မနေ့က ကစားခဲ့တဲ့ပရီးမီးယားလိဂ်ပွဲတွေထဲမှာ လက်စတာအသင်းဟာ ချယ်လ်ဆီးအသင်းကို (၀-၁)ဂိုးနဲ့ ရှုံးနိမ့်ပြီး ပရီးမီးယားလိဂ်(၅)ပွဲဆက်ရှုံးပွဲကို ရင်ဆိုင်ခဲ့ရပါတယ်။

လက်ရှိနည်းပြဗန်နစ္စတယ်ရွိုင်းရဲ့လက်ထဲမှာတော့ လက်စတာအသင်းအနေနဲ့ ပရီးမီးယားလိဂ်ပွဲစဉ်(၁၂)ပွဲမြောက်ရှုံးနိမ့်တာဖြစ်ပါတယ်။

နည်းပြဗန်နစ္စတယ်ရွိုင်းအနေနဲ့ လက်စတာအသင်းကို ပရီးမီးယားလိဂ်ပွဲစဉ်(၁၅)ပွဲကိုင်တွယ်ပြီးချိန်မှာ ရှုံးပွဲ(၁၂)ပွဲအထိရှိနေတာကြောင့် ဒီအသင်းမှာ သူ့ရဲ့ပရီးမီးယားလိဂ် ပွဲရာခိုင်နှုန်းက (၈၀%)အထိရှိလာပါတယ်။

ပရီးမီးယားလိဂ်ပြိုင်ပွဲမှာ ပွဲအနည်းဆုံး(၁၅)ပွဲကိုင်တွယ်ခဲ့တဲ့နည်းပြတွေထဲမှာ ရှုံးပွဲရာခိုင်နှုန်း(၈၀%)နဲ့ အထက်ရှိတာ နစ္စတယ်ရွိုင်းအရင်က နည်းပြ(၂)ဦးသာရှိခဲ့ပါတယ်။

ဆန်းဒါးလန်းအသင်းမှာ ၂၀၀၃ ခုနှစ်ကနေ ၂၀၀၆ ခုနှစ်အထိ ကိုင်တွယ်သွားတဲ့ နည်းပြဟောင်းမစ်မက္ကာသီက ရှုံးပွဲရာခိုင်နှုန်း(၈၄%)ရှိခဲ့ပြီး၊ ဆောက်သမ်တန်အသင်းမှာ ၂၀၁၃ ခုနှစ်ဇွန်လကနေ ၂၀၂၄ ဒီဇင်ဘာလအထိ ကိုင်တွယ်ခဲ့တဲ့ ဆောက်သမ်တန်နည်းပြဟောင်း ရပ်ဆဲလ်မာတင်က ရှုံးပွဲရာခိုင်နှုန်း(၈၁%)ရှိခဲ့ကြတာပါ။

အခု မစ်မက္ကာသီနဲ့ ရပ်ဆဲလ်မာတင်တို့လိုပဲ နစ္စတယ်ရွိုင်းကလည်း ရှုံးပွဲရာခိုင်နှုန်း(၈၀%)အထိ ရောက်ရှိလာခဲ့တာပါ။

ဒါကြောင့် ပရီးမီးယားလိဂ်ပြိုင်ပွဲရဲ့ရှုံးပွဲရာခိုင်နှုန်း အများဆုံး(တစ်နည်းအားဖြင့်) ရလဒ်အဆိုးရွားဆုံးနည်းပြ(၃)ဦးစာရင်းမှာ နစ္စတယ်ရွိုင်းလည်းပါဝင်လာခဲ့ပြီလို့ ဆိုရမှာဖြစ်ပြီး သူ့အနေနဲ့ ဒီအခြေအနေဆိုးကနေ ရုန်းထွက်နိုင်မလား၊ လက်စတာအသင်းကရော သူကို အသင်းမှာ ဘယ်လောက်အထိ စိတ်ရှည်သည်းခံစွာဆက်ထားဦးမလဲဆိုတာ စိတ်ဝင်စားစရာပါပဲ။