မန်စီးတီး-ဝုလ်ဗ်စ်ပွဲမှာ အနိုင်ဂိုးသွင်းယူပြီးနောက် မန်စီးတီးအသင်းကို ဒီဘရိုင်းနားထိုးနှက်
မန်စီးတီးအသင်းက ဝုလ်ဗ်စ်အသင်းကို (၁-ဝ)ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ ခြေစွမ်းပြသပြီး အနိုင်ဂိုးသွင်းယူခဲ့တဲ့ ဘယ်လ်ဂျီယံကွင်းလယ်လူ ဒီဘရိုင်းနားဟာ မန်စီးတီးအသင်းကို ထိုးနှက်မှုပြုလုပ်ခဲ့ပါတယ်။ ဒီဘရိုင်းနားဟာ ဒီရာသီကုန်ရင် မန်စီးတီးအသင်းနဲ့ စာချုပ်ကုန်ဆုံးမှာဖြစ်လို့ (၁၀) စုနှစ်တစ်ခုကြာကစားခဲ့တဲ့ အသင်းကနေ ထွက်ခွာတော့မယ်လို့ ကြေညာထားတာပါ။
ဒီဘရိုင်းနားဟာ မန်စီးတီးအသင်းက သူ့ကို စာချုပ်သက်တမ်းတိုးဖို့ မကမ်းလှမ်းခဲ့တဲ့အပေါ် စိတ်ပျက်မိကြောင်းပြောထားသလို နောက်ထပ်ပရီးမီးယားလိဂ်ကလပ်အသင်းတစ်သင်းထံ ပြောင်းရွှေ့ဖို့လည်း လမ်းဖွင့်ထားတာဖြစ်ပါတယ်။ ဒီဘရိုင်းနားဟာ ဝုလ်ဗ်စ်အသင်းနဲ့ ပွဲအပြီးပြုလုပ်ခဲ့တဲ့ အင်တာဗျူးမှာ သူ့ရဲ့ခံစားချက်တွေကို ထပ်ပြီးအသိပေးလာခဲ့တာပါ။
ဒီဘရိုင်းနားက"ကျွန်တော်ဟာ ပရီးမီးယားလိဂ်မှာကစားနိုင်သေးတယ်ဆိုတာကို ပြသခဲ့ပါတယ်။ ဒီလိုမှမဟုတ်ရင် နောက်ဆုံး(၄)ပတ် ဒါမှမဟုတ် (၅)ပတ်အတွင်းမှာ ကျွန်တော်အခုစွမ်းဆောင်ခဲ့သလို လုပ်နိုင်မှာမဟုတ်ပါဘူး။ အီးတီဟတ်မှာ တစ်ပွဲပဲကစားဖို့ကျန်တော့တယ်ဆိုတာကို သိပေမယ့် ကျွန်တော်အမြဲတမ်းလုပ်ခဲ့သလိုပဲ ဒီပွဲမှာလည်း အကောင်းဆုံးကြိုးစားခဲ့ပါတယ်။ ဒါကြောင့် ကိုယ်လုပ်ခဲ့တဲ့အလုပ်အတွက် ဂုဏ်ယူတယ်"လို့ဆိုခဲ့ပါတယ်။
ဒါ့အပြင် ဒီဘရိုင်းနားက မန်စီးတီးအသင်းဖော်တွေနဲ့ စကားပြောခဲ့ပြီး သူတို့တွေဟာ သူထွက်ခွာမှာကို ဝမ်းနည်းနေကြတယ်လို့ ဆိုခဲ့တာပါ။ ဒီဘရိုင်းနားကို ခေါ်ယူဖို့ ပရီးမီးယားလိဂ်ကလပ် အက်စတွန်ဗီလာအသင်းက စိတ်ဝင်စားနေတယ်လို့ သတင်းတွေထွက်နေသလို မေဂျာလိဂ်ကလပ် ချီကာဂိုအသင်းနဲ့ ဆွေးနွေးမှုတွေပြုလုပ်နေတယ်လို့ လည်း သိရပါတယ်။
