လုပ်ပွဲအရှုပ်တော်ပုံမှာ ပါဝင်ခဲ့တဲ့ ကွင်းလယ်ဒိုင်လူကြီးဖိလစ်ဇွာယာကို ယူရိုပါလိဂ်ဗိုလ်လုပွဲမှာ ကိုင်တွယ်ဖို့ UEFA ခန့်အပ်

ဥရောပဘောလုံးအဖွဲ့ချုပ်(UEFA)ဟာ လုပ်ပွဲအရှုပ်တော်ပုံမှာပါဝင်ခဲ့မှုကြောင့် ပွဲပယ်ခံခဲ့ရဖူးတဲ့ ကွင်းလယ်ဒိုင်လူကြီး ဖိလစ်ဇွာယာကို မန်ယူနိုက်တက်-စပါး ယူရိုပါလိဂ်ဗိုလ်လုပွဲကို ကိုင်တွယ်ဖို့ ခန့်အပ်တာဝန်ပေးခဲ့ပါတယ်။ ယူရိုပါလိဂ်ဗိုလ်လုပွဲဟာ ဖိလစ်ဇွာယာအတွက် ပထမဆုံးကိုင်တွယ်မယ့် ဥရောပကလပ်ဗိုလ်လုပွဲဖြစ်လာမှာပါ။

အသက်(၄၃)နှစ်အရွယ်ရှိ ဖိလစ်ဇွာယာဟာ ပွဲတစ်ပွဲမှာ ပေါင်(၂၅၀)လာဘ်စားခဲ့တာကြောင့် ဂျာမန်ဘောလုံးအဖွဲ့ချုပ်က သူ့ကို(၆)လပွဲကိုင်တွယ်ခွင့်ဆိုင်းငံ့ခဲ့တာဖြစ်ပါတယ်။ ဒီနောက်ပိုင်းမှာ ဖိလစ်ဇွာယာဟာ ပွဲကြီးပွဲကောင်းအချို့ကိုတာဝန်ယူကိုင်တွယ်ခွင့်ရရှိလာခဲ့တာပါ။ ဖိလစ်ဇွာယာဟာ ၂၀၂၃ UEFA Nations League ဗိုလ်လုပွဲ၊အင်္ဂလန်အသင်းက ဆွစ်ဇာလန်အသင်းကို အနိုင်ရခဲ့တဲ့ ယူရို-၂၀၂၄ ဆီမီးဖိုင်နယ်ပွဲစဉ်တွေကို ကိုင်တွယ်ခဲ့တာဖြစ်ပါတယ်။

ဒါ့အပြင် ဖိလစ်ဇွာယာဟာ ပြီးခဲ့တဲ့ရက်သတ္တပတ်က PSG အသင်းက အာဆင်နယ်အသင်းကို (၂-၁)ဂိုးနဲ့ အနိုင်ရခဲ့တဲ့ ချန်ပီယံလိဂ်ဆီမီးဖိုင်နယ်(ဒုတိယအကျော့)ပွဲစဉ်ကိုတာဝန်ယူခဲ့တာပါ။ ဖိလစ်ဇွာယာဟာ ဒီပွဲမှာ VAR စစ်ဆေးမှုပြုလုပ်ပြီးနောက် PSG အသင်းဘက်ကို အငြင်းပွားဖွယ်ပယ်နယ်တီပေးတဲ့ ဆုံးဖြတ်ချက်ကို ပြုလုပ်ခဲ့ပါတယ်။ ရီးရဲလ်မက်ဒရစ်အသင်းကွင်းလယ်လူ ဘယ်လင်ဂမ်ဟာ လွန်ခဲ့တဲ့ ၂၀၂၁ ခုနှစ်က ဒေါ့မွန်အသင်းမှာ ကစားချိန် ဖိလစ်ဇွာယာကို ဒိုင်လူကြီးအဖြစ်ခန့်အပ်မှုအတွက် ဝေဖန်ခဲ့လို့ ပေါင်(၃၄,၀၀၀)ဒဏ်ကြေးငွေ ချမှတ်ခံခဲ့ရတာပါ။

ဖိလစ်ဇွာယာဟာ ဒီရာသီမှာ ချန်ပီယံလိဂ်၊ယူရိုပါလိဂ်ပွဲအပါအဝင် ပြိုင်ပွဲစုံ(၃၇)ပွဲ ကွင်းလယ်ဒိုင်လူကြီးအဖြစ် တာဝန်ယူကိုင်တွယ်ထားတာဖြစ်ပါတယ်။