မန်ယူနိုက်တက်နဲ့ အာဆင်နယ်အသင်း(၁-၁)ဂိုးစီသရေကျခဲ့တဲ့ ပရီးမီးယားလိဂ်ပွဲစဉ်အပြီးမှာ အာဆင်နယ်အသင်းနည်းပြ အာတီတာဟာ ပရီးမီးယားလိဂ်ဆုဖလားနဲ့ ပတ်သက်တဲ့မေးခွန်းကို ဖြေဖို့ငြင်းခဲ့ပြီး ဒေါသတကြီးနဲ့ TV အင်တာဗျူးကနေ ထွက်ခွာသွားခဲ့ပါတယ်။

မန်ယူနိုက်တက်အသင်းနဲ့ပွဲစဉ်အပါအဝင် နောက်ဆုံးကစားခဲ့တဲ့ ပရီးမီးယားလိဂ်(၃)ပွဲစလုံးနိုင်ပွဲပျောက်ဆုံးခဲ့တဲ့ အာဆင်နယ်အသင်းဟာ အမှတ်ပေးဇယားထိပ်ဆုံးနေရာမှာ ရပ်တည်နေတဲ့ လီဗာပူးလ်အသင်းထက် (၁)ပွဲလျော့ကစားထားပြီး ရမှတ်(၁၅)မှတ်အထိ ကွာဟသွားခဲ့တာပါ။

ဒီပွဲအပြီးမှာ Sky Sports သတင်းထောက် ပတ်ထရစ်ဒါဗီဆန်က အာဆင်နယ်အသင်းဟာ ပြီးခဲ့တဲ့ ဇန်နဝါရီအပြောင်းအရွှေ့ကာ တိုက်စစ်မှူးတစ်ဦးမခေါ်ယူခဲ့တဲ့အတွက် နောင်တရစရာရှိနေလားလို့ မေးမြန်းခဲ့ပါတယ်။ ဒါကိုအာတီတာက No လို့ပြောကာ ဒါနဲ့ပတ်သက်မှုမရှိဘူးလို့ ဖြေခဲ့ပါတယ်။ အာတီတာဟာ ဒီမေးခွန်းကို ဖြေပြီးနောက် အင်တာဗျူးကနေ ထွက်ခွာဖို့ ကြိုးပမ်းခဲ့တာပါ။

ဒါပေမယ့် ပက်ထရစ်ဒါဗီဆန်က အာတီတာကို နောက်ထပ်မေးခွန်းတစ်ခုထပ်မေးခဲ့ပါတယ်။ (၁၅)မှတ်ကွာဟနေတာက မများဘူးလားဆိုပြီး ချန်ပီယံဆုပြေးလမ်းကြောင်းနဲ့ပတ်သက်တဲ့ မေးခွန်းထပ်မေးချိန်မှာ အာတီတာက သူ့ကို ဒေါသထွက်နေတဲ့အကြည့်နဲ့ကြည့်ကာ ထွက်ခွာပြီး အင်တာဗျူးကို အဆုံးသတ်ခဲ့တာဖြစ်ပါတယ်။ အာတီတာဟာ ပွဲအပြီးမီဒီယာတွေ့ဆုံမှုမှာ ပရီးမီးယားလိဂ်ချန်ပီယံဆုအတွက် ပြီးဆုံးသွားပြီလားဆိုတာကို မပြောချင်ဘဲ အနိုင်မရခဲ့တဲ့အတွက် စိတ်ပျက်မိတယ်လို့ဆိုခဲ့တာပါ။