နောက်၅နှစ်မှာ AI ကိုထိန်းချုပ်ရန်ခက်ခဲနိုင်သည်ဟု AI Godfather သတိပေး
AI နည်းပညာဖန်တီးမှုတွင်အရေးပါပြီးအထင်ကရဖြစ်သူ Geoffrey Hinton ကို “AI ၏ GodFather” ဟုတင်စားခဲ့ကြဖူးပြီး သူက လူသားများအနေဖြင့် Artificial Intelligence (AI) အပေါ်ထိန်းချုပ်နိုင်မှုကို လာမည့်ငါးနှစ်အတွင်းခက်ခဲလာနိုင်သည်ဟုသတိပေးလာသည်။
မကြာသေးမီက အင်တာဗျူးတစ်ခုတွင် AI သည်၎င်းတို့၏ကိုယ်ပိုင်ကုဒ်ကို ပြန်လည်ရေးသားနိုင်သည့် စနစ်များ၏အန္တရာယ်ကိုမီးမောင်းထိုးပြခဲ့ပြီး သူ့တို့ကိုယ် သူတို့ပြန်လည်ထိန်းချုပ်နိုင်သည့်အဆင့်ထိရောက်ရှိလာမည်ဟုလဲသတိပေးထားသည်။
ယခုနှစ်အစောပိုင်းတွင် လွတ်လွတ်လပ်လပ်ပြောဆိုရန်အတွက် Google မှထွက်ခွာသွားပြီးနောက် အဆင့်မြင့် AI ၏ အတွင်းပိုင်းလက်တွေ့ကျကျလုပ်ဆောင်မှုများကို ထိပ်တန်းကျွမ်းကျင်သူများပင် နားလည်ရန် ရုန်းကန်နေရကြောင်း Hinton မှ မှတ်ချက်ပြုခဲ့သည်။
အထူးသဖြင့် ကျန်းမာရေးစောင့်ရှောက်မှုတွင် AI ၏ အကျိုးကျေးဇူးကိုအသိအမှတ်ပြုနေစဉ်တွင် ၎င်းက ချက်ခြင်းအရေးကြီးသောစည်းမျဉ်းစည်းကမ်းများနှင့် AI နည်းပညာသုံး စစ်ဘက်စက်ရုပ်များအပေါ် ကမ္ဘာလုံးဆိုင်ရာစည်းမျဉ်းကန့်သတ်ချက်ဖြင့်တားမြစ်ရန်တောင်းဆိုခဲ့သည်။
AI ကိုလူ့အဖွဲ့အစည်းအတွက်အကျိုးရှိအောင်အသုံးချနိုင်ရေးအတွက် တရားဝင်ကြီးကြပ်သည့်အဖွဲ့အစည်းမရှိခြင်း၊ AI ကြောင့်ဖြစ်ပေါ်တက်သော အမှားသတင်းများကြောင့် လူ့အဖွဲ့အစည်းသည်အရေးကြီးသော လမ်းဆုံနေရာတစ်ခုတွင်ရှိနေကြောင်းကိုလည်း Hinton သည်သတိပေးခဲ့သည်။
