဆေ့ချ်ပေးပို့သွားခဲ့ပါတယ်။ အာနိုးလ်က လီဗာပူးလ်အသင်းကနေ ထွက်ခွာဖို့ဟာ သူ့ဘဝရဲ့အခက်အခဲဆုံး ဆုံးဖြတ်ချက်ဖြစ်တယ်လို့ အသင်းပရိသတ်တွေကို ဆိုထားပါတယ်။
အာနိုးလ်ဟာ လီဗာပူးလ်အသင်းကနေ ထွက်ခွာမယ့်အကြောင်း ကြေညာခဲ့ပြီးနောက် ပရိသတ်တွေဆီကနေ တုံ့ပြန်မှုအမျိုးမျိုးရရှိခဲ့ပြီး အချို့က အသင်းမှာ နှစ်ပေါင်း(၂၀)ကြာကစားခဲ့တဲ့အတွက် ကျေးဇူးတင်ကြောင်း ဖော်ပြခဲ့သလို အချို့ကတော့ အသင်းကနေ အလွတ်နဲ့ ထွက်ခွာခဲ့တဲ့အပေါ် သစ္စာဖောက်အဖြစ် ဖော်ပြခဲ့ကြတာဖြစ်ပါတယ်။ အာနိုးလ်ဟာ လီဗာပူးလ်အသင်းမှာ ဆုဖလား(၈)ခုရယူနိုင်ခဲ့ပြီး ကမ္ဘာ့ဘောလုံးလောကရဲ့အကောင်းဆုံးညာနောက်ခံလူတစ်ဦးအဖြစ် သတ်မှတ်ခြင်းခံခဲ့ရတာပါ။
လီဗာပူးလ်အသင်းမှာ အာနိုးလ်နဲ့အတူ နှစ်ပေါင်းများစွာကြာ တွဲကစားခဲ့တဲ့ ဆာလာဟာ အာနိုးလ်ထွက်ခွာမယ့်အပေါ် သူ့ရဲ့ခံစားချက်ကို ဆိုရှယ်မီဒီယာ X မှာရေးသားခဲ့ပါတယ်။
ဆာလာက "မင်းနဲ့ အထူးရင်းနှီးမှုကို မျှဝေခဲ့ရပြီး အတူတွဲကစားခဲ့ရတာဟာ ဝမ်းသာဖို့ကောင်းခဲ့ပါတယ်။ မင်းအကောင်းဆုံးဖြစ်ဖို့ ဆုတောင်းပြီး ငါတို့တွေ ပြန်ပြီးထပ်တွေ့ကြမယ်ဆိုတာ သေချာတယ်"လို့ ဆိုထားတာပါ။
လီဗာပူးလ်အသင်းဟာ လာမယ့်ပရီးမီးယားလိဂ်ပွဲစဉ်အဖြစ် အာဆင်နယ်အသင်းကို အန်ဖီးလ်မှာ ဧည့်ခံရမှာဖြစ်ပြီး ဒီပွဲမှာ အသင်းပရိသတ်တွေက အာနိုးလ်ကို ဘယ်လိုတုံ့ပြန်မှုတွေ ပြုလုပ်ကြမလဲဆိုတာ စိတ်ဝင်စားဖို့ကောင်းနေတာဖြစ်ပါတယ်။