ဒဏ်ရာကြောင့် အနားယူနေရတဲ့ နယ်သာလန်တောင်ပံကစားသမား ဂတ်ပိုဟာ လီဗာပူးလ်အသင်းရဲ့အရေးပါတဲ့ ရက်သတ္တပတ်မတိုင်ခင် လေ့ကျင့်ခန်းအစီအစဉ်မှာ ပြန်လည်ပါဝင်လာခဲ့ပါတယ်။

လီဗာပူးလ်အသင်းဟာ ဒီနေ့မှာ PSG အသင်းနဲ့ ချန်ပီယံလိဂ် Round of 16 ဒုတိယအကျော့ပွဲစဉ်ယှဉ်ပြိုင်ရမှာဖြစ်ပြီး ဒီပွဲပြီးရင် နယူးကာဆယ်အသင်းနဲ့ ကာရာဘောင်းလိဂ်ဖလားဗိုလ်လုပွဲ ယှဉ်ပြိုင်ရဖို့ရှိနေတာပါ။

လီဗာပူးလ်အသင်းဟာ ပရီးမီးယားလိဂ်ပြိုင်ပွဲမှာလည်း အမှတ်ပေးဇယားအဆင့်(၂)နေရာက အာဆင်နယ်အသင်းထက် (၁)ပွဲပိုကစားထားပြီး ရမှတ် (၁၅)မှတ်အသာရကာ ထိပ်ဆုံးနေရာမှာ ရပ်တည်နေတာဖြစ်ပါတယ်။ လီဗာပူးလ်အသင်းရဲ့ဒီရာသီအရေးကြီးတဲ့အဆင့်မှာ ဒဏ်ရာကြောင့် အနားယူနေရတဲ့ ဂတ်ပို လေ့ကျင့်ခန်းအစီအစဉ်မှာ ပြန်ပါဝင်နိုင်ခဲ့တာက သူတို့အတွက် သတင်းကောင်းဖြစ်ခဲ့တာပါ။

ဂတ်ပိုဟာ လီဗာပူးလ်အသင်းနောက်ဆုံးကစားခဲ့တဲ့ (၆)ပွဲမှာ (၄)ပွဲပါဝင်နိုင်ခဲ့ခြင်းမရှိပါဘူး။ ဒါပေမယ့် ဂတ်ပိုဟာ ဒဏ်ရာကနေ သက်သာလာပြီဖြစ်လို့ ဒီနေ့ကစားမယ့် PSG အသင်းနဲ့ပွဲအတွက် လီဗာပူးလ်အသင်းလူစာရင်းထဲမှာ ပါဝင်လာဖို့ရှိနေပါတယ်။ ဂတ်ပိုဟာ ဒီရာသီမှာ လီဗာပူးလ်အသင်းအတွက် ပြိုင်ပွဲစုံ(၃၈)ပွဲပါဝင်ကစားထားပြီး (၁၆)ဂိုးသွင်းယူကာ ဂိုးဖန်တီးမှု(၅)ကြိမ် ပြုလုပ်ထားတာပါ။

ဂတ်ပိုဒဏ်ရာကနေ သက်သာလာပြီဖြစ်လို့ လီဗာပူးလ်အသင်းရဲ့ဒဏ်ရာရစာရင်းထဲမှာ နောက်ခံလူတွေဖြစ်တဲ့ ဂိုးမက်ဇ်နဲ့ ဘရက်ဒလေတို့သာ ရှိတော့တာဖြစ်ပါတယ်။ ဂိုးမက်စ်ဟာ ရာသီမကုန်ခင်မှာ လီဗာပူးလ်အသင်းအတွက်ပြန်ပါဝင်နိုင်မှာဖြစ်ပြီး ဘရက်ဒလေကတော့ ပေါင်ဒဏ်ရာကြောင့် အနားယူနေရတာပါ။ လီဗာပူးလ်အသင်းဟာ ချန်ပီယံလိဂ် Round of 16 မှာ PSG အသင်းကို ကျော်ဖြတ်နိုင်ခဲ့ရင် ကွာတားဖိုင်နယ်မှာ အက်စတွန်ဗီလာအသင်းနဲ့ ယှဉ်ပြိုင်ရဖို့ရှိနေတာဖြစ်ပါတယ်။