မန်ယူနိုက်တက်အတွက် ကစားပေးချင်တဲ့ ကစားသမားကိုပဲမိမိလိုချင်တယ်လို့ ယောကရက်စ်ရဲ့အပြောင်းအရွှေ့အပေါ် အာမိုရင်တုံ့ပြန်
လာမယ့်နွေရာသီအပြောင်းအရွှေ့ကာလမှာ စပို့တင်းလစ္စဘွန်းအသင်းတိုက်စစ်မှူး ယောကရက်စ်ကို ခေါ်ယူဖို့ ချိတ်ဆက်နေတဲ့ အပြောင်းအရွှေ့နဲ့ ပတ်သက်ပြီး မီဒီယာတွေက မေးမြန်းခဲ့ရာမှာ နည်းပြအာမိုရင်က အသင်းအတွက် ကစားပေးချင်တဲ့ ကစားသမားကိုပဲလိုချင်တယ်လို့ တုံ့ပြန်ခဲ့ပါတယ်။
ဒီရာသီမှာ တိုက်စစ်ပိုင်းအခက်အခဲကြောင့် သွင်းဂိုးတွေသွင်းယူနိုင်ဖို့ ရုန်းကန်နေရတဲ့ မန်ယူနိုက်တက်အသင်းဟာ လာမယ့်နွေရာသီမှာ စပို့တင်းလစ္စဘွန်းတိုက်စစ်မှူး ယောကရက်စ်အပါအဝင် တိုက်စစ်မှူးအချို့ကို ခေါ်ယူဖို့ ပစ်မှတ်ထားနေတာပါ။
ပရီးမီးယားလိဂ်အမှတ်ပေးဇယားအဆင့်(၁၄)နေရာမှာ ရပ်တည်နေတဲ့ မန်ယူနိုက်တက်အသင်းဟာ ယူရိုပါလိဂ်ပြိုင်ပွဲမှာ ဆီမီးဖိုင်နယ်ကို ရောက်ရှိနေပြီး ဒီပြိုင်ပွဲမှာ ဗိုလ်စွဲရင် လာမယ့်ရာသီချန်ပီယံလိဂ်ပြိုင်ပွဲ ယှဉ်ပြိုင်ခွင့်ရရှိမှာဖြစ်ပါတယ်။ မန်ယူနိုက်တက်အသင်းနည်းပြ အာမိုရင်ဟာ သူ့ရဲ့လက်ထက်မှာ လက်ချီအသင်းနောက်ခံလူ ဒေါဂူတစ်ဦးတည်းကိုသာ ခေါ်ယူထားပြီး လာမယ့်နွေရာသီမှာ ကစားသမားသစ်တွေကို အားဖြည့်ဖို့ စီစဉ်နေတာပါ။
မန်ယူနိုက်တက်အသင်းရဲ့ချိတ်ဆက်မှုပြုလုပ်နေတဲ့ ယောကရက်စ်ဟာ စပို့တင်းလစ္စဘွန်းအသင်းမှာ နည်းပြအာမိုရင်နဲ့ အတူလက်တွဲခဲ့သူဖြစ်ပါတယ်။ အဲ့ဒါကြောင့် မန်ယူနိုက်တက်အသင်းမှာ ယောကရက်စ်နဲ့ ထပ်ပြီးလက်တွဲအလုပ်လုပ်ရတာကို မြင်တွေ့ရမလားဆိုပြီး နည်းပြအာမိုရင်ဟာ ဘီလ်ဘာအိုအသင်းနဲ့ ယူရိုပါလိဂ်ဆီမီးဖိုင်နယ်(ပထမအကျော့)ပွဲစဉ်မတိုင်မီ မီဒီယာတွေ့ဆုံမှုမှာ မေးမြန်းခံခဲ့ရတာပါ။
အာမိုရင်က "ကျွန်တော် သူနဲ့ စကားမပြောထားပါဘူး။ ဒါပေမယ့် ကစားသမားတစ်ဦးက ချန်ပီယံလိဂ်ကစားဖို့ မန်ယူနိုက်တက်အသင်းထံ လာချင်တယ်ဆိုရင် သူမလာသင့်ပါဘူး။ ကျွန်တော်တို့ဟာ အသင်းကို ကိုယ်စားပြုချင်တဲ့ ကစားသမားကိုပဲ လိုချင်တာပါ။ အချို့ပြိုင်ပွဲတွေမှာ ကစားချင်တဲ့ ကစားသမားတွေမဟုတ်ဘူး"လို့ ဆိုခဲ့ပါတယ်။
နွေရာသီမှာ စပို့တင်းလစ္စဘွန်းအသင်းကနေ ထွက်ခွာဖို့ရည်ရွယ်ထားတဲ့ ယောကရက်စ်ဟာ ချန်ပီယံလိဂ်ပြိုင်ပွဲမှာ ကစားချင်တာကြောင့် လာမယ့်ရာသီချန်ပီယံလိဂ်ပြိုင်ပွဲယှဉ်ပြိုင်တဲ့ အသင်းထံ ပြောင်းရွှေ့ချင်နေတာပါ။ စာချုပ်ဖျက်သိမ်းကြေးပေါင်သန်း(၆၀)နဲ့ ခေါ်ယူလို့ရမယ့် ယောကရက်စ်ဟာ အာဆင်နယ်အသင်းထံ ပြောင်းရွှေ့ချင်နေတယ်လို့ သိရပါတယ်။
