မန်ယူနိုက်တက်အသင်းနဲ့ခြေစမ်းမယ့် ASEAN-All Stars အသင်းမှာပါဝင်ကစားဖို့ AFF ရဲ့ရွေးချယ်ခြင်းခံရတဲ့ မောင်မောင်လွင်
လာမယ့် မေလ(၂၈)ရက်၊ မလေးရှားနိုင်ငံ၊ ကွာလာလမ်ပူမြို့က ဘူကစ်ဂျာလီကွင်းမှာ ကစားမယ့် မန်ယူနိုက်တက်အသင်းနဲ့ အာဆီယံညွန့်ပေါင်း (ASEAN-All Stars)အသင်းတို့ခြေစမ်းပွဲမှာ ပါဝင်ကစားဖို့ မြန်မာ့လက်ရွေးစင်ကွင်းလယ်လူမောင်မောင်လွင် ဖိတ်ကြားခံခဲ့ရပါတယ်။
ASEAN-All Stars အသင်းမှာ ပါဝင်ကစားဖို့ မောင်မောင်လွင်ကို ရွေးချယ်ကြောင်း အရှေ့တောင်အာရှဘောလုံးအဖွဲ့ချုပ် (AFF)က မြန်မာနိုင်ငံဘောလုံးအဖွဲ့ချုပ်(MFF)ထံ တရားဝင် ဆက်သွယ်အကြောင်းကြားခဲ့တာဖြစ်ပါတယ်။
မောင်မောင်လွင်ဟာ မြန်မာ့လက်ရွေးစင်အသင်းမှာ အဓိက ကစားသမားတစ်ဦးအဖြစ် ပါဝင်ကစားနေသလို ထိုင်းပရီးမီးယားလိဂ်ကလပ် Lamphun Warrior FC အသင်းမှာလည်း ခြေစွမ်းပြကစားနေတာကြောင့် အာဆီယံညွန့်ပေါင်းအသင်းအတွက် မြန်မာနိုင်ငံကိုယ်စားပြု ရွေးချယ်ခြင်း ဖြစ်ကြောင်း AFF ကထုတ်ပြန်ခဲ့ပါတယ်။
မောင်မောင်လွင်က ဒီလိုရွေးချယ်ခံရတဲ့အတွက် မယုံကြည်နိုင်အောင် ဖြစ်ခဲ့ရကြောင်းနဲ့ သူ့ကိုယ်သူ ဂုဏ်ယူမိတယ်လို့ သူ့ရဲ့ ဆိုရှယ်မီဒီယာ (Facebook)မှာ ဖော်ပြခဲ့ပါတယ်။
ASEAN-All Stars အသင်းနည်းပြချုပ်အဖြစ် ဗီယက်နမ်လက်ရွေးစင်အသင်းနည်းပြ MR. Kim Sang-Sik ကတာဝန်ယူ ဆောင်ရွက်မှာဖြစ်ပါတယ်။
မန်ယူနိုက်တက်အသင်းဟာ လာမယ့် ၂၀၂၅ နွေရာသီကာလအတွင်း အာရှဒေသကို ခြေစမ်းခရီးလာရောက်မှာဖြစ်ပြီး မေလ(၂၈)ရက်မှာ ASEAN-All Stars အသင်း၊ မေလ(၃၀)ရက်မှာ ဟောင်ကောင်လက်ရွေးစင်အသင်းတို့နဲ့ ခြေစမ်းပွဲတွေ ကစားသွားမှာပါ။
အဲဒီနောက် ဇူလိုင်(၁၉)ရက်နေ့မှာ ဆွီဒင်နိုင်ငံ၊ စတော့ဟုမ်းမြို့မှာ လိဒ်စ်ယူနိုက်တက်အသင်း၊ ဇူလိုင်(၂၆)ရက်နေ့မှာ အမေရိကန်နိုင်ငံ၊ နယူးဂျာစီမှာ ဝက်စ်ဟမ်းအသင်း၊ ဇူလိုင်(၃၀)ရက်နေ့မှာ ချီကာဂိုမှာ ဘုန်းမောက်အသင်း၊ ဩဂုတ်(၃)ရက်နေ့မှာ အတ္တလန်တာမှာ အဲဗာတန်အသင်းတို့နဲ့ နွေရာသီခြေစမ်းပွဲတွေကို ကစားသွားမှာဖြစ်ပါတယ်။
