ဆော်ဒီပရိုလိဂ်ကလပ် အယ်လ်ဟီလယ်အသင်းမှာကစားနေတဲ့ ပရီးမီးယားလိဂ်တိုက်စစ်မှူးဟောင်း မီထရိုဗစ်ဟာ နှလုံးခုန်နှုန်းမြန်ခဲ့တာကြောင့် တနင်္ဂနွေနေ့က ဆေးရုံကိုအလျင်အမြန်ပို့ခံခဲ့ရပါတယ်။

မီထရိုဗစ်ဟာ ရုပ်ပိုင်းဆိုင်ရာဖီစီးမှုကြောင့် ဖြစ်ပေါ်လာတဲ့ နှလုံးခုန်နှုန်းအခြေအနေအတွက် လေ့ကျင့်ခန်းအစီအစဉ်ကို လွဲချော်ခဲ့ပြီး အယ်လ်ဟီလယ်အသင်းရဲ့အာရှချန်ပီယံလိဂ်ပွဲကို ပါဝင်နိုင်ဖို့လည်း မသေချာကြောင်း သိရပါတယ်။

၂၀၂၃ ခုနှစ်နွေရာသီက ဖူလ်ဟမ်အသင်းကနေ ပြောင်းရွှေ့လာခဲ့တဲ့ မီထရိုဗစ်ရဲ့ကျန်းမာရေးအခြေအနေကို အယ်လ်ဟီလယ်အသင်းက စောင့်ကြည့်မှုတွေပြုလုပ်နေပါတယ်။ ပြီးခဲ့တဲ့ရာသီက အယ်လ်ဟီလယ်အသင်းဆုဖလားတွေရယူနိုင်ဖို့အတွက် အဓိကအခန်းကဏ္ဍကနေ ပါဝင်ခဲ့တဲ့ မီထရိုဗစ်ဟာ ဒီရာသီမှာ ဒဏ်ရာကြောင့် ပွဲအများအပြားကို လွဲချော်ထားတာပါ။ ဒါပေမယ့် မီထရိုဗစ်ဟာ ဒီရာသီဆော်ဒီပရိုလိဂ်ပြိုင်ပွဲမှာ (၁၃)ဂိုးသွင်းယူထားပြီး ထိပ်တန်းဂိုးသွင်းရှင်စာရင်းထဲမှာ ပါဝင်နေပါတယ်။

မီထရိုဗစ်ဟာ သူ့ရဲ့နှလုံးခုန်နှုန်းအခြေအနေကို စမ်းသပ်စစ်ဆေးမှုတွေပြုလုပ်ပြီးနောက်မှာ စိုးရိမ်စရာမရှိတဲ့အတွက် ဆေးရုံကနေ ပြန်ဆင်းခဲ့ပြီ ဖြစ်ပါတယ်။ ဆားဘီးယားတိုက်စစ်မှူး မီထရိုဗစ်ဟာ တံကောက်ကြောဒဏ်ရာကနေ ပြန်သက်သာခဲ့လို့ မတ်(၃)ရက်ကမှ အယ်လ်ဟီလယ်အသင်းအတွက် ပြန်ကစားခဲ့ပြီး အယ်လ်ဖာယာအသင်းကို (၂-ဝ)ဂိုးနဲ့ အနိုင်ရခဲ့တဲ့ ဆော်ဒီပရိုလိဂ်ပွဲမှာ လူစားလဲဝင်ရောက်ကာ ဂိုးသွင်းယူနိုင်ခဲ့တာပါ။

မီထရိုဗစ်ဟာ ဒီရာသီမှာ အယ်လ်ဟီလယ်အသင်းအတွက် ပြိုင်ပွဲစုံ(၂၅)ပွဲပါဝင်ကစားထားပြီး (၂၁)ဂိုးသွင်းယူကာ ဂိုးဖန်တီးမှု(၃)ကြိမ်ပြုလုပ်ထားပါတယ်။ အယ်လ်ဟီလယ်အသင်းဟာ ဒီရာသီဆော်ဒီပရိုလိဂ်ပြိုင်ပွဲမှာ အမှတ်ပေးဇယားအဆင့်(၁)နေရာက အယ်လ်အစ်တီဟတ်အသင်းနဲ့ (၄)မှတ်အကွာ အဆင့်(၂)နေရာမှာ ရပ်တည်နေပါတယ်။