လမ်းတစ်လမ်းပဲခြားတဲ့ ပါရီမြို့ခံအသင်း(၂)သင်း

ပြင်သစ်ကလပ် PSG အသင်းက ပြင်သစ်နိုင်ငံမြို့တော် ပါရီမြို့ကို ကိုယ်စားပြုတဲ့တစ်သင်းတည်းသောအသင်းအဖြစ် ပြင်သစ်လိဂ်မှာ ယှဉ်ပြိုင်နေတာအတော်ကြာခဲ့ပါပြီ။ လာမယ့်ရာသီမှာတော့ ပါရီမြို့ခံအသင်း(၂)သင်း ပြင်သစ်လိဂ်မှာ ယှဉ်ပြိုင်တာကို ပရိသတ်တွေ မြင်တွေ့ရမှာဖြစ်ပါတယ်။

ဒီရာသီ ပြင်သစ်လိဂ်-၂ (Ligue 2)အမှတ်ပေးဇယား ဒုတိယနေရာမှာ ရပ်​တည်နေတဲ့ Paris FC အသင်းဟာ လာမယ့်ရာသီ ပြင်သစ်လိဂ်-၁ (Ligue 1)ကို တန်းတက်ယှဉ်ပြိုင်ခွင့်ရခဲ့တာကြောင့်ပါ။

လွန်ခဲ့တဲ့(၄၆)နှစ်က ပြင်သစ်အဆင့်အမြင့်ဆုံးလိဂ်ပြိုင်ပွဲမှာ ယှဉ်ပြိုင်ခဲ့ဖူးပြီး အခုမှဒီအခွင့်အရေးပြန်ရတဲ့ Paris FC အသင်းဟာ အရင်က သူတို့အသုံးပြုခဲ့တဲ့အိမ်ကွင်း Stade Sebastien Charlety ကို စွန့်လွှတ်ခဲ့ပြီး လာမယ့်ရာသီမှာ ကွင်းသစ်အဖြစ် Stade Jean-Bouin ကွင်းကို အသုံးပြုမှာပါ။

ဒီကွင်းက လက်ရှိ PSG အသင်းရဲ့အိမ်ကွင်းဖြစ်တဲ့ Parc des Princes ကွင်းနဲ့ ဘယ်လောက်အထိ ဝေးသလဲဆိုရင် လမ်းတစ်လမ်းပဲ ခြားပါတယ်။ လာမယ့်ရာသီ ပြင်သစ်လိဂ်မှာ ပါရီမြို့ခံပြိုင်ဘက်တွေအဖြစ် ယှဉ်ပြိုင်ရတော့မယ့် PSG အသင်းနဲ့ Paris FC အသင်းတို့ဟာ ကမ္ဘာပေါ်မှာ အနီးဆုံးမြို့ခံပြိုင်ဘက်အသင်းတွေဖြစ်လာဖွယ်ရှိနေပါတယ်။

မြန်မာလူချမ်းသာတွေအကြိုက် LV (Louis Vuitton)အသုံးအဆောင်တွေ ထုတ်လုပ်တဲ့ LVMH ကုမ္ပဏီရဲ့ တည်ထောင်သူနဲ့ CEO ဘာနက်အာနော့ ရှယ်ယာအများစုပိုင်ဆိုင်တဲ့ Paris FC အသင်းအနေနဲ့ ပါရီမြို့မှာသာမက ပြင်သစ်လိဂ်ပြိုင်ပွဲတစ်ခုလုံးမှာ ဘုရင်လို မင်းမူနေတဲ့ PSG အသင်းကို ပုခုံးချင်းယှဉ်နိုင်မလားဆိုတာတော့ ကြည့်ရမှာပါ။