ပြင်သစ်လိဂ်မှာအဝေးကွင်း(၃၉)ပွဲဆက်တိုက်မရှုံးအောင် ကစားပြီး အေစီမီလန်ရဲ့(၃၂)နှစ်ကြာစံချိန်ကို ရိုက်ချိုးခဲ့တဲ့ PSG
မနေ့ညက ကစားခဲ့တဲ့ ပြင်သစ်လိဂ်ပွဲမှာ ချန်ပီယံPSG အသင်းဟာ နန့်စ်အသင်းကို အဝေးကွင်းမှာ (၁-၁)ဂိုးနဲ့သရေကစားခဲ့ပြီးနောက် ဒီပြိုင်ပွဲမှာ အဝေးကွင်းရှုံးပွဲမရှိတာ (၃၉)ပွဲအထိ ရှိလာခဲ့ပါတယ်။
PSG အသင်းဟာ ဒီရာသီ ပြင်သစ်လိဂ်ပြိုင်ပွဲတစ်ခုလုံးမှာ ပွဲစဉ်(၃၀)အထိ ရှုံးပွဲလုံး၀မတွေ့အောင် ကစားထားသလို ဒီပြိုင်ပွဲမှာ အဝေးကွင်းရှုံးပွဲမတွေ့ခဲ့တာလည်း (၂)နှစ်ကျော်ရှိလာခဲ့ပြီဖြစ်ပါတယ်။
၂၀၂၃၊ ဖေဖော်ဝါရီ(၁၁)ရက်နေ့က မိုနာကိုအသင်းကို အဝေးကွင်းမှာ(၁-၃)ဂိုးနဲ့ ရှုံးနိမ့်ခဲ့တာက PSG အသင်းအတွက် အဝေးကွင်းလိဂ်ပွဲစဉ်တွေမှာ နောက်ဆုံးရှုံးနိမ့်ခဲ့တာဖြစ်ပါတယ်။
ဒါကြောင့် PSG အသင်းအနေနဲ့ တစ်ချိန်က စီးရီးအေကလပ် အေစီမီလန်အသင်းတင်ထားတဲ့ အမှတ်ပေးပြိုင်ပွဲအဝေးကွင်း(၃၈)ပွဲဆက်တိုက် ရှုံးပွဲမရှိစံချိန်ကို တစ်ပွဲအသာနဲ့ ကျော်ဖြတ်ကာ စံချိန်သစ်တင်နိုင်ခဲ့ပြီး ဥရောပထိပ်တန်းလိဂ်ပြိုင်ပွဲ(၅)ခုမှာ အမှတ်ပေးပြိုင်ပွဲအဝေးကွင်း ရှုံးပွဲမရှိအရှည်ကြာဆုံးအသင်းအဖြစ် မှတ်တမ်းဝင်နေပါတယ်။
အေစီမီလန်အသင်းကို နာမည်ကျော်နည်းပြကာပယ်လို ကိုင်တွယ်စဉ်အချိန်က ၁၉၉၁-၉၂ ရာသီမှာ တစ်ရာသီလုံးရှုံးပွဲမရှိခဲ့သလို ၁၉၉၂-၉၃ ရာသီမှာ တစ်ရာသီလုံးအဝေးကွင်းရှုံးပွဲမရှိခဲ့ဘဲ အဝေးကွင်းမှာ (၃၈)ပွဲဆက်တိုက် ရှုံးပွဲမရှိစံချိန်တင်ခဲ့တာပါ။
PSG အသင်းအနေနဲ့ ဒီရာသီပြင်သစ်လိဂ်မှာ တစ်ရာသီလုံးရှုံးပွဲမရှိကစားပြီး ဒီပြိုင်ပွဲမှာ ပထမဆုံး Invincible (ရှုံးပွဲမရှိ)ချန်ပီယံအဖြစ်လည်း မှတ်တမ်းသစ်ရေးထိုးဖွယ်ရှိနေပါတယ်။
