ပရီးမီးယားလိဂ်ပြိုင်ပွဲမှာ ဂိုးသမားတွေ ဂိုးဖန်တီးမှုစံချိန်တင်တဲ့ရာသီ
မနေ့က ကစားခဲ့တဲ့ ပရီးမီးယားလိဂ်ပွဲစဉ် နော်တင်ဟမ်ဖောရက်စ်(၀-၂)ဘရန့်ဖို့ဒ်ပွဲမှာ ဘရန့်ဖို့ဒ်ကွင်းလယ်တိုက်စစ်ကစားသမားဝစ်ဆာ သွင်းယူခဲ့တဲ့ဂိုးက ဘရန့်ဖို့ဒ်ဂိုးသမားမာ့ခ်ဖလက်ကန် တိုက်ရိုက်ကန်တင်ပေးပို့ခဲ့တာဖြစ်ပါတယ်။
ပွဲချိန်မိနစ်(၇၀)မှာ မာ့ခ်ဖလက်ကန် ပယ်နယ်တီဧရိယာထဲက တိုက်ရိုက်ကန်တင်လိုက်တဲ့ဘောလုံးကို ညာတောင်ပံက ပြေးတက်သွားတဲ့ ဝစ်ဆာက ဖောရက်စ်ဂိုးသမားကို ကျော်ပြီး ဂိုးထဲကန်သွင်းယူခဲ့တာပါ။
မာ့ခ်ဖလက်ကန်ဟာ ဒီရာသီ ပရီးမီးယားလိဂ်ပွဲစဉ် ဘရန့်ဖို့ဒ်(၄-၂)နယူးကာဆယ်ပွဲမှာလည်း နောက်ခံလူကောလင်းသွင်းယူခဲ့တဲ့ဂိုးကို တိုက်ရိုက်ဖန်တီးပေးပို့ပေးနိုင်ခဲ့တာကြောင့် ဒီရာသီမှာ သူ့ရဲ့ဂိုးဖန်တီးမှုက (၂)ကြိမ်ရှိလာခဲ့ပါတယ်။
ဒီရာသီပရီးမီးယားလိဂ်ပြိုင်ပွဲမှာ မန်စီးတီးဂိုးသမားအီဒါဆန်က ဂိုးဖန်တီးမှု(၄)ကြိမ်၊ ဖူလ်ဟမ်ဂိုးသမားဘန်းလေနို၊ အဲဗာတန်ဂိုးသမားဂျော်ဒန်ပစ်ဖို့ဒ်နဲ့ ဘရိုက်တန်ဂိုးသမားဗာဘရက်ဂ်ဂန်တို့က ဂိုးဖန်တီးမှု(၁)ကြိမ်စီ ပြုလုပ်ထားတာကြောင့် မာ့ခ်ဖလက်ကန်ရဲ့ဖန်တီးမှု(၂)ကြိမ်အပါအဝင် ဒီရာသီအတွင်းဂိုးသမားတွေရဲ့ ဂိုးဖန်တီးပေးပို့မှုက (၉)ကြိမ်အထိရှိလာပါတယ်။
အရင်က ပရီးမီးယားလိဂ်တစ်ရာသီအတွင်း ဂိုးသမားတွေရဲ့ ဂိုးဖန်တီးမှုအရေအတွက်အများဆုံးက (၈)ကြိမ်အထိသာရှိခဲ့တာကြောင့် ဒီရာသီက ဂိုးသမားတွေ ဂိုးဖန်တီးမှုအများဆုံးစံချိန်တင်တဲ့ရာသီအဖြစ် မှတ်တမ်းသစ်တစ်ခု ရေးထိုးနိုင်ခဲ့ပါတယ်။
