ထိုင်းနိုင်ငံမှာ Grab, Bolt လိုမျိုး Ride-Hailing App တွေကနေတဆင့် ဝန်ဆောင်မှုပေးနေတဲ့ ယာဉ်မောင်းတွေအတွက် စည်းကမ်းချက်အသစ်တွေကို အစိုးရက တရားဝင်ကြေညာလိုက်ပါပြီ။ ဒီစည်းမျဉ်းသစ်တွေဟာ ခရီးသည်တွေရဲ့ ဘေးကင်းလုံခြုံမှုနဲ့ အကာအကွယ်ပေးမှုကို အဓိကထားပြီး တင်းကျပ်လိုက်တာဖြစ်ပါတယ်။

အဓိကပြောင်းလဲသွားမယ့် စည်းကမ်းချက်များ

၁။ Public License မဖြစ်မနေလိုအပ်: Ride-Hailing ယာဉ်မောင်းအားလုံး (ကားနှင့် ဆိုင်ကယ်) ဟာ သူတို့ရဲ့ ကိုယ်ပိုင်ယာဉ်တွေကို "အများပြည်သူသုံးယာဉ်" အဖြစ် မှတ်ပုံတင်ရမှာဖြစ်ပြီး "အများပြည်သူသုံးယာဉ်မောင်းလိုင်စင်" ကို မဖြစ်မနေ ကိုင်ဆောင်ရမှာဖြစ်ပါတယ်။ 

၂။ သက်ရောက်မည့်အချိန်: ဒီစည်းမျဉ်းအသစ်တွေဟာ ဇူလိုင်လ ၉ ရက်နေ့မှာ ကြေညာခဲ့ပြီး ရက်ပေါင်း ၉၀ အကြာ၊ ၂၀၂၅ ခုနှစ် အောက်တိုဘာလအစောပိုင်းမှာ စတင်အသက်ဝင်မှာဖြစ်ပါတယ်။

၃။ လုံခြုံရေးဆိုင်ရာ သတ်မှတ်ချက်များ: ယာဉ်မောင်းတွေဟာ နေ့စဉ် မျက်နှာကို Scan ဖတ်ပြီး (Facial Recognition) အထောက်အထားစစ်ဆေးရမှာဖြစ်သလို၊ GPS တည်နေရာကိုလည်း အချိန်နဲ့တပြေးညီ မျှဝေရမှာဖြစ်ပါတယ်။ 

ဒီစည်းမျဉ်းတွေဟာ မီတာတက္ကစီတွေနဲ့ App-based တက္ကစီတွေကြားက တရားမျှတမှုရှိစေဖို့နဲ့ ဝန်ဆောင်မှုအရည်အသွေးကို မြှင့်တင်ဖို့ ရည်ရွယ်တယ်လို့ ထိုင်းအစိုးရက ထုတ်ပြန်ထားပါတယ်။