မန်ယူနိုက်တက်အသင်းရဲ့ပူးတွဲပိုင်ရှင်ဖြစ်တဲ့ ဗြိတိန်ဘီလျံနာ ဆာဂျင်ရက်ကလစ်ဖ်က မိမိတို့အနေနဲ့ အပြောင်းအလဲတွေသာ မလုပ်ရင် ဘဏ္ဍာရေးအခက်မခဲတွေကြောင့် ခရစ္စမတ်မှာ မန်ယူနိုက်တက်အသင်းရဲ့ငွေတွေကုန်သွားမယ်လို့ BBC Sport နဲ့ ပြုလုပ်ခဲ့တဲ့ အင်တာဗျူးမှာ ဆိုခဲ့ပါတယ်။

ပြီးခဲ့တဲ့နှစ်က မန်ယူနိုက်တက်အသင်းရဲ့ရှယ်ယာ (၂၈.၉၄)% ကို ပေါင်(၁.၃)ဘီလီယံနဲ့ ဝယ်ယူခဲ့တဲ့ ဆာဂျင်ရက်ကလစ်ဖ်ရဲ့INEOS ဟာ မန်ယူနိုက်တက်အသင်းရဲ့ဘောလုံးနဲ့ ပတ်သက်တဲ့ လည်ပတ်မှုတွေကို ထိန်းချုပ်ပြီး ငွေကြေးအသုံးစရိတ်လျှော့ချမှုတွေကို ပြင်းပြင်းထန်ထန် လုပ်ဆောင်နေတာပါ။

ဆာဂျင်ရက်ကလစ်ဖ်ရဲ့INEOS ဟာ မန်ယူနိုက်တက်အသင်းကို ရောက်ရှိလာချိန်ကစတင်ပြီး ဘဏ္ဍာရေးအခက်အခဲတွေကို ဖြေရှင်းနေရတာကြောင့် ဝန်ထမ်းတွေအများအပြားလျှော့ချတာအပါအဝင် အသုံးစရိတ်တွေကို ကန့်သတ်နေတာဖြစ်ပါတယ်။ INEOS ဟာ လက်မှတ်ဈေးနှုန်းတွေတိုးတာ၊ဝန်ထမ်းတွေကို နေ့လည်စာကျွေးနေတဲ့ အစီအစဉ်ကို ဖယ်ရှားတာတွေပါ ပြုလုပ်ခဲ့တာပါ။ ထောင်နဲ့ ချီတဲ့ မန်ယူနိုက်တက်အသင်းပရိသတ်တွေဟာ ပြီးခဲ့တဲ့ အာဆင်နယ်အသင်းနဲ့ ပွဲမတိုင်ခင်မှာ ပိုင်ရှင်တွေကို ဆန့်ကျင်တဲ့ ဆန္ဒပြမှုတွေကို ပြုလုပ်ခဲ့ကြပါတယ်။

ဆာဂျင်ရက်ကလစ်ဖ်က "အခုအချိန်မှာ ကျွန်တော်က လူကြိုက်မများဘူးဆိုတာကို သိပါတယ်။ ဒါပေမယ့် ကျွန်တော်တို့လုပ်နေတဲ့အရာတွေက မှန်ကန်တယ်လို့ ယုံကြည်ပါတယ်။ ကျွန်တော်တို့အနေနဲ့ အခုလုပ်နေတဲ့ အရာတွေကိုမလုပ်နိုင်ရင် ခရစ္စမတ်မှာ ကလပ်က ငွေတွေကုန်သွားမှာပါ"လို့ဆိုခဲ့ပါတယ်။

ဒ့ါအပြင် ဆာဂျင်ရက်ကလစ်ဖ်က ကလပ်အသင်းအနေနဲ့ သူတို့ရတဲ့ငွေထက် ပိုပြီးသုံးစွဲနိုင်ရင် ပျက်ဆီးသွားနိုင်တယ်လို့လည်း ဆိုခဲ့တာပါ။ မန်ယူနိုက်တက်အသင်းဟာ ဒီရာသီမှာ ရလဒ်ဆိုးတွေနဲ့ ရုန်းကန်နေရပြီး ပရီးမီးယားလိဂ်ပြိုင်ပွဲမှာ အမှတ်ပေးဇယားအဆင့်(၁၄)နေရာမှာ ရပ်တည်နေပါတယ်။