One UI 8 လည်း ရတော့မှာလား
One UI 7 တောင် မရသေးတဲ့ ဖုန်းမော်ဒယ်တွေရှိသေးတယ်။ ရတဲ့မော်ဒယ်တွေလည်း ပူပူနွေးနွေးလေးပဲ ရှိသေးတာကို One UI 8 က ထွက်ဖို့ ရယ်ဒီဖြစ်နေတဲ့အပြင် မကြာခင်ထွက်မယ့် Galaxy Z Fold 7 နဲ့ Z Flip 7 နဲ့အတူ ရောက်ချလာတော့မယ့်ပုံစံပါပဲ။
Samsung အနေနဲ့ One UI 7 တောင် Galaxy S24 series မှာ အနည်းငယ်ပြဿနာတက်နေလို့ ဖြေရှင်းနေရပေမဲ့လည်း One UI 8 နဲ့ပတ်သက်ပြီး လုပ်ဆောင်တာတွေကတော့ ရပ်တန့်ထားခြင်းမရှိတဲ့ပုံပါပဲ။ နောက်ပြီး အရင်လို One UI 7.1/ 7.1.1 ဆိုပြီး ထုတ်မှာမဟုတ်ပဲ One UI 8 ဆိုပြီး ဖြစ်သွားမှာပါ။ အင်တာနက်ပေါ်မှာတော့ One UI 7 ထွက်လာတာ နောက်ကျတဲ့အတွက်လို့ ခန့်မှန်းထားကြပါတယ်။
အခု One UI 8 ထွက်ဖို့ကလည်း Samsung ဘက်က တရားဝင်ကြေညာထားတာတော့မဟုတ်ပါဘူး။ ဒါပေမဲ့လည်း One UI 8 ရမယ့် မော်ဒယ် list ကအစ ထွက်ထားပါတယ်။ နောက်ပြီး One UI 8 မှာ တွေ့ရမယ့် Gallery, Quick Share ပုံစံတွေလည်း leak ဖြစ်ထားပါတယ်။
One UI 8 ကတော့ Android 16 အပေါ် အခြေခံထားမှာပါ။ Google ဘက်ကလည်း Android 16 ကို ဇွန် ဒါမှမဟုတ် ဇူလှိုင်မှာ မိတ်ဆက်သွားဖို့ ပြောထားတာဆိုတော့ အဲကာလပိုင်းမှာ တွေ့ရဖို့များပါတယ်။
