ရီးရဲလ်မက်ဒရစ်ပရိသတ်တွေရဲ့ ဒေါသတကြီးပြစ်တင်မှုကို ရင်ဆိုင်နေရတဲ့ ဘယ်လင်ဂမ်
ရီးရဲလ်မက်ဒရစ်ပရိသတ်တွေဟာ အချစ်ကြီးသလို အမုန်းကြီးသူတွေလို့ ပြောရင်မမှားနိုင်ပါဘူး။ အိမ်ကွင်းဘာနေဗျူးကွင်းမှာ မိမိချစ်ခင်နှစ်သက်တဲ့ကစားသမားကို တစ်ကွင်းလုံးလှိုက်လှိုက်လှဲလှဲအော်ဟစ်အားပေးတတ်သလို၊ ခြေစွမ်းမပြနိုင်တာမျိုး၊ ကြိုးစားအားထုတ်မှုလျော့နည်းလာတာမျိုးမှာလည်း ပစ်ပစ်ခါခါ ရှုတ်ချအော်ဟစ်လှောင်ပြောင်လေ့ရှိပါတယ်။
လတ်တလောမှာ ရီးရဲလ်မက်ဒရစ်ပရိသတ်တွေရဲ့ပစ်မှတ်ကစားသမားဖြစ်နေရသူက အင်္ဂလန်ကွင်းလယ်လူ ဂျုဒ်ဘယ်လင်ဂမ်ပါပဲ။ ပြီးခဲ့တဲ့ စပိန်ဘုရင့်ဖလားဗိုလ်လုပွဲမှာ ဘာစီလိုနာအသင်းကို (၂-၃)ဂိုးနဲ့ အရေးနိမ့်ခဲ့ရခြင်းအတွက် ဘယ်လင်ဂမ်က အဓိကတရားခံတစ်ဦးလိုဖြစ်နေတာပါ။
ဒီပွဲမှာ ဘာစီလိုနာအသင်းသွင်းယူခဲ့တဲ့ ပထမဂိုးအတွက် ဘယ်လင်ဂမ်မှာ အပြည့်အ၀တာဝန်ရှိတဲ့အပြင် ဘောလုံးဆုံးရှုံးချိန်မှာ ဘောလုံးပြန်ရဖို့ ကြိုးစားအားထုတ်မှု လျော့နည်းခဲ့ခြင်းအပေါ်မှာလည်း ပရိသတ်တွေက ထောက်ပြဝေဖန်နေကြတာပါ။
ဘာစီလိုနာအသင်းရဲ့အဖွင့်ဂိုးက လာမင်းယာမားလ်ရဲ့ဖန်တီးပေးပို့မှုကနေ ကွင်းလယ်လူပက်ဒရီက ဧရိယာထိပ်ကနေ အပြင်းကန်သွင်းခဲ့တာပါ။ ဒီဂိုးဖြစ်ပေါ်လာစေတဲ့ အဓိကအကြောင်းအရာက ဘယ်လင်ဂမ်ရဲ့လွဲမှားတဲ့ဘောလုံးပေးပို့မှုကြောင့် ဖြစ်တယ်လို့ ဒီဂိုးရရှိပုံ ဗီဒီယိုဖိုင်ကို ဆိုရှယ်မီဒီယာမှာ ပရိသတ်တွေက (Share)ဝေမျှခဲ့ကြပါတယ်။
ကွင်းလယ်စက်ဝိုင်းထဲက ဘယ်လင်ဂမ်က ရှေ့ကို ဘောလုံးပေးပို့ရာမှာမသေသပ်ခဲ့တာကြောင့် ဘာစီလိုနာနောက်ခံလူကူဘာဆီက ဘောလုံးလမ်းကြောင်းကို ဖြတ်တောက်ခဲ့လို့ ဘယ်လင်ဂမ်ရှေ့က ပက်ဒရီက ဘောလုံးရသွားခဲ့ပါတယ်။ ပက်ဒရီက ညာတောင်ပံမှာပြေးတက်လာတဲ့ လာမင်းယာမားလ်ဆီ ဘောလုံးကို ကန်တင်ပေးပို့ခဲ့တာပါ။
ဒီဖြစ်စဉ်မှာ ဘယ်လင်ဂမ်ဟာ ဘောလုံးဆုံးရှုံးတာနဲ့ လက်နှစ်ဖက်ကို ခေါင်းပေါ်တင်ပြီး ဘာစီလိုနာကစားသမားတွေ ပြုလုပ်သမျှကို လိုက်ကြည့်နေပါတယ်။ ပက်ဒရီဆီက ဘောလုံးကို လုယူ/တားဆီး(ဒါမှမဟုတ်)အလယ်ကြောတစ်လျှောက်ပြေးတက်သွားတဲ့ပက်ဒရီကို လူကပ်ရမယ့်အစား ဘာအားထုတ်မှုမှမရှိတဲ့ ဘယ်လင်ဂမ်ရဲ့လုပ်ရပ်ဟာ ရီးရဲလ်မက်ဒရစ်ပရိသတ်တွေကို ဒေါသထွက်စေခဲ့ပါတယ်။
ဒါကြောင့် ဆိုရှယ်မီဒီယာမှာ ဒီဗီဒီယိုဖိုင်ပျံ့နှံ့ခြင်းနဲ့အတူ ရီးရဲလ်မက်ဒရစ်ပရိသတ်တွေရဲ့ ဝေဖန်ပြစ်တင်မှုတွေက အတောမသတ်နိုင်အောင် ရောက်ရှိလာခဲ့ပါတယ်။
ဒီဝေဖန်မှုတွေထွက်ပေါ်လာအပြီးမှာ ဘယ်လင်ဂမ်က သူ့ရဲ့ဆိုရှယ်မီဒီယာမှာ "ကျွန်တော့်ဘက်က ရှိသမျှအားလုံး ပေးခဲ့ပါတယ်။ ဒါပေမယ့်မလုံလောက်ခဲ့ဘူး။ နောက်ထပ်ဗိုလ်လုပွဲ(၅)ပွဲကျန်ပါသေးတယ် (လာလီဂါလက်ကျန် ၅ ပွဲကို ဆိုလိုသည်)။ ကျွန်တော်တို့မှာ ရှိသမျှအကုန်ပေးပြီး ကြိုးစားသွားပါမယ်။ ရီးရဲလ်မက်ဒရစ်အသင်းရှေ့ဆက်နိုင်ဖို့ သေတဲ့အထိ ကြိုးစားသွားပါမယ်"လို့ ရေးသားပြီး ဒေါသထွက်နေတဲ့ ပရိသတ်တွေကို ချွေးသိပ်ခဲ့ပါတယ်။
