ချန်ပီယံလိဂ် Round of 16 (ဒုတိယအကျော့) ပထမနေ့ပွဲစဉ်တွေအပြီးမှာ ဘာစီလိုနာ၊ အင်တာမီလန်၊ ဘိုင်ယန်မြူးနစ်၊ PSG တို့ ကွာတားဖိုင်နယ်တက်ခွင့်ရခဲ့ပြီး နာမည်ကြီး လီဗာပူးလ်အသင်းက ပြိုင်ပွဲကနေထွက်ခဲ့ရပါတယ်။
ပထမအကျော့အဝေးကွင်းမှာ (၁-၀)ဂိုးရလဒ်နဲ့ အနိုင်ရထားပြီး ဒုတိယအကျော့ကို အိမ်ကွင်းမှာ ကစားရပေမယ့် PSG အသင်းကို ပထမအကျော့ရလဒ်အတိုင်းပြန်ရှုံးပြီး ပယ်နယ်တီအဆုံးအဖြတ်နဲ့ ရှုံးနိမ့်ခဲ့ရတာ လီဗာပူးလ်အသင်းအတွက် အတော်ကို ကြေကွဲစရာကောင်းခဲ့ပါတယ်။
ဒီပွဲမှာလည်း ပထမအကျော့ကအတိုင်း PSG အသင်းတိုက်စစ်က လီဗာပူးလ် ဂိုးပေါက်ကို အတော်ခြိမ်းခြောက်နိုင်ခဲ့ပြီး လီဗာပူးလ်အသင်းထက် ပိုသာတဲ့၊ ထိရောက်တဲ့ ဂိုးကန်သွင်းမှုတွေကို ပြုလုပ်နိုင်ခဲ့ပါတယ်။
ပထမအကျော့ကအတိုင်း လီဗာပူးလ်ဂိုးသမားအယ်လစ်ဆန်က လက်စွမ်းပြကာကွယ်နိုင်ခဲ့ပေမယ့် ပွဲချိန်(၁၂)မိနစ်မှာ နောက်တန်းနဲ့ ဂိုးသမားအကြားနားလည်မှုလွဲမှားတာက PSG တိုက်စစ်မှူးဒမ်ဘီလီကို အလွယ်တကူ ဂိုးသွင်းယူနိုင်စေခဲ့ပါတယ်။
လီဗာပူးလ်ဘက်က ကန်သွင်းချက်တွေကို PSG ဂိုးသမား ဒွန်နာရမ်မာ လက်စွမ်းပြကာကွယ်နိုင်တာကြောင့်လည်း လီဗာပူးလ်ဂိုးမရခဲ့ဘဲ အချိန်ပိုမိနစ်(၁၂၀)ပြီးတဲ့အထိ နှစ်ကျော့ပေါင်း(၁-၁)ဖြစ်ခဲ့ပြီး ပယ်နယ်တီအဆုံးအဖြတ်ခံခဲ့ရတာပါ။
ပယ်နယ်တီမှာ PSG က အလုံးတိုင်းကို ဝင်အောင်ကန်နိုင်ခဲ့ပေမယ် လီဗာပူးလ်ဘက်က နူနက်ဇ်နဲ့ ကာတစ်ဂျုံးစ်တို့ ကန်ချက်တွေကို ဒွန်နာရမ်မာ ကာကွယ်နိုင်ခဲ့တာကြောင့် လီဗာပူးလ် ပယ်နယ်တီ(၄-၁)ဂိုးနဲ့ အိမ်ကွင်းမှာ ရှုံးချက်နာခဲ့ရတာပါ။

ဘွန်ဒစ်လီဂါပြိုင်ဘက် ဘိုင်ယန်မြူးနစ်နဲ့ လေဗာကူဆင်ပွဲမှာ လေဗာကူဆင်က အိမ်ရှင်အသင်းပီပီ ပွဲကို ပိုမိုလွှမ်းမိုးကစားခဲ့ပေမယ့် ဟာရီကိန်းဦးဆောင်တဲ့ ဘိုင်ယန်မြူးနစ်တိုက်စစ်က ထိရောက်တဲ့ တိုက်စစ်ဆင်မှုတွေနဲ့အတူ အနိုင်ဂိုးရအောင် ကစားနိုင်ခဲ့ပါတယ်။ ဘိုင်ယန်အတွက် ဂိုးတွေကိုတော့ ဟာရီကိန်း(၅၂ မိနစ်)နဲ့ အယ်လ်ဖွန်ဆိုဒေးဗီးစ်(၇၁ မိနစ်)တို့က သွင်းယူခဲ့ပြီး မူဆီယာလာရဲ့တိုင်ထိကန်ချက်တွေသာ ဂိုးဖြစ်ခဲ့ရင် ဘိုင်ယန်မြူးနစ်အသင်း(၂-၀)ဂိုးရလဒ်ထက် ပိုပြတ်တဲ့ ဂိုးရလဒ်ကို ရရှိမှာပါ။ ဘိုင်ယန်မြူးနစ်က လေဗာကူဆင်ကို နှစ်ကျော့ပေါင်း(၅-၀)ဂိုးရလဒ်နဲ့ နောက်တစ်ဆင့်တက်ခဲ့ပါတယ်။

ဘင်ဖီကာကို အဝေးကွင်းပထမအကျော့မှာ (၁-၀)ဂိုးနဲ့ နိုင်ထားတဲ့ ဘာစီလိုနာအသင်းကလည်း ဒုတိယအကျော့ အိမ်ကွင်းမှာ ပထမပိုင်းသွင်းဂိုးတွေနဲ့ အနိုင်ထပ်ယူခဲ့ပါတယ်။ ဘာစီလိုနာအသင်းအတွက် ခြေစွမ်းပြနေတဲ့ ရာဖင်ညာက (၁၁ မိနစ်၊ ၄၂ မိနစ်)တွေမှာ (၂)ဂိုးသွင်းခဲ့ပြီး ယာမားလ်က (၂၇)မိနစ်မှာ တစ်ဂိုးသွင်းကာ (၃-၁)ရလဒ်နဲ့ အနိုင်ယူခဲ့တာပါ။ ဘာစီလိုနာက ဘင်ဖီကာကို နှစ်ကျော့ပေါင်း(၄-၁)ဂိုးရလဒ်နဲ့ ကွာတားဖိုင်နယ်တက်ခဲ့ပါတယ်။

ဖီယင်နုကို အဝေးကွင်းပထမအကျော့မှာ (၂-၀)ဂိုးနဲ့ နိုင်ထားတဲ့ အင်တာမီလန်အသင်းကလည်း အိမ်ကွင်းမှာ သူရမ်၊ ချာဟာနိုဂလူးတို့ရဲဂိုးတွေနဲ့အတူ (၂-၁)ဂိုးနဲ့ အနိုင်ယူပြီး နှစ်ကျော့ပေါင်း(၄-၁)ဂိုးရလဒ်နဲ့ ကွာတားဖိုင်နယ်တက်ခဲ့ပါတယ်။
ကွာတားဖိုင်နယ်မှာ အင်တာမီလန်အသင်းဟာ ဘိုင်ယန်မြူးနစ်အသင်းနဲ့ ဆုံတွေ့မှာဖြစ်ပြီး ကျန်အသင်းတွေကတော့ ဒီနေ့ပွဲရလဒ်တွေကို စောင့်ကြည့်ရမှာပါ။
Discussion