ပြီးခဲ့တဲ့ နွေရာသီကမှ ဂျူဗင်တပ်စ်အသင်းရဲ့နည်းပြသစ်အဖြစ်ခန့်အပ်ခြင်းခံခဲ့ရတဲ့ အီတလီကစားသမားဟောင်း သီယာဂိုမော့တာဟာ လာမယ့်ဖီဖာကမ္ဘာ့ဖလားပြိုင်ပွဲမစတင်မီမှာ ထုတ်ပယ်ခံရဖွယ်ရှိနေပါတယ်။

ဂျူဗင်တပ်စ်အသင်းဘုတ်အဖွဲ့က သီယာဂိုမော့တာဟာ ကလပ်အသင်းကို ဦးဆောင်ကိုင်တွယ်ဖို့ သင့်တော်တဲ့ နည်းပြအဖြစ် မြင်တွေ့ရခြင်းမရှိတာကြောင့် ရာသီကုန်ချိန်မှာ လမ်းခွဲဖို့ စီစဉ်နေတာပါ။

ပြီးခဲ့တဲ့ရာသီက ဘိုလော့ဂ်နာအသင်းကို ရလဒ်ကောင်းတွေရယူပေးပြီး ချန်ပီယံလိဂ်ဝင်ခွင့်ရရှိအောင် ကိုင်တွယ်ပေးနိုင်ခဲ့တဲ့ သီယာဂိုမော့တာဟာ ဂျူဗင်တပ်စ်အသင်းကို အောင်မြင်မှုတွေရယူပေးနိုင်ဖို့ အလှမ်းဝေးနေခဲ့တာဖြစ်ပါတယ်။ ဂျူဗင်တပ်စ်အသင်းဟာ ဒီရာသီမှာ ချန်ပီယံလိဂ်ပြိုင်ပွဲနဲ့ ကိုပါအီတာလီယာဖလားပြိုင်ပွဲကနေ ထွက်ခွာထားရပြီး ဆုဖလားရယူနိုင်ဖို့ တစ်ခုတည်းသော မျှော်လင့်ချက်ဖြစ်တဲ့ စီးရီးအေပြိုင်ပွဲမှာလည်း ချန်ပီယံဆုပြေးလမ်းကြောင်းကနေ ထွက်ခွာရဖို့ သေချာနေတာပါ။

ဂျူဗင်တပ်စ်အသင်းဟာ နောက်ဆုံးကစားခဲ့တဲ့ စီးရီးအေပွဲစဉ်မှာ အတ္တလန်တာအသင်းကို (ဝ-၄)ဂိုးနဲ့ ဂိုးပြတ်အရေးနိမ့်ခဲ့ပြီးနောက် အမှတ်ပေးဇယားအဆင့်(၄)နေရာမှာ ရပ်တည်နေပေမယ့် အဆင့်(၁)နေရာက အင်တာမီလန်အသင်းနဲ့ (၉)မှတ်အထိ ကွာဟသွားခဲ့တာဖြစ်ပါတယ်။ အဲ့ဒါကြောင့် ဂျူဗင်တပ်စ်အသင်းဘုတ်အဖွဲ့ဟာ နည်းပြသီယာဂိုမော့တာကို ရာသီအကုန်မှာ ထုတ်ပယ်ဖို့ စဉ်းစားနေတာပါ။

La Gazzetta dello Sport က ဂျူဗင်တပ်စ်အသင်းနည်းပြသစ်ဖြစ်လာနိုင်တဲ့ စာရင်းထဲမှာ အတ္တလန်တာအသင်းနည်းပြ ဂတ်စ်ပါရီနီ၊ မာဆေးလ်အသင်းနည်းပြဒီဇာဘီနဲ့ နာပိုလီအသင်းနည်းပြ ကွန်တီတို့ပါဝင်နေတယ်လို့ ဖော်ပြထားပါတယ်။ လက်ရှိအချိန်မှာ သီယာဂိုမော့တာဟာ ဂျူဗင်တပ်စ်အသင်းကို စီးရီးအေအမှတ်ပေးဇယားထိပ်ဆုံး(၄)သင်းထဲ ဝင်ရောက်အောင် ကိုင်တွယ်ပေးရမှာဖြစ်ပြီး ဒီလိုမလုပ်ပေးနိုင်ရင်တော့ ရာသီကုန်ချိန်မှာ ထုတ်ပယ်ခံရဖို့ သေချာနေတာဖြစ်ပါတယ်။