ပြင်သစ်လိဂ်ပြိုင်ပွဲသမိုင်းတစ်လျှောက် ပထမဆုံးရှုံးပွဲမရှိချန်ပီယံမှတ်တမ်းနဲ့ လွဲခဲ့ရတဲ့ PSG
PSG အသင်းဟာ မနေ့က ကစားခဲ့တဲ့ ပြင်သစ်လိဂ်ပွဲစဉ်မှာ နိုက်စ်အသင်းကို အိမ်ကွင်းမှာ (၁-၃)ဂိုးနဲ့ အရေးနိမ့်ခဲ့တာကြောင့် ပြင်သစ်လိဂ်ပြိုင်ပွဲသမိုင်းတစ်လျှောက် ပထမဆုံး ရှုံးပွဲမရှိချန်ပီယံအဖြစ် မှတ်တမ်းသစ်ရေးထိုးနိုင်မယ့် အခွင့်အရေးကို လက်လွှတ်ဆုံးရှုံးခဲ့ရပါတယ်။
ဥရောပထိပ်တန်းလိဂ်ပြိုင်ပွဲ(၅)ခုမှာ ပြင်သစ်လိဂ်လွဲလို့ ကျန်ထိပ်တန်းလိဂ်တွေဖြစ်တဲ့ အင်္ဂလန်၊ စပိန်၊ အီတလီ၊ ဂျာမနီလိဂ်ပြိုင်ပွဲတွေမှာ တစ်ရာသီအတွင်း ရှုံးပွဲမရှိချန်ပီယံအသင်းတွေ ထွက်ပေါ်ခဲ့ဖူးပါတယ်။
အင်္ဂလန်အမှတ်ပေးပြိုင်ပွဲမှာ ၁၈၈၉ ချန်ပီယံပရက်စတန်အသင်းက ရှုံးပွဲမရှိချန်ပီယံဖြစ်ခဲ့သလို၊ ၂၀၀၄ ပရီးမီးယားလိဂ်ချန်ပီယံ အာဆင်နယ်အသင်းကလည်း ရှုံးပွဲမရှိချန်ပီယံဖြစ်ခဲ့တာပါ။
စပိန်အမှတ်ပေးပြိုင်ပွဲမှာ ၁၉၃၀ ချန်ပီယံဘီလ်ဘာအိုအသင်းဟာ ရှုံးပွဲမရှိချန်ပီယံဖြစ်ခဲ့သလို၊ ၁၉၃၂ ချန်ပီယံရီးရဲလ်မက်ဒရစ်အသင်းကလည်း ရှုံးပွဲမရှိချန်ပီယံဖြစ်ခဲ့ပါတယ်။
အီတလီအမှတ်ပေးပြိုင်ပွဲမှာလည်း ၁၉၁၃ ချန်ပီယံဗာဆယ်လီအသင်း၊ ၁၉၂၃ ချန်ပီယံ ဂျီနိုအာအသင်း၊ ၁၉၇၉ ချန်ပီယံပီရူးဂျီယာအသင်း၊ ၁၉၉၂ ချန်ပီယံ အေစီမီလန်အသင်း၊ ၂၀၁၂ ချန်ပီယံဂျူဗင်တပ်စ်အသင်းတို့ဟာ ရှုံးပွဲမရှိချန်ပီယံအသင်းတွေပါ။
ဂျာမနီအမှတ်ပေးပြိုင်ပွဲမှာလည်း ၁၉၄၃ ချန်ပီယံဒရက်စ်ဒနာအသင်း၊ ၁၉၈၃ ချန်ပီယံ ဘာလင်နာဒိုင်နမိုအသင်း၊ ပြီးခဲ့တဲ့ရာသီ ချန်ပီယံ လေဗာကူဆင်အသင်းတို့ဟာ ရှုံးပွဲမရှိချန်ပီယံအသင်းတွေ ဖြစ်ပါတယ်။
အင်္ဂလန်၊ စပိန်၊ အီတလီ၊ ဂျာမနီလိဂ်ပြိုင်ပွဲတွေမှာ ဒီလို ရှုံးပွဲမရှိချန်ပီယံအသင်းတွေ ရှိခဲ့ပေမယ့် ပြင်သစ်လိဂ်ပြိုင်ပွဲမှာတော့ ပြိုင်ပွဲသမိုင်းတစ်လျှောက် တစ်သင်းတောင် မထွက်ပေါ်ခဲ့ဘဲ PSG အသင်းက ဒီရာသီမှာ အခွင့်အရေးရှိခဲ့တာဖြစ်ပြီး ပြိုင်ပွဲပြီးဖို့ (၄)ပွဲအလိုမှာ ဒီအဖိုးတန်မှတ်တမ်းကောင်းနဲ့ လွဲခဲ့တာပါ။
